އަރިއަތޮޅު ނަލަގުރައިދޫގައި ހިންގާ ސަން އައިލެންޑް ރިސޯޓުން ކުނި ހިފައިގެން ހުޅުމާލެ ފަޅަށް ވަންނަން އައި ދޯންޏެއްގައި ރޯވި އަލިފާން ރޯވުމުން ސިފައިން އެ އަލިފާންގަނޑު ނިއްވާލައިފި އެވެ.
އެ ހާދިސާގައި ދޯނިން ދަތުރުކުރި މީހަކަށް ކަމެއް ނުވެ އެވެ.
އެމްއެންޑީއެފުން މިއަދު ބުނި ގޮތުގައި ރޭ މެންދަމުން އަލިވެ 03:51 ހާއިރު ހިނގި އެ ހާދިސާގައި ރޯވީ "ސީއެމްއެފް-2" ނަމަކަށް ކިޔާ ދޯންޏެއްގައި ކަމަށެވެ. އެ ދޯނީގައި ހުރީ ބައު ދަނގަޑާއި ޓަޔަރާއި ލަކުޑިފަދަ ތަކެތި ކަމަށާއި އެ ދޯނީގައި ރޯވި އަލިފާން ތަކެތީގައި ވެސް ހިފި ކަމަށް ވެސް އެންއެމްޑީއެފުން ބުންޏެވެ.
ދޯނީގައި ރޯވި އަލިފާންގަނޑު ނިއްވައިލެވުނީ ފަތިހު 4:50 ހާއިރު އެވެ.
"ހުޅުމާލެ ފިއުލް ސަޕްލައި މޯލްޑިވްސްގެ ހުޅަނގުން ހުޅުމާލެ ބަނދަރަށް ވަންނަނިކޮށް އެ ދޯނީގެ އިންޖީނުގެ ޑީސަލް ޓޭންކުގައި އަލިފާން ރޯވުމުން، އެ ވަގުތު އާންމުންގެ އެހީތެރިކަމާއެކު އެ ދޯނި އެދިމާލު ބަނދަރަށް ގާތްކުރުމުން އެމްއެންޑީއެފް ހުޅުމާލެ ފަޔާ ސްޓޭޝަންގެ ސިފައިން ވަަނީ ފޯމް ބޭނުންކޮށްގެން އަލިފާން ނިއްވާލާފައެވެ." އެމްއެންޑީއެފުން މިއަދު ބުނެފައިވެ އެވެ.
މި މަހުގެ ދެވަނަ ދުވަހު މާލެއިން ފުރައިގެން ރ. ރަސްގެތީމަށް ދަތުރުކުރި ދޯންޏެއްގައިވެސް ވަނީ ރޯވެފަ އެވެ. އެ ހާދިސާގައި ދޯނީގެ އިންޖީނު ރޫމްގައި ރޯވެ، މުޅި ދޯނި އަނދައި އަޑިއަށް ދިޔަ ނަމަވެސް އެއްވެސް މީހަކަށް ގެއްލުމެއް ނުވެ އެވެ.
