އެޓާނީ ޖެނެރަލް އިބްރާހިމް ރިފްއަތުގެ އިތުބާރުނެތް ކަމަށް ކަނޑައަަޅަން ރައްޔިތުންގެ މަޖިލީހަށް ހުށަހަޅާފައިވާ މައްސަލާފައި ޖަވާބުދާރީ ވެވަޑައިގަންނަަވަން އޭނާ ވަޑައިގެންނެވުމުން މަޖިލީހުގެ އިދިކޮޅު މެމްބަރުން އަޑުގަދަކުރައްވައި، ބޮޑު ޒުވާބެއް ފައްޓަވައިފި އެވެ.
އިތުބާރު ނެތް ކަަމަށް ހުށަހެޅި މައްސަލާގައި އޭޖީ މަޖިލީހަށް ފުރަތަމަ ޖަވާބު ފޮނުއްވީ ލިޔުމުންނެވެ. މަޖިލީހުގައި މިދިޔަ ބުދަ ދުވަހުގެ ޖަލްސާގައި އެކަން ބޮޑު ބަހުސަކަށް ގޮސް، ސުޕްރީމް ކޯޓުގެ ލަފައެއް ހޯއްދަވާނެ ކަމަށް ރިޔާސަތުން މަޖިލީހުގެ ރައީސް މުހައްމަދު ނަޝީދު ވިދާޅުވި އެވެ.
އެކަން އެހެން ހިނގާފައި އޮއްވައި މިއަދުގެ ޖަލްސާއަށް މައްސަލަ އެޖެންޑާ ކުރި އިރު ޖަވާބުދާރީ ވެވަޑަައިގަންނަވަން ރިފްއަތު ވަޑައިގެންނެވި އެވެ. ޖަލްސާ ފެށުމާ އެކު ނައިފަރު ދާއިރާގެ ޕީޕީއެމް މެމްބަރު އަހުމަދު ޝިޔާމާއި އިދިކޮޅު އެހެން ބައެއް މެމްބަރުން ތެދުވެވަޑައިގެން އަޑުގަދަކުރައްވައި ރިފްއަތަށް އެކި ތުހުމަތުތައް ކުރައްވަން ފެއްޓެވި އެވެ.
ރިފްއަތުގެ އިތުބާރު ނެތް ކަމަށް ކަނޑައަޅަން މަޖިލީހަށް ހުށަހެޅީ ޗާގޯސް ޖަޒީރާތަކަކީ މޮރިޝަސްގެ ބައެއް ކަމަށް ބަލައިގެން އިންޓަނޭޝަނަލް ޓްރައިބިއުނަލް އޮފް ދަ ލޯ އޮފް ދަ ސީސް (އިޓްލޮސް) އިން އެ ޖަޒީރާތަކާ ރާއްޖެއާ ދެމެދު ކަނޑުގެ ސަަރަހައްދީ ރޮނގު ކަނޑައެޅި މައްސަލައާ ގުޅުވައިގެންނެވެ. އިދިކޮޅުން ތުހުމަތުކުރާ ގޮތުގައި އެ މައްސަލާގައި ސަރުކާރުން ވަނީ ރާއްޖޭގެ ދިފާއު ދޫކޮށްލައިފަ އެވެ.
ޝިޔާމާއި އިދިކޮޅު އެހެން މެމްބަރުން މަޖިލީހުގެ ތަޅުމުގައި އަޑުގަދަކުރެއްވި އިރު ކުރެއްވީ ހަމަ އެ ތުހުމަތު ތަކެވެ. އިދިކޮޅު މެމްބަރުން އަޑުގަދަކުރައްވަން ފެއްޓެވުމާއެކު އެމްޑީޕީގެ ބައެއް މެމްބަރުން ވެސް އަޑުގަދަކުރައްވައި ރައްދު ދެއްވި އެވެ. އެހިސާބުން އެކަން ބަދަލުވީ ބޮޑު ޒުވާބަކަށެވެ.
އިދިކޮޅު މެމްބަރުންނަށް ނަސޭހަތް ދެއްވުމުގެ ކުރިން ރިޔާސަތުން މަޖިލީހުގެ ރައީސް މުހައްމަދު ނަޝީދު ފުރަތަމަ އިންޒާރުކުރެއްވީ ކެނދިކުޅުދޫ ދާއިރާގެ މެމްބަރު އަހުމަދު އީސާއަށެވެ. އެއަށް ފަހު ނައިފަރު ދާއިރާގެ މެމްބަރު ޝިޔާމަށް ތަކުރާރުކޮށް ނަސޭހަތް ދެއްވި ނަމަވެސް އޭނާގެ ނަމެއް ނަޝީދު ނީއްވަވަ އެވެ. އޭގެ ބަދަލުގައި އެމަނިކުފާނު ޖަލްސާ މެދުކަނޑުވައްވައިލެއްވީ ސިޔާސީ ޕާޓީތަކުގެ މަޝްވަރާ އަށެވެ.
"އިއްޒަތްތެރި މެމްބަރުން އަޑު އައްސަވާ. އަޅުގަނޑުމެންނަށް މިއަދުގެ މަސައްކަތް ފަަށައިގަނެވި ކުރިއަށް ގެންދެވުނީމާ ، ތިޔަ ވިދާޅުވާ ކަންކަމަށް އަޅުގަނޑު ދެކޭ ގޮތުގައި މަގުފަހިވެގެންދާނެ،" ޝިޔާމާއި އިދިކޮޅު އެހެން މެމްބަރުންނަށް ނަސޭހަތްތެރި ވަމުން ނަޝީދު ވިދާޅުވި އެވެ.
ސިޔާސީ ޕާޓީތަކުގެ މަޝްވަރާއަށް އެމަނިކުފާނު ޖަލްސާ މެދުކަނޑުއްވައިލެއްވުމުގެ ކުރިން އެމްޑީޕީގެ ބައެއް މެމްބަރުންނަށް ވެސް އެމަނިކުފާނު ނަސޭހަތް ދެއްވި އެވެ.
