ސްޕެޝިއަލައިޒްޑް ޑޮކްޓަރުން ލިބުމުގައި ދިމާވާ ދަތިތަކަށް އަވަސް ހައްލެއް ހޯދުމަށް ޓަކައި އިންޑިއާގެ ކޮޗިންގެ އެސްޓާ މެޑްސިޓީ ހޮސްޕިޓަލުގެ ޑޮކްޓަރުން ވިޒިޓިން ޑޮކްޓަރުންގެ ގޮތުގައި ޓްރީ ޓޮޕް ހޮސްޕިޓަލްއަށް ގެންނަން ޓްރީޓޮޕުން އެ ހޮސްޕިޓަލާ އެކު އެއްބަސްވުމެއްގައި ސޮއިކޮށްްފި އެވެ.
ޓްރީޓޮޕް ހޮސްޕިޓަލުން ބުނީ އެސްޓާ މެޑްސިޓީއާ އެކު ސޮއިކުރި އެއްބަސްވުމުގެ ދަށުން ޓްރީ ޓޮޕް ހޮސްޕިޓަލްއަށް ވަޑައިގެންނެވެމުށް ހަމަ ޖެހިފައިވާ ސްޕެޝިއަލްޓީ ތަކުގެ ތެރޭގައި ޔޫރޮލޮޖީ، ނިއުރޮލޮޖީ، އެނެސްތެސިއޮލޮޖީ، ޕަލްމޮނޮލޮޖީ، ޕީޑިއޭޓްރިކް އޯތޮޕެޑިކް ސާޖަރީ، ހެމަޓޮލޮޖީ، އޮޓޯރިނޮލަރިންގޮލޮޖީ (އީއެންޓީ)، އޯތޯޕެޑިކް ސާޖަރީ، އޯތޮޑޮންޓިކްސް، އަދި ކުރިއަށް އޮތްތަނުގައި ބޭނުންވެދާނެ އެހެން ސްޕެޝަލިޓީތައް ހިމެނޭ ކަމަށެވެ. ޓްރީ ޓޮޕް ހޮސްޕިޓަލުން ދޭ ސިއްހީ ހިދުމަތްތައް އެ އެއްބަސްވުމާ އެކު އިތުރަށް ފުޅާކުރެވޭނެ ކަމަށް ވެސް އެެ ހޮސްޕިޓަލުން ބުންޏެވެ.
ޓްރީ ޓޮޕް ހޮސްޕިޓަލަކީ އާ ހިދުމަތްތައް ފަށައި، ޒަމާނީ ފެންވަރަށް ސިއްހީ ހިދުމަތް ފޯރުކޮށްދެމުން އަންނަ ހޮސްޕިޓަލެކެވެ. އެ ހޮސްޕިޓަލުން މިހާރު ވެސް އަންނަނީ އެންމެ ފަހުގެ ވަސީލަތްތަކާއެކު އާ ހިދުމަތްތައް ތައާރަފުކުރަމުންނެވެ.
