ރައްޔިތުންގެ މަޖިލީހުގެ ދާއިމީ ކޮމިޓީތައް އަލުން އެކުލަވާލަން އިދިކޮޅު ފަރާތްތަކުން ބޭނުންވަނީ އެއްވެސް ކޮމިޓީއެއްގައި އެމްޑީޕީގެ މެޖޯރިޓީ ނެތް ގޮތަށް ކަމަށާއި އެއީ އެއްބަސް ވެވޭނެ ގޮތެއް ނޫން ކަމަށް މެޖޯރިޓީ ޕާޓީ، އެމްޑީޕީގެ ޕާލިމެންޓްރީ ގްރޫޕުގެ ލީޑަރު މުހައްމަދު އަސްލަމް ވިދާޅުވެއްޖެ އެވެ.
ރޭ ގެނެސްދިން އަދަދު ނޫހުގެ "އެތެރެފުށް" ޕްރޮގްރާމުގައި ހިތަދޫ އިތުރު ދާއިރާގެ މެންބަރު އަސްލަމް ވިދާޅުވީ ކޮމިޓީތަކަށް ބަދަލު ގެނައުމާ ގުޅޭ ގޮތުން ބުރާސްފަތި ދުވަހު ޕާޓީތަކުން ބޭއްވި މަޝްވަރާ ބައްދަލުވުމުގައި ބައިވެރިވި އެހެން ޕާޓީތަކުން ބޭނުންވީ އެމްޑީޕީ އަށް ކޮމިޓީތަކުން 50 ޕަސެންޓު ޖާގަ، ބާކީ 50 ޕަސެންޓް އެހެން މެންބަރުންނަށް ބަހައިލުމަށް ކަމަށެވެ.
މަޖިލީހުގައި 64 ޕަސެންޓް މެޖޯރިޓީ އެމްޑީޕީ އަށް އޮތްއިރު އަސްލަމް ވިދާޅުވީ އިދިކޮޅުން އެދިފައިވާ ގޮތަށް ކޮމިޓީތައް ބަދަލުކުރުމަކީ އެމްޑީޕީއަށް ވަރަށް ބޮޑު ގެއްލުމެއް ކަމަށެވެ.
"އަޅުގަނޑު ގަބޫލެއް ވެސް ނުކުރަން، އެގޮތަކަށް އެއްބަހެއް ވެސް ނުވާނަން. އެހެން ނަމަވެސް އަޅުގަނޑުމެންނަށް މިހާރު ވެސް ދޫދެވެން ހުރި ދިމަދިމާއިން ދޫ ދީފިން،" ޕާޓީތަކުގެ ބައްދަލުވުމަށް އިޝާރާތް ކުރައްވައި އަސްލަމް ވިދާޅުވި އެވެ.
titledesc
އެގޮތުން އާންމު ކޮމިޓީން އެމްޑީޕީއަށް ލިބެންޖެހޭ 10 ޖާގައިގެ ތެރެެއިން އެއް ޖާގަ، 241 ކޮމިޓީން އެމްޑީޕީގެ ދެ ޖާގަ އަދި މާލިއްޔަތު ކޮމިޓީ އާއި އިގުތިސޯދީ ކޮމިޓީން ވެސް އެމްޑީޕީގެ ޖާގަ ދޫކޮށްލަން ބުރާސްފަތި ދުވަހު އެ ޕާޓީން އެއްބަސްވެފައިވާ ކަމަށް އަސްލަމް ވިދާޅުވި އެވެ.
ބަންޑާރަ ނައިބު އިބްރާހިމް ރިފްއަތު އާއި މަޖިލީހުގެ ނައިބު ރައީސް އީވާ އަބްދުﷲގެ އިތުބާރު ނެތްކަމުގެ މައްސަލަ ގަވާއިދާ އެއްގޮތަށް ކުރިއަށް ނުގެންގޮސް މަޑުކޮށްލާފައި އޮތީ، ކޮމިޓީތައް އަލުން އެކުލަވާ ނުލެވޭ ކަމަށް ބުނެ އެވެ.
އެއީ މަޖިލީހުގެ ރިޔާސަތުން ދައްކާ ހުއްޖަތެއް ކަމަށާއި އެ މައްސަލަތައް ކުރިއަށް ނުގެންގޮސް އޮތީ، މަޖިލީހުގެ ރިޔާސަތުން ގަސްދުގައި ކަމަށް އަސްލަމް ވިދާޅުވި އެވެ.
