ދުނިޔޭގެ ތަރައްގީވެފައިވާ ގައުމުތަކުން އުފައްދާ ބޭސް ނުލިބުމުގެ ކަންބޮޑުވުން ޓްރީޓޮޕް ހޮސްޕިޓަލުގެ މެނޭޖިން ޑިރެކްޓަރު އަހުމަދު ނަޒީރު ފާޅުކުރައްވައިފި އެވެ.
މިއަދު އެ ހޮސްޕިޓަލުގެ ފާޓިލިޓީ ސެންޓަރު ހުޅުވުމުގެ ރަސްމިއްޔާތުގައި ނަޒީރު ވިދާޅުވީ, ބައެއް ގަވާއިދުތަކާ ގުޅިގެން ސިއްހީ ހިދުމަތް ދިނުމުގައި ގޮންޖެހުންތަކާ ކުރިމަތިވާ ކަމަށެވެ. އޭގެ މިސާލެއްގެ ގޮތުގައި ނަޒީރު ދެއްކެވީ ރާއްޖެއަށް ބޭސް އެތެރެ ކުރުމުގެ ނިޒާމެވެ.
"އަޅުގަނޑުމެން މިތަނުގައި ފެންވަރު ރަނގަޅު ހޮސްޕިޓަލް ހަދައިގެން ހިންގާއިރު, މިތަނުގައި ދޭން ޖެހެނީ ބަންގްލަދޭޝް, އިންޑިއާ, ޕާކިސްތާނުގެ ބޭސް," ނަޒީރު ވިދާޅުވި އެވެ.
އޭނާ ވިދާޅުވީ ދުނިޔޭގެ ތަރައްގީވެފައިވާ ގައުމުތަކުގައި އުފައްދާ ބޭސް ވެސް ރާއްޖޭގައި އެތެރެކޮށް ވިއްކޭނެ ނިޒާމެއް ގާއިމްވެފައި އޮންނަ ދުވަހެއް ދެކެން ބޭނުންވެވަޑައިގަންނަވާ ކަމަށެވެ. އަދި, އެކަން ހެލްތު މިނިސްޓްރީ އާއި ކަމާ ބެހޭ ފަރާތްތަކުން ކުރާނެ ކަމުގެ އުއްމީދު ބޮޑުކަން އޭނާ ފާހަގަކުރެއްވި އެވެ.
"އެ ބޭފުޅުންގެ [ހެލްތު މިނިސްޓްރީއާއި ކަމާބެހޭ ފަރާތްތައް] ވާހަކަތަކުން ވެސް ދޭހަވަނީ މިއީ ކޮންމެހެން ކުރަންޖެހިފައި އޮތް ކަމެއްގެ ގޮތުގައި," އޭނާ ވިދާޅުވި އެވެ.
ފާޓިލިޓީ ސެންޓަރު އިފްތިތާހު ކުރުމުގެ ރަސްމިއްޔާތަށްފަހު ނޫސްވެރިންނަށް މައުލޫމާތު ދެއްވަމުން ރައީސް އިބްރާހިމް މުހައްމަދު ސޯލިހު ވަނީ, ރާއްޖޭގައި ސިއްހީ ދާއިރާއަށް ބޭނުންވާ ކޮންސިއުމަބަލް އެތެރެ ކުރުމުގައި ދުވަސްވީ ބޮޑު މައްސަލަތަކެއް ހުރިކަން ފާހަގަކުރައްވާފަ އެވެ.
"ނެޓްވޯކެއް ގޮތަށް އަޅުގަނޑު ސިފަކުރާނީ. އޭގެ އެކި ލެވެލްގައި ސަރުކާރު ތެރެއިން ވެސް ގޮތް ނިންމާ މީހުންނާ ކޮންމެވެސް ވަރެއްގެ ގުޅުމެއް ނެތޭ އަޅުގަނޑު ނުދަންނަވާނަން," އެ މައްސަލަތައް ބަލައި ފިޔަވަޅު އެޅުމުގައި ގޮންޖެހުންތައް ހުރިކަން ފާހަގަކުރައްވަމުން ރައީސް ވިދާޅުވި އެވެ.
ސަރުކާރުގެ ބައެއް ގަވާއިދުތަކުގައި ހުރި ދަތި އުނދަގޫތަކުގެ ސަބަބުން ހޮސްޕިޓަލް ހިންގުމުގައި ދަތިތައް ކުރިމަތިވާކަމަށް ނަޒީރު ވިދާޅުވި ވާހަކައަށް އަލިއަޅުއްވާލައްވާ ރަސްމިއްޔާތުގައި ވާހަކަދައްކަވަމުން ރައީސް ވަނީ އެ ކަންތައްތަކަށް އެޓެންޑްވެ، އަވަސް ހައްލެއް ހޯދައިދޭނެ ކަމުގެ ޔަގީންކަން އަރުވާފަ އެވެ.
