ސަރުކާރުގެ ފެން ކުންފުނި، މާލޭ ވޯޓަ އެންޑް ސެވަރޭޖް ކޮމްޕެނީ (އެމްޑަބްލިއުއެސްސީ) ގެ ޕްލާންޓުގެ ވޭލެއްގެ މައްސަލަ ޖެހިގެން ރޭ ދަންވަރު ގިނަ އަދަދެއްގެ ފެން މަގު މައްޗަށް ބޭރުވެއްޖެ އެވެ.
ބާރު ސްޕީޑުގައި ފެންތައް ލީކުވަމުން ދިޔަ މަންޒަރުގެ ވީޑިއޯއެއް ރޭ 3:00 ހާއިރު މާލޭ ސިޓީގެ ޑެޕިއުޓީ މޭޔަރު އަހުމަދު ނަރީޝް ޓްވީޓު ކުރެއްވެވި އެވެ. އެ ވީޑިއޯއިން ފެންނަ ގޮތުގައި ފެންތައް ލީކްވަމުން ދިޔައީ ފެން ކުންފުނީގެ ހުޅަނގު މަގުން (އާ ސަހަރާއާ) އާ ދިމާއަށެވެ. އެ ސަރަހައްދުގެ މަގުތައް އޮތީ ފެންބޮޑުވެފަ އެވެ.
އެމްޑަބްލިޔޫއެސްސީގެ މެނޭޖިން ޑިރެކްޓަރު ހަސަން ޝާހު މިއަދު ވިދާޅުވީ އެއީ ޕްލާންޓެއް ފަޅައިގެން ގޮސްގެން ދިމާވި މައްސަލައެއް ނޫން ކަމަށެވެ. އެއީ ބޯހޯލުން ނަގާ ފެން، ސާފުކުރަން ޕްލާންޓަށް ދިޔުމުގެ ކުރިން ބޭރުވެފައިވާ ފެން ކަމަށް އޭނާ ވިދާޅުވި އެވެ.
"ފެން ލީކްވީ ވޭލެއްގެ މައްސަލަ ޖެހިގެން. އެކަން ވަނީ ވަގުތުން ހައްލުކޮށްފައި،" ޝާހު ވިދާޅުވި އެވެ.
މި މައްސަލައިގެ ސަބަބުން ފެނުގެ ހިދުމަތަށް އެއްވެސް ބުރޫއެއް އަރާފައި ނެތް ކަމަށް އޭނާ ވިދާޅުވި އެވެ.