"ކުރިއަށް ނުދާނެ އެއްވެސް ސަބަބެއް ނެތް. ކުރިއަށް ނުގެންދެވޭނެ އެއްވެސް ސަބަބެއް ނެތް،" ރައްޔިތުންގެ މަޖިލީހުގައި ވިދިވިދިގެން ހަތަރު ވަނަ ދައުރު ފުރިހަމަ ކުރައްވާ އަސްލަމް ވިދާޅުވި އެވެ.
މަޖިލީސް އެކުލެވިގެންވާ ގޮތަށް ބަދަލު އަންނަ ހާލަތްތަކުގައި މީގެ ކުރިން ވެސް ކޮމިޓީތަކަށް އެ ބަދަލު ގެނެސްފައިވާއިރު، އެކަން ކޮށްފައިވަނީ މަޖިލީހުގެ ހިންގުން ހުއްޓުވައިގެން ނޫންކަން އަސްލަމް ފާހަގަ ކުރެއްވެވި އެވެ.
"މަޖިލީހުގެ ރައީސްގެ މަސްއޫލިއްޔަތަކީ ތަޅުމަށް ގެންދިޔުން. ދެން ސިޔާސީ ޕާޓީތަކާއި މެމްބަރުންގެ މަސްއޫލިއްޔަތަކީ ހުށަހެޅުމެއް ހުށަހެޅުން. ނިންމަން އޮތީ މަޖިލީހުގެ ތަޅުން. އެހެންވީމަ ނިމުނީމަ އެ ނިމުނީ. ރިޔާސަތުން އެ ނުގެންނެވުން އެންމެ ބޮޑު އެއް މައްސަލައަކީ،" އޭނާ ވިދާޅުވި އެވެ.
މަޖިލީހުގެ ގަވާއިދުގެ 106 ވަނަ މާއްދާއެއްގައި އޮތް ގޮތުން އެއްވެސް ކޮމިޓީގެން އުވިގެން ނުދާ ކަމަށާއި މަޖިލީހުން ފާސްކޮށްފައިވާ ފާސްކުރުމެއްގެ މައްޗަށް އެކުލަވާލާފައިވާ ކޮމިޓީތައް އެ ނޫން ގޮތަކަށް ބަދަލު ނުކުރާހާ ހާލަތެއްގައި ދެމިއޮންނާނެ ކަމަށް އަސްލަމް ވިދާޅުވި އެވެ. އަދި މަޖިލީހުން ފާސް ކުރުމެއް ނެތި މަޖިލީހުގެ ރިޔާސަތުން އަންގާ އެންގުމަކަށް ކޮމިޓީތައް ނުހުއްޓުވޭނެ ކަމަށާއި އެއީ ގަވާއިދު ހުއްދަ ދޭ ކަމެއް ނޫން ކަމަށް ވެސް އަސްލަމް ވިދާޅުވި އެވެ.
ބަންޑާރަ ނައިބު އިބްރާހިމް ރިފްއަތުގެ އިތުބާރު ނެތްކަމުގެ މައްސަލައަށް މިދިޔަ ހަފުތާގައި ބަހުސް ކުރި ނަމަވެސް، މައްސަލަ ކުރިއަށް ގެންދިޔުން ރިޔާސަތުން ވަނީ މަޑުޖައްސާލައިފަ އެވެ. އެއަށް ފަހު، ނައިބު ރައީސް އީވާ އަބްދުﷲގެ އިތުބާރު ނެތްކަމުގެ މައްސަލަ ވަނީ ޖޫން 12 ވަނަ ދުވަހުގެ އެޖެންޑާއިން ނަގައިފަ އެވެ.
ރާއްޖޭގެ ދެކުނުގެ ކަނޑުގެ އިން ވަކިކުރުމާ ގުޅިގެން އިދިކޮޅުން ވަނީ ފޮރިން މިނިސްޓަރު އަބްދުﷲ ޝާހިދުގެ އިތުބާރު ނެތްކަމުގެ މައްސަލަ ހުށަހަޅައިފަ އެވެ. އިތުބާރު ނެތްކަމުގެ މައްސަލަތައް ހުއްޓުވުމާ ގުޅިގެން އެމްޑީޕީން ވަނީ ނަޝީދުގެ އިތުބާރު ނެތްކަމުގެ މައްސަލަ 54 މެމްބަރުންގެ ސޮޔާއެކު މަޖިލީހަށް ފޮނުވައިފަ އެވެ.
