"އެޖެންޑާ 19" މެނިފެސްޓޯއާ އެކު ވެރިކަން ކުރާ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ރައްޔިތުންގެ މަޖިލީހުގެ އިންތިހާބު ކާމިޔާބު ކުރުމަށް ފަހު ލިބުނު ކަމަށް އިއުލާނުކުރި "ސުޕަމެޖޯރިޓީ" އެޕާޓީއަށް މިއަދު ގެއްލިއްޖެ އެވެ.
މަޖިލިސް 19 ފެށުނު އިރު އެމްޑީޕީގެ މެމްބަރުންގެ އަދަދަކީ 65 އެވެ. އޭގެ ފަހުން ދެ މެމްބަރަކު އެޕާޓީއަށް ސޮއިކުރެއްވުމާއި ގުރައިދޫ ދާއިރާ ވެސް ލިބުމުން މަޖިލީހުގައި އެޕާޓީގެ މެމްބަރުންގެ އަދަދު 68 އަށް އެރި އެވެ.
އެމްޑީޕީގެ އަދި ރައްޔިތުންގެ މަޖިލީހުގެ ވެސް ރައީސް މުހައްމަދު ނަޝީދު އުފެއްދެވި ފިކުރެއްގެ ދިރުމުގައި އުޅުއްވާ 12 މެމްބަރަކު އެމްޑީޕީން މިއަދު ވަކިވުމުގެ އިތުރުން މެދު ހެންވޭރު ދާއިރާގެ މެމްބަރު އަލީ އާޒިމް އެމްޑީޕީން ވަކިކޮށްފައި ވާތީ މަޖިލީހުގައި އެޕާޓީގެ މެމްބަރުންގެ އަދަދަކީ މިހާރު 56 އެވެ.
އެމްޑީޕީން ވަކިވާން ނިންމި މެންބަރުން
- ރައްޔިތުންގެ މަޖިލީހުގެ ނާއިބު ރައީސް އީވާ އަބްދުﷲ
- މާފަންނު މެދު ދާއިރާގެ މެންބަރު އިބްރާހީމް ރަޝީދު
- މައްޗަންގޮޅި އުތުރު ދާއިރާގެ މެންބަރު މުހައްމަދު ރަޝީދު
- ހުޅުދޫ ދާއިރާގެ މެންބަރު އިލްޔާސް ލަބީބް
- މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ
- ވިލުފުށީ ދާއިރާގެ މެންބަރު ހަސަން އަފީފް
- ކުޅުދުއްފުށީ އުތުރު ދާއިރާގެ މެންބަރު ޔާސިރު އަބްދުއްލަތީފް
- ތޮއްޑޫ ދާއިރާގެ މެންބަރު ހަސަން ޝިޔާން
- ހެންވޭރު ހުޅަނގު ދާއިރާގެ މެންބަރު ހަސަން ލަތީފް
- މަޑަވެލި ދާއިރާގެ މެންބަރު ހުސައިން ފިރުޝާން
- އުނގޫފާރު ދާއިރާގެ މެންބަރު މުހައްމަދު ވަހީދު
- ގައްދޫ ދާއިރާގެ މެންބަރު އަހުމަދު ޒާހިރު
އެއީ މަޖިލީހުން ބައެއް ކަންތައްތައް ނިންމުމުގައި ހަމަކުރަން ޖެހޭ ތިން ބައިކުޅަ ދެބަޔަށް ވުރެ ވެސް މަދު އަދެކެވެ. މަޖިލީހުގައި ތިއްބަވަނީ 87 މެމްބަރުން ކަމަށް ވާތީ ތިންބައިކުޅަ ދެބަޔަކީ 58 އެވެ.
އެމްޑީޕީގެ އެތެރޭގައި އުފެދެމުން އައި ބައިބައިވުން ބޮޑުވެ، ފިކުރެއްގެ ދިރުމުގެ ނަމުގައި ނަޝީދު ވަކި ފެކްޝަނެއް އުފެއްދެވީ އެމްޑީޕީގެ ރިޔާސީ ޕްރައިމަރީ އެމަނިކުފާނަށް ނާކާމިޔާބުވި ހިސާބުންނެވެ.
އެމްޑީޕީން މިއަދު ވަކިވެވަޑައިގެންނެވި 12 މެމްބަރުންނާއި އިއްޔެ ވަކިކުރި އަލީ އާޒިމް ވެސް އޭރުން ފެށިގެން މަޖިލީހުގައި މަސައްކަތް ކުރައްވަމުން ގެންދެވީ އެމްޑީޕީގެ ޕާލަމެންޓްރީ ގްރޫޕްގެ ވިސްނުމާ ހިލާފަށެވެ. އެ ގްރޫޕުން ނެރޭ ވިޕްލައިންތަކާ ވެސް އެ މެމްބަރުން ގެންދެވީ ތަކުރާރުކޮށް ހިލާފުވެވަޑައިގަންނަވަމުންނެވެ.
