ރާއްޖޭގެ ދެކުނުގެ އީއީޒެޑް ކަނޑައެޅި މައްސަލައިގައި ކުރާ ތުހުމަތުތައް ވަރަށް ސީރިއަސް ކަމަށާއި އެ މައްސަލަ ރައްޔިތުންގެ މަޖިލީހުން ތަހުގީގު ކުރަންޖެހޭ ކަމަށް ވެރިކަން ހިންގާ މޯލްޑިވިއަން ޑިމޮކްރެޓިކް ޕާޓީގެ ޕާލަމެންޓްރީ ގްރޫޕުގެ ލީޑަރު އަދި މަޖިލީހުގެ ހިތަދޫ އުތުރު ދާއިރާގެ މެމްބްބަރު މުހައްމަދު އަސްލަމް ވިދާޅުވެއްޖެ އެވެ.
ޕީއެސްއެމް ނިއުސްގެ "ރާއްޖެ މިއަދު" ޕްރޮގްރާމުގައި ރޭ ވާހަކަ ދައްކަވަމުން އަސްލަމް ވިދާޅުވީ އިން ކަނޑައެޅި މައްސަލައިގައި އިދިކޮޅު ފަރާތްތަކުން ކުރަނީ ވަރަށް ސީރިއަސް ތުހުމަތުތަކެއް ކަމަށާއި އެކަމުގެ ހަގީގަތް ހޯދަންޖެހޭ ކަމަށެވެ.
"މައްސަލައާއި ގުޅޭގޮތުން އެކި ފަރާތްތަކުން ދައްކަވަމުންދާ ވާހަތަކަށް ބަލާއިރު، ރަނގަޅު ފުރިހަމަ އިންކުއަރީއެއް މިމައްސަލާގައި ހަދަންޖެހޭ. ރާއްޖޭގެ ސަރަހައްދު، އަދި ތުހުމަތު މިކުރަނީ ވިއްކާލީއޭ. ވަރަށް ހުތުރުކޮށް ބައެއް ފަރާތްތަކުން ތުހުމަތު މިކުރަނީ. ކަމުގެ ހަގީގަތަކީ ކޮބައިތޯ ބަލަންޖެހޭ،" އަސްލަމް ވިދާޅުވި އެވެ.
އޭނާ ވިދާޅުވީ، އިން ކަނޑައެޅި މައްސަލައިގައި ބަޔަކު އިހުމާލުވާ ނަމަ ރައްޔިތުންގެ މަޖިލީހުން އެ މައްސަލަ ބަލައި އިހުމާލުވާ ބަޔަކާމެދު ފިޔަވަޅު އަޅަންޖެހޭ ކަމަށެވެ.
"ވަރަށް ތަފްސީލްކޮށް އަޅުގަނޑުމެން ބަލަންޖެހޭ މިކަމުގައި އިހުމާލުވާ ބަޔަކު ތިބި ނަމަ. އެއިހުމާލުވާ ބައެއް ވެސް އަޅުގަނޑު ގަބޫލުކުރާ ގޮތުން ބަލައި، ހޯދަންޖެހޭ. މިކަމުގެ ހަގީގަތަށް ތަފްސީލްކޮށް ވާސިލް ވާންޖެހޭ ކަމަށް އަޅުގަނޑު ދެކެނީ. އެފަދަ މަސައްކަތެއް ކުރަން ވަރަށް އެކަށީގެންވާ ފޯރަމެއް 241 ކޮމެޓީއަކީ،" އަސްލަމް ވިދާޅުވި އެވެ.
އަސްލަމް ވިދާޅުވި ގޮތުގައި ރައްޔިތުންގެ މަޖިލީހުގެ ގައުމީ ސަލާމަތާ ބެހޭ ކޮމެޓީން އެ މައްސަލަ ބަލާ ނަމަ ވަރަށް ތަފުސީލީކޮށް އޭގައި ހިމެނޭ ހުރިހާ ބައިތަކެއް ބަލަންޖެހޭނެ އެވެ.
"241 ކޮމެޓީން މުޅި މި މައްސަލަ ބަލައި، ކިހިނެއްތޯ ކޮން ހިސާބަކުންތޯ މި މައްސަލަ އޮތީ. ދިވެހި ރާއްޖޭގެ ސިޔާދަތީ ބާރުލިބިގެންވާ ސަރަހައްދަކީ ގާނޫނު ބުނަނީ ކޮން ސަރަހައްދެއްތޯ؟ ސިޔާދަތީ ހައްގު ލިބިގެންވާ ސަރަހައްދަކީ ކޮބައިތޯ؟ ކިހިނެތްތޯ މިކަން މިވަނީ. ސިޔާދަތީ ހައްގު ލިބިގެންވާ ސަރަހައްދާ ގުޅޭގޮތުން ޑިލިމިޓް ކުރަން މިޖެހުނީ ކީއްވެތޯ؟ އިޓްލޮސްއަށް މިދިޔައީ ކޮންބައެއްތޯ؟ އިޓްލޮސްއަށް ދިއުމުގެ ހައްގު އޮންނަނީ ކިހާމުއްދަތަކަށްތޯ؟" އޭނާ ވިދާޅުވި އެވެ.
އިން ކަނޑައެޅި މައްސަލައިގައި އިހުމާލުވި ބަޔަކު ހޯދަންޖެހޭނެ ކަމަށް އަސްލަމް ވިދާޅުވިއިރު ބަންޑާރަ ނައިބުގެ އިތުބާރު ނެތްކަމުގެ މައްސަލައިގައި އޭނާ މަޖިލީހަށް ހާޒިރުވެ ދިފާއުގައި ވާހަކަ ދައްކަވަމުން ވިދާޅުވީ، އެ މައްސަލައިގައި ކުރީގެ ސަރުކާރުތަކުން އަދި ކުރީގެ ބަންޑާރަ ނައިބުން އިހުމާލުވެފައިވާ ކަމަށެވެ.
"ކުރީގެ އެއްވެސް ސަރުކާރަކުން ދިވެހިން ހައްގުގައި ގޮތެއް ނިންމާކަށް ނުކެރުން. ނޭނގި ނަމަވެސް ކޮށްފައިވާ ކަމަކީ ބޮޑުތަނުން އިހުމާލުވުންކަން އަޅުގަނޑު ފާހަގަ ކުރަން. ރިފްއަތު ވިދާޅުވި އެވެ. "ދެކުނުގެ އީއީޒެޑުގެ މައްސަލައިގައި ކުރީގެ ބަންޑާރަ ނައިބުން ވެފައިވާ އިހުމާލު ވެސް އިންތިހާއަށް ބޮޑު. އެކަން އަޅުގަނޑު ލަދުވެތިކަމާއެކު ފާހަގަ ކުރަން." އަސްލަމް ވިދާޅުވި އެވެ.
ޗާގޯސް ޖަޒީރާތަކަކީ މޮރިޝަސްގެ ބައެެއް ކަމަށް އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީސް (އިޓްލޮސް) އިން ރާއްޖެއްޖެއާ އެެގައުމާ ދެމެދު ކަނޑުގެ އިން ވަކި ކުރި އިރު ރާއްޖެއަށް ލިބެން އޮތް ބައެއް ހޯދަން ސަރުކާރުން މަސައްކަތް ނުކޮށް ދޫކޮށްލި ކަމަށް އިދިކޮޅުން ތުހުމަތުކުރެ އެވެ.
