ރާއްޖޭގައި އެންމެ ގިނަ ދުވަސްވީ އަދި އެންމެ ބޮޑު ސިޔާސީ ޕާޓީ، އެމްޑީޕީގެ ބޮޑު ދިދަ، މީހުން ދިރިއުޅޭ ހުރިހާ ރަށެއްގައި މިއަދު ހަވީރު ނަގައި، ފިހުރުވާލައިފި އެވެ.
އެމްޑީޕީގެ ޗެއާޕާސަންގެ ނައިބު އިބްރާހިމް ވަހީދު (އިބުރޭ) ވިދާޅުވީ މި ހަރަކާތުގެ ބޭނުމަކީ ރިޔާސީ އިންތިހާބަށް ޕާޓީ ވަރުގަދަކޮށް އޮތްކަމާއި މުޅި ރާއްޖޭގައި އިންތިޒާމުވެގެން ހަރަކާތްތައް އެންމެ ފުރިހަމައަށް ހިންގޭނެ ގާބިލުކަމާއި މެމްބަރުންގެ ގުޅުން ބަދަހިކަން ހާމަކޮށް ދިނުން ކަމަށެވެ.
"އަޅުގަނޑުމެންގެ ޕާޓީގެ ޖޯޝު އެބަހުރި. މުޅި ރާއްޖޭގައި އެއްފަހަރާ އެއްވަގުތެއްގައި މި ހަރަކާތް ކުރިއަށް މިގެންދިޔައީ ރިޔާސީ އިންތިހާބަށް ތައްޔާރުވުމުގެ ވެސް ގޮތުން. ކޮންމެ ރަށެއްގައި ބޮޑު ދިދައެއް ނެގިގެން ދިޔުމަކީ ވަރަށް ތާރީހީ ހަރަކާތެއް،" އޭނާ ވިދާޅުވި އެވެ.
މީހުން ދިރިއުޅޭ 187 ރަށް އޮތްއިރު، ކޮންމެ ރަށެއްގައި ވިހުރުވާލީ 15 ފޫޓު، 10 ފޫޓުގެ ދިދަ އެކެވެ.
ސެޕްޓެމްބަރު 9 ގައި ބާއްވާ ރިޔާސީ އިންތިހާބުގައި އެމްޑީޕީގެ ރިޔާސީ ޓިކެޓު ލިބިވަޑައިގެންފައިވާ، ރައީސް އިބްރާހިމް މުހައްމަދު ސޯލިހުގެ މެނިފެސްޓޯ އެކުލަވާލައި އިންތިހާބަށް ތައްޔާރުވުމަށް އެމްޑީޕީގެ 400 މަންދޫބުން އިއްޔެ ވަނީ އެކި ސަރަހައްދުތަކަށް ގޮސް ހަރަކާތްތައް ފަށައިފަ އެވެ. އެގޮތުން ދޮރުން ދޮރަށް ހިނގުމާއި ޕޯސްޓަރު ހަރުކުރުމާއި މައުލޫމާތު އެއްކުރުން ކުރިއަށް ގެންދެ އެވެ.
ރިޔާސީ ކެމްޕޭނަށް ތައްޔާރުވުމަށް ހަރަކާތްތައް ހިންގަން ފެށީ އެމްޑީޕީގެ ރައީސް މުހައްމަދު ނަޝީދު އިސްވެ ހުންނަވައި ޕާޓީއެއް އުފެއްދުމަށް މަސައްކަތް ވެސް ފަށާފައި ވަނިކޮށެވެ.
ނަޝީދު ޕާޓީއެއް އުފެއްދުމަށްޓަކައި އެ މަނިކުފާނަށް ތާއިދު ކުރައްވާ 12 މެމްބަރުން އެމްޑީޕީ ދޫކޮށްލިއިރު، އެ ޕާޓީގެ ޗެއާޕާސަން ފައްޔާޒު އިސްމާއީލް އެކަން ސިފަކުރެއްވީ "ރިހޭ ދަތެއް ވެއްޓުން" ފަދަ ކަމެއްގެ ގޮތުގަ އެވެ.
