އަންނަ ސެޕްޓެމްބަރު މަހު ބާއްވާ ރިޔާސީ އިންތިހާބަށް އެމްޑީޕީގެ ފަރާތުން ވާދަކުރައްވާ ރައީސް އިބްރާހިމް މުހައްމަދު ސޯލިހުގެ ރިޔާސީ ކެމްޕެއިނު މި މަހު ފަށާނެ ކަމަށް ބުނެފި އެވެ.
އެމްޑީޕީގެ ޗެެއާޕާސަންގެ ނައިބު އިބްރާހީމް ވަހީދު (މަދަނަ އިބުރޭ) މިއަދު "އަދަދު" އަށް ވިދާޅުވީ މި މަހު އެ ޕާޓީން ރިޔާސީ އިންތިހާބަށް ކެމްޕެއިން ފަށަން ހަމަޖެހިފައިވާ ކަމަށެވެ. ނަމަވެސް ކެމްޕޭން ފަށާނެ ސީދާ ތާރީހެއް އޭނާ ވިދާޅެއް ނުވެ އެވެ.
ޖޫން މަހު ކެމްޕެއިން ފަށަން އެމްޑީޕީން ނިންމާފައިވާއިރު, މި މަހު ފަހުކޮޅު, އަޟްހާ އީދާ ދިމާކޮށް ނުވަ ދުވަހުގެ ބޮޑު ޗުއްޓީއެއް އެބަ އާދެ އެވެ. އީދާ ދިމާކޮށް ނުވަ ދުވަހުގެ ޗުއްޓީއެއް ލިބެނީ, މެދުތެރެއިން އަންނަ ދެ ދުވަސް ސަރުކާރު ބަންދު ދުވަސްތަކުގެ ގޮތުގައި ރައީސް ސޯލިހު ހަމަޖެއްސެެވުމުންނެވެ.
މިކަމާ ސުވާލު ކުރުމުން އިބުރޭ ވިދާޅުވީ ޗުއްޓީ ތެރޭގައި ވެސް ކެމްޕެއިން ކުރިއަށް ދާނެ ކަމަށެވެ.
ސެޕްޓެމްބަރު 9، ގައި ބާއްވަން ތައްޔާރުވަމުންދާ ރިޔާސީ އިންތިހާބަށް ކުރިމަތިލުމަށް ހުޅުވާލާނީ ޖުލައި 23، ގަ އެވެ. އަދި ކެމްޕެއިން ކުރުމުގެ ފުރުސަތު އިލެކްޝަން ކޮމިޝަނުން ރަސްމީކޮށް ހުޅުވާލާނީ އޮގަސްޓު 10، ގަ އެވެ.
އެ އިންތިހާބުގައި ވާދަ ކުރައްވާނެ ކަމަށް ރައީސް އިބްރާހިމް މުހައްމަދު ސޯލިހާއި ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީގެ ލީޑަރު ގާސިމް އިބްރާހިމް ވަނީ ވިދާޅުވެފަ އެވެ. އިދިކޮޅުގެ ރިޔާސީ ކެންޑިޑޭޓެއްގެ ގޮތުގައި ކަނޑައަޅާފައި ވަނީ ކޮރަޕްޝަންގެ މައްސަލައެއްގައި 11 އަހަރުގެ ޖަލު ހުކުމެއް ތަންފީޒު ކުރައްވަމުން އަންނަ ކުރީގެ ރައީސް އަބްދުﷲ ޔާމިނެވެ.
