އެންމެ ބޮޑު އަމާޒަކީ ސިޔާސީ ހިޔާލުތަފާތުވުންތައް ހުރި ނަމަވެސް، ހަމަޖެހުމާއެކު އެކުގައި ކުރިއަށް ދެވޭނެ ގޮތްތައް ހޯދަން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
ރައީސް މިފަދައިން ވިދާޅުވީ ފ. އަތޮޅުގެ ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގައި އެ އަތޮޅު ނިލަންދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގަ އެވެ.
ރައީސްގެ ވާހަކަފުޅުގައި ވަނީ އެމަނިކުފާނު ވެރިކަމަށް ވަޑައިގެންނެވިއިރު ގައުމު އޮތް ހާލަތުގެ ހަނދާން އާ ކުރައްވައިފަ އެވެ.
"ހަމަޖެހުމެއް ނެތް، ސުލްހައެއް ނެތް، ބިރުވެރިކަމެއްގެ ތެރޭގައި ގައުމު އޮތީ، އަޅުގަނޑުމެންގެ އެންމެ މުހިންމު ކަމަކަށްވީ މުޅި ރާއްޖޭގައި ހަމަޖެހުން ގާއިމް ކުރުން، ސްޓެބިލިޓީ ގާއިމް ކުރުން،" ހަތަރު އަހަރަށް ފަހު މި ރަށަށް ވަޑައިގެންނެވި ރައީސް ސޯލިހު ވިދާޅުވި އެވެ.
ވެރިކަމުގެ ފުރަތަަމަ ދައުރު ނިމިގެން ދާއިރު، މާލެއާއި ރާއްޖޭގެ ހުރިހާ ރަށެއްގައި ވެސް ކުރިން އޮތް ހަމަނުޖެހުންތައް އެއްކޮށް ނައްތާލެވިގެން ދާނެ ކަމަށް ރައީސް ވިދާޅުވި އެވެ.
އެހެންނަމަވެސް ކުރިއަށް ވެސް ކަންކަން އެބަހުރި ކަން ފާހަގަކުރައްވައި ރައީސް ވިދާޅުވީ އަމާޒަކީ ރައްޔިތުންނަށް ބޭނުންވާ ތަރައްގީ ގެނައުމަށް އެންމެން އެކީގައި މަސައްކަތް ކުރުން ކަމަށެވެ.
"އެންމެން އެކީގައި އުޅެވޭނެ ގޮތެއް ހެދުން، ސިޔާސީ ވިސްނުން ތަފާތު ވިޔަސް އެކުގައި އުޅެވޭނެ ގޮތެއް ހޯދަން،" ރައީސް ވިދާޅުވި އެވެ.
އެކިއެކި ކަންކަމަށް މާލެއަށް ދާ ދިއުން މަދުކުރުމަށް، ރަށްރަށަށް ބޭނުންވާ ޒަރޫރޫ ބޭނުންތައް ފުއްދައިދިނުމަށް ގިނަ މަސައްކަތްތަކެއް ކުރައްވާފައިވާ ކަން ފާހަގަކުރައްވައި ރައީސް އިތުރަށް ވިދާޅުވީ އެންމެ ފުރަތަމަ ކުރަން ޖެހޭ ކަމަކީ އަަސާސީ ބޭނުންތައް ފުއްދައިދިނުން ކަމަށެވެ.
"ތަނެއްގައި ދިރިއުޅޭ ކަމަށް ވަންޏާ ކޮންމެހެން ފޯރުކޮށްދޭން ޖެހޭ ކަންކަން އެބަހުރި، ތައުލީމު ލިބެން އެބަ ޖެހޭ ދަރިންނަށް، ސިއްހީ ހިދުމަތް ލިބެން ޖެހޭ، ދަތުރުފަތުރު ކުރެވޭނެ ފަސޭހަ ގޮތެއް ހޯދައިދޭން ޖެހޭ، އުންމީދެއް އެބަ ހޯދައިދޭން ޖެހޭ،" ރައީސް ވިދާޅުވި އެވެ.
މި ވަކިވަކި މައްސަލަތައް ހައްލު ވެއްޖެނަމަ، ކުރިއަށް އަންނަ އޮތް ޖީލު ރަށުގައި ދިރިއުޅެން ވިސްނާނެ ކަމަށާއި "ތަފާތު ބޮޑު ބަދަލުތަކެއް" އަންނާނެ ކަމަށެވެ.
ރައީސް އިތުރަށް ވިދާޅުވީ ސަރުކާރުން ގެންނަމުން އަންނަ ތަރައްގީ ފެނި ސިޔާސީ ބޭފުޅުން ވެރިކަމަށް އަމާޒު ހިފާފައިވާ ކަމަށެވެ.
"ވެރިކަމާ ދިމަލަށް އަމާޒު ހިފާފައި ތިބީ އެ ބޭނުމުގައި، މި އައި ގިނަ ބަދަލު ގެންނާތީ އޭގެ ނަފާ ހޯދުމުގެ ބޭނުމުގައި، ވިސްނުމުގެ ބޭނުމުގައި ސިޔާސީ މައިދާނަށް އަލަށް ނިކުމެ ވަޑައިގެން އެބައުޅުއްވާ،" ރައީސް ވިދާޅުވި އެވެ.
އެހެންނަމަވެސް، މި ވޭތުވެދިޔަ ތަނުގައި ރާއްޖޭގެ ހުރިހާ ރަށެއް ތަރައްގީ ނުކުރެވި އޮތީ ކީއްވެތޯ ވިސްނައި، ބަލައި ފިކުރުކުރުމަށް ވެސް، ދެ ވަނަ ދައުރަކަށް ކުރިމަތިލައްވާފައިވާ ރައީސް ސޯލިހު ވިދާޅުވި އެވެ.
ފ. އަތޮޅަށް ކުރައްވާ ދެ ދުވަހުގެ ދަތުރުފުޅުގައި މި އަތޮޅުގެ ހުރިހާ ރަށަކަށް ރައީސް ވަޑައިގަންނަވާނެ އެވެ. ރައީސްގެ އަރިހުގައި ބައެއް ކެބިނެޓް މިނިސްޓަރުންނާއި މަޖިލިސް މެންބަރުން ބައިވެރިވެވަޑައިގަންނަވަ އެވެ.
