ފެނަކައިން ކުދި ވިޔަފާރިތަކަށް ދޭން ޖެހޭ ފައިސާ ދިނުމަށާއި މެނޭޖްމަންޓު އޮޑިޓެއް ހަދަން ގޮވާލައި ރައްޔިތުންގެ މަޖިލީހަށް ހުށަހެޅި ގަރާރަކާ އެކު އެ ކުންފުނީގެ ދިފާއުގައި އެމްޑީޕީގެ ގިނަ މެމްބަރުން ތަކެއް ވާހަކަ ދައްކަވައިފި އެވެ.
ފެނަކައިން ކުދި ވިޔަފާރިތަކަށް ފައިސާ ދިނުން ލަސްކުރާ ކަމަށް ތުހުމަތުކޮޮށް އެ ކުންފުންޏާ ދެކޮޅަށް ބަޔަކު ކުރިން މުޒާހަރާ ވެސް ކުރި އެވެ. އެ ކުންފުނީގެ ދަރަނި އިންތިހާއަށް ބޮޑުވަމުން ދަނީ ކޮރަޕްޝަނުގެ ސަބަބުހން ކަމަށް ވެސް ބައެއް މީހުން ތުހުމަތުކުރެ އެވެ.
އެ ތުހުމަތުތަކާ އެކު މަޑުއްވަރީ ދާއިރާގެ ޕީއެންސީ މެމްބަރު އާދަމް ޝަރީފު މަޖިލީހަށް ހުށަހެޅުއްވި ގަރާރުގައި ސަރުކާރަށް ގޮވައިލެއްވީ ފެނަކައިގެ މެނޭޖްމަންޓު އޮޑިޓެއް ހަދައި، އެކުންފުނީގެ ދަރަނި އަދާކުރާނެ ގޮތުގެ ޕްލޭނެއް އެކުލަވައިލުމަށެވެެ.
ގަރާރު ހުށަހަޅުއްވަމުން އޭނާ ވިދާޅުވީ އާއްމު ފަރުދުންނާއި ކުންފުނިތަކަށް ދައްކަން ޖެހޭ ފައިސާ ހިމެނޭ ގޮތުން ފެނަކައިގެ ދަރަނި ގާތްގަނޑަކަށް 2.8 ބިލިޔަން ރުފިޔާއަށް އަރާ ކަަމަށާއި އެކަމުގެ ޝަކުވާ މަޖިލީހުގެ މެމްބަރުންނަށް އަންނަމުންދާ ކަމަށެވެ.
"އެ ޝަކުވާ އައުމުގެ ސަބަބުން، އިއްޒަތެރި ރައީސް، އަޅުގަނޑުމެން ހުށަހެޅީ،" އާދަމް ޝަރީފު ވިދާޅުވި އެވެ.
އެ ގަރާރަށް ބަހުސްކުރަން އެމްޑީޕީއަށް ދިން ފުރަތަމަ ފުރުސަތުގައި މަރަދޫ ދާއިރާގެ މެމްބަރު އިބްރާހީމް ޝަރީފު ވިދާޅުވީ ފެނަކައިން ފައިސާ ދޫކުރާ ގޮތާއި އެެއްބަސްވުން ހުންނަ ގޮތާއި އެ ކޯޕަރޭޝަނާ ސަޕްލަޔަރުންނާ ދެމެދު އޮންނަ ގުޅުން ފަދަ ކަންތައްތަކަށް "މަޖިލީހުން އަތްބާނަން ނުޖެހޭ" ކަމަށެވެ.
"އެއީ ވިޔަފާރި ކުންފުންޏެއް، ރައްޔިތުންނަށް ހިދުމަތްދޭ ވިޔަފާރި ކުންފުންޏެއް. އެއީ ފައިދާއަށް ހިންގާ ކުންފުންޏެއް ނޫން،" ޝަރީފު ވިދާޅުވި އެވެ.
އިހަވަންދޫ ދާއިރާގެ މެމްބަރު މުހައްމަދު ޝާފިއު ވިދާޅުވީ 2018 ގައި ގިނަ ރަށްރަށުގައި ކަރަންޓު ދިނުމުގެ ނިޒާމު އޮތީ ވަރަށް ނާޒުކު ހާލަތެއްގައި ކަމަށާއި ހާލަތު ރަނގަޅުކުރަން ފެނަކައިން ކުރަމުން އަންނަ މަސައްކަތް ބަދަލުކުރަން އުޅުމަކީ ރައްޔިތުންގެ މަޖިލީހުން ކޮށްގެން ވާނެ ކަމެއް ނޫން ކަމަށެވެ.
ފެނަކައިގެ ދަަރަނި ބޮޑުވެ، އެކަމާ ކަންބޮޑުވުން ފާޅުކުރުން އޭނާ ސިފަކުރެއްވީ ރައްޔިތުންނަށް ރަނގަަޅު ހިދުމަތެއް ދޭން ފެނަކައިން ކުރާ މަސައްކަތާ މެދު ފާޅުކުރާ ކަންބޮޑުވުމެއް ކަމަަށެވެ.
