މިއަހަރު އޮންނަ ރިޔާސީ އިންތިހާބުގައި އިދިކޮޅު ޕީއެންސީ/ޕީޕީއެމްގެ ފަރާތުން ވާދަކުރައްވާ ކުރީގެ ރައީސް އަބްދުﷲ ޔާމީނުގެ ކެމްޕޭން މެނޭޖަރަކަށް ކެޕްޓަން މުހައްމަދު އަމީން އަދި ޑެޕިއުޓީ މެނޭޖަރަކަށް ކުރީގެ ހެލްތު މިނިސްޓަރު އަބްދުﷲ ނާޒިމް ހަމަޖައްސައިފި އެވެ.
ރިޔާސީ އިންތިހާބަށް ރައީސް ޔާމީނުގެ ފަރާތުން ކުރާ ކެމްޕޭނުގެ މެނޭޖަރުކަމާއި ޑެޕިއުޓީ މެނޭޖަރުކަން ހަވާލުކޮށްފައި ވަނީ ރޭ ބޭއްވި "މަވެސް ޕީޕީއެމް" ޖަލްސާާގަ އެވެ.
ކެމްޕޭނު މެނޭޖަރުކަމަށް ހަމަޖެއްސި ކެޕްޓަން އަމީންއަކީ 2019 އާ ހަމައަށް މޯލްޑިވިއަންގެ ފްލައިޓް އޮޕަރޭޝަންސް ޑިރެކްޓަރުގެ މަގާމު އަދާކުރެއްވި އެވެ. ޑެޕިއުޓީ ކެމްޕޭނު މެނޭޖަރު ނާޒިމް ވަނީ ރައީސްް ޔާމީން ސަރުކާރުގައި ހެލްތު މިނިސްޓަރުގެ މަގާމު އަދާކޮށްފަ އެވެ.
ޔާމީނުގެ ކެމްޕޭނު ރަސްމީކޮށް ފަށާނެ ދުވަހެއް އަދި އިދިކޮޅުން ހާމަކޮށްފައެއް ނުވެ އެވެ. އިދިކޮޅުގެ ރިޔާސީ ކެނޑިޑޭޓަކީ ރައީސް ޔާމީނުކަމަށް ނިންމާފައިވާއިރު، އެމަނިކުފާނު ގެންދަވަނީ މާފުށީ ޖަލުގައި 11 އަހަރުގެ ހުކުމެއް ތަންފީޒު ކުރަމުންނެވެ.
އިދިކޮޅުން ރިޔާސީ އިންތިހާބުގައި ރައީސް ޔާމީނަށް ވާދަނުކުރެވިއްޖެ ނަމަ ދެން ވާދަކުރާނެ މީހަކު އަދި ހާމަކޮށްފައެއް ނުވެ އެވެ.
