ތައުލީމީ ގޮތުން ދިވެހިން ދަތުރު ކުރަން ބޭނުންވާ ކޮންމެ ހިސާބަކަށް ވެސް މިހާރު ދެވޭނެ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
މަތީ އަރުތަވެރިންގެ އިނާމު ދިނުމުގެ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ ކޮންމެ ކުއްޖެއްގެ ކިބައިގައި ހުރި ހުނަރުވެރިކަން އިތުރަށް ތަރައްގީކޮށް، ގައުމީ ހިދުމަތަށް ނުކުތުމަކީ ގައުމީ ވާޖިބެއް ކަމަށެވެ.
"ތަރައްގީއަކީ، ގައުމުގެ ފަރުދުންގެ އަމިއްލަ ޒާތަށް އަންނަ ޢިލްމީ ހޭލުންތެރިކަމާއި، ތަހުޒީބީ ކުރިއެރުމުގެ ޒަރީއާއިން ގައުމަށް ގެނެވޭ ބަދަލުތަކެއް،" ރައީސް ވިދާޅުވި އެވެ.
ކޮންމެ ކުއްޖަކު ވެސް މި ބަދަލު ގެންނަން މަސައްކަތް ކުރަން ޖެހޭކަން ފާހަގަކުރައްވައި ރައީސް ވިދާޅުވީ އިލްމީ ގޮތުން ގާބިލް ވުމުގެ ފުރުސަތު ކޮންމެ ކުއްޖަކަށް ވެސް އެބައޮތް ކަމަށެވެ.
"ތައުލީމީ ގޮތުން ކިތަންމެ މައްޗަށް ދަތުރުކުރަން ބޭނުންވިޔަސް، އެ ފުރުސަތު ދިވެހި ކޮންމެ ދަރިއަކަށް މި ވަގުތު އެބައޮތް، ރާއްޖެއާއި ރާއްޖެއިން ބޭރުންވެސް، އެ ފުރުސަތު މިއަދު އޮތީ ތަނަވަސްވެފައި، ތައުލީމުން އެ މީހެއްގެ ސިކުނޑި މުއްސަނދިވާ ވަރަކަށް، އެ މީހެއްގެ ފަރާތުން ގައުމަށް ކުރާ މަންފާ އިތުރުވާނެ،" ރައީސް ވިދާޅުވި އެވެ.
ރައީސް ވިދާޅުވީ ގައުމު އެދޭ ތަރައްގީގެ މަންޒިލަށް ގައުމު ގެންގޮސްދޭނެ ހެޔޮލަފާ ރަނގަޅު ޖީލެއް ބިނާކުރެވޭނީ، ޒަމާނީ ތައުލީމާއި، ތަރުބަވީ އަހުލާގުގެ މާހައުލަކަށް ސްކޫލްތައް ހަދައިގެން ކަމަށެވެ.
