އެއީ ބޮޑު ވައުދެކެވެ. ބޮޑު މަންޒަރެކެވެ.
"މީގެ ފަސް އަހަރު ކުރިން، 2018 ވަނަ އަހަރު ރާއްޖޭގެ ޖުމްލަ އުފެއްދުންތެރިކަމަކީ 81 ބިލިއަން ރުފިޔާ. މީގެ ފަސް އަހަރު ފަހުން، ރާއްޖޭގެ އިޤްތިޞާދު ދެގުނަކޮށް، 2028 ވަނަ އަހަރު ރާއްޖޭގެ އުފެއްދުންތެރިކަން 177 ބިލިއަން ރުފިޔާއަށް ގެންދެވޭނެ," ރިޔާސީދެ ވަނަ ދައުރަކަށް ހޮވިވަޑައިގެންފި ނަމަ ރާއްޖެ ބަދަލުކޮށްލާނެ ކަމަށް ވެވަޑައިގެންނެވި މި ބިޔަ ތަސައްވުރު ހިއްސާކޮށްލެއްވީ، އައްޑޫ ފަޅަށް ދަމާލާފައިވާ ބޮޑު ކޮންނަ ބޯޓުންގެ އެ ސިޓީގެ 190 ހެކްޓަރުގެ ބިން ހިއްކަން ފެށުމުގެ ރަސްމިއްޔާތުގަ އެވެ.
"މި ފަސް އަހަރުތެރޭ މި ކުރެވުނު މަސައްކަތާއި، ކުރަންހުރި ކަންކަމުގެ މައްޗަށް ފެންނަ ނަތީޖާއެއް އެބަވޭ. އެއީ، ރާއްޖޭގެ ޙާލަތު، ވަރުހުރި އިޤްތިޞާދެއްގެ މައްޗަށް ބިނާކުރެވޭނެ ކަމުގެ އުންމީދު ބޮޑުކަން. 2028 ނިމޭއިރު، ރާއްޖޭގެ އިޤްތިޞާދު، ދެގުނަ ވެގެންދާ ދިޔުމަކީ، ކުރު މުއްދަތަކުން ގެނެވޭނެ އެންމެބޮޑު އެއް ބަދަލު."
އެކަމަށް ބޭނުންވާ ހުރިހާ މަސައްކަތެއް ކުރަމުންދާ ކަމަށާއި ރާއްޖޭގެ އުތުރާއި ދެކުނުގައި ސަރުކާރުން ފަށާފައިވާ ބިޔަ އިގުތިސޯދީ މަސައްކަތްތަކަކީ، ރާއްޖޭގެ އުފެއްދުންތެރިކަން، އެ މަނިކުފާނު ފާހަގަ ކުރެންވި މިނަށް ހިއްލާލާނެ ދުކަރާސްތަކެއް ކަމަށް ރައީސް ސޯލިހު ސިފަ ކުރެއްވެވި އެވެ.
އައްޑޫ ބަދަލުކޮށްލުމުގެ މަޝްރޫއު ފަށާފައިވާއިރު، އުތުރުން ހަނިމާދޫ އެއާޕޯޓު އިންޓަނޭޝަނަލް ކުރުމާއި އުތުރާއި ދެކުނު ޓޫރިޒަމް ހަބެއްގެ ގޮތުގައި ތަރައްގީކުރުމާއި ރާއްޖެ އާރުޓީއެލްއިން ގުޅާލުމާއި، އެއާޕޯޓުތައް ހެދުމަކީ މި ސަރުކާރުން ފަށާފައިވާ އިގުތިސޯދީ ބިޔަ މަޝްރޫއުތަކެވެ.
"ރާއްޖޭގެ އުތުރާއި ދެކުނުގައި ސަރުކާރުން މި ވިއްދަނީ މުޅި ރާއްޖެ އެކުގައި އުފުލާލަދޭނެ އިގުތިސޯދީ ދުންކަރާސް. އޭގެ ބުޑު ބަހައްޓާނެ ބިން އައްޑޫ ސިޓީގައި މިދަނީ ސަރާސަރުވެ ފެތުރެމުން. ރާއްޖެ އެކުގައި ތަރައްގީނުވެ، ދިވެހިން ބޭނުންވާ މަންޒިލެއް ނުހިފޭނެ. ހަމަހަމަ، އުފާވެރި، ތަނަވަސް ޖަޒީރާ ދިރިއުޅުމެއް ދިވެހިންނަކަށް ނުލިބޭނެ. ރާއްޖޭގެ ދެކުނުގެ ކުރިއެރުމާއި ތަރައްޤީގެ މުގޫލައިގަންނަންޖެހޭ އެންމެ ވަރުގަދަ އެއްތަނަކީ ހަމަ އައްޑޫ ސިޓީ،" ރައީސް ސޯލިހު ވިދާޅުވި އެވެ.
މުހިންމު ބައެއް ހަބަރު
ދުވަހުގެ ކޯޓޭޝަން
އައްޑޫ ބިން ހިއްކަން ފެށުމުގެ ރަސްމިއްޔާތުގައި ރައީސް އިބްރާހިމް މުހައްމަދު ސޯލިހު ވިދާޅުވީ،
މި ފަސް އަހަރުތެރޭ މި ކުރެވުނު މަސައްކަތާއި، ކުރަންހުރި ކަންކަމުގެ މައްޗަށް ފެންނަ ނަތީޖާއެއް އެބަވޭ. އެއީ، ރާއްޖޭގެ ޙާލަތު، ވަރުހުރި އިޤްތިޞާދެއްގެ މައްޗަށް ބިނާކުރެވޭނެ ކަމުގެ އުންމީދު ބޮޑުކަން. 2028 ނިމޭއިރު، ރާއްޖޭގެ އިޤްތިޞާދު، ދެގުނަ ވެގެންދާ ދިޔުމަކީ، ކުރު މުއްދަތަކުން ގެނެވޭނެ އެންމެބޮޑު އެއް ބަދަލު."
ދުވަހުގެ ފޮޓޯ
އައްޑޫ ބިން ހިއްކުމާއި ގަން އެއާޕޯޓު ތަރައްގީކުރުމުގެ މަޝްރޫއު ފެށުމަށްޓަކައި ރައީސް ސޯލިހު އިއްޔެ އައްޑޫ ސިޓީއަށް ވަޑައިގެންނެވުމަށް އެ މަނިކުފާނަށް މަރުހަބާ ކިޔުމަށް މައިންބަފައިންނާއެކު ނުކުމެ ހުރި ކުޑަ ކުއްޖަކު އުރުއްވާލައިގެން. -- ފޮޓޯ: ރައީސް އޮފީސް
