މާލޭގައި މަރުވާ މީހުންގެ ކަށުކަމާކެމީގެ ކަންކަން މިހާރު ކުރަމުން އަންނަ އާސަހަރާ މަރާމާތުކުރުމަށް އެތަން ވަގުތީގޮތުން ބަންދުކޮށް، މާލޭގައި މަރުވާ މީހުން ހުޅުމާލޭގައި ހިނަވާ ގޮތަށް ހަމަޖައްސައިފި އެވެ.
އާސަހަރާ ހިންގަމުންދާ މާލެ ސިޓީ ކައުންސިލުން އިއްޔެ ބުނި ގޮތުގައި އާސަހަރާ މަރާމާތް ކުރުމުގެ މަސައްކަތް ފެށުމަށް ހަމަޖެހިފައިވަނީ މިއަދެށެވެ. އަދި މި މަސައްކަތްތައް ނިންމާ އާސަހަރާގައި އަލުން ހިދުމަތް ދެވޭނީ ދެ މަސް ދުވަސް ފަހުން ކަމަށް ވެސް ކައުންސިލުން ބުންޏެވެ.
އާސަހަރާ ބަންދުކޮށްފައިވާއިރު މާލެ ސަރަހައްދުގައި ދެން ކަށުކަމާކެމީގެ ކަންކަން ކުރިއަށް ގެންދިއުމަށް ހަމަޖެހިފައިވަނީ ހުޅުމާލެ ސަހަރާގަ އެވެ.
ސިޓީ ކައުންސިލުން އިތުރަށް ބުނީ މަރާމާތުގެ މަސައްކަތްތައް ކުރިއަށްދާ ދުވަސްތަކުގައި ވެސް އާ ސަހަރާ މިސްކިތުގައި ނަމާދު ކުރާނެ ކަމަށެވެ. އެގޮތުން މަސައްކަތްތައް ކުރިއަށް ގެންދާނީ ކޮންމެ ދެ ނަމާދު ދޭތެރޭގައި ކަމަށް ވެސް ކައުންސިލުން ބުނެ އެވެ.
އާސަހަރާއަށް ބަދަލުތަކެއް ނައިސް ގިނަ އަހަރުތަކެއް ވެފައިވާއިރު މިފަހަރު ގެންނަ ބަދަލުތަކުގެ ތެރޭގައި އަންހެނުންނާއި ފިރިހެނުން ނަމާދުކުރުމަށް ކަނޑައެޅިފައިވާ ޖާގަ އިތުރުކުރުމާއި އަންހެންނުނަށް ހާއްސަކޮށް ވުލޫ ކުރާނެ އިންތިޒާމު ހަމަޖެއްސުމާއި އަދި ހިތާމަވެރިި ވަގުތުގައި ސަހަރާގައި މަޑުކޮށްލައިގެން ތިބެވޭނެ ވެއިޓިން އޭރިއާއެއް ސަހަރާއަށް އިތުރުކުރެވޭނެ އެވެ.
