ހދ. މަކުނުދޫ ގެއެއްގައި މިރޭ އަލިފާން ރޯވެ، އެ ގެ އަނދައި ހުލިވެއްޖެ އެވެ.
އެ ރަށުން މައުލޫމާތު ދިން މީހުން ބުނި ގޮތުގައި އަލިފާން ރޯވީ "އަލްފާ" ގޭގަ އެވެ. އަލިފާން ރޯވިއިރު އެގޭގައި މީހުން ދިރިއުޅެމުން ދިޔަ އެވެ. ނަމަވެސް އެއްވެސް މީހަކަށް ގެއްލުމެއް ލިބުމުގެ ކުރިން ސަލާމަތް ކުރެވުނެ ކަމަށް އެ މީހުން ބުންޏެވެ.
މި ނޫހާ ވާހަކަ ދެއްކި އެރަށު އިބްރާހިމް ޝަރީފު ބުނީ އަލިފާނުގެ ހާދިސާ ހިނގީ މިރޭ 8:45 ހާއިރު ކަމަށެވެ. ރޯވެފައި ހުރި އަލިފާންގަނޑު ރަށުގެ ރައްޔިތުން ނުކުމެ ފެންޖަހައި ނިއްވާލެވުނީ ބައިގަޑިއެއް ހާއިރުން ކަމަށް އޭނާ ބުންޏެވެ.
"އެގޭގައި އަންހެނަކާއި ކުޑަ ކުއްޖަކާއި މުސްކުޅި ދެމަފިރިން ދިރިއުޅެމުން ދިޔަ. ނަސީބު ރަނގަޅު ކަމުން އެ އެންމެން ސަލާމަތް ކުރެވުނު. އެއްވެސް މީހަކަށް ގެއްލުމެއް ލިބިފައެއް ނެތް. އެ މީހުން މިހާރު ވަނީ އެ މީހުންގެ ދަރިންގެ ގޭގެއަށް ބަދަލުކޮށްފައި،" އަލްފާ ގޭގެ މީހުންނާ އައިލީ ގުޅުން އޮންނަ ޝަރީފު ބުންޏެވެ.
އަލިފާން ރޯވީ ގުދަނެއްގެ ގޮތުގައި ބޭނުންކުރާ ތަނުގައި ކަމަށާއި އެތަނުގައި މިލިއަނެއްހާ ރުފިޔާގެ މުދާ ހުންނާނެ ކަމަށް ވެސް އޭނާ ބުންޏެވެ.
"އެ ގުދަނުގައި ޓިނާއި ލަކުޑި އާއި 25 ހޯސްޕަވަރުގެ އައުޓު ބޯޑު އިންޖީނަކާއި ގާ އަޅާ މެޝިނަކާއި އަގުބޮޑެތި އެހެނިހެން ސާމާނު ހުންނާނެ. އެހެން މީހުންގެ އެއްޗެހި ވެސް ހުންނާނެ،" ޝަރީފު ބުންޏެވެ.
އަލިފާން ރޯވި ސަބަބެއް ނޭނގޭ ކަމަށް އޭނާ ބުންޏެވެ.
