މެދުހެންވޭރު ދާއިރާގެ މެމްބަރު އަލީ އާޒިމުގެ އެމްޑީޕީން ވަކިކުރުމާ ގުޅިގެން، އޭނާގެ ނަން އިލެކްޝަންސް ކޮމިޝަނުން ބަލަހައްޓާ އެ ޕާޓީގެ ދަފްތަރުން އުނިކޮށް, އެކަން ރައްޔިތުންގެ މަޖިލީހަށް އަންގައިފި އެވެ.
ސަރުކާރު ހިންގާ މައި ޕާޓީން އާޒިމް ވަކިކުރީ، ފޯޅަވައްސާއި އައްޑޫއާ ދެމެދު އޮތް ކަނޑުގެ އިގުތިސޯދީ ސަރަހައްދުގެ އިން ވަކިކުރި މައްސަލާގައި އިދިކޮޅު ސިޔާސީ ޕާޓީތަކުން އުފައްދާފައިވާ "ފޯޅަވަހި ކޯލިޝަން"ގެ ބައްދަލުވުންތަކާއި ޕްރެސް ކޮންފަރެންސްގައި ބައިވެރިވެވަޑައިގެންނެވި މައްސަލަ އާއި ބަންޑާރަ ނައިބު އިބްރާހިމް ރިފްއަތުގެ އިތުބާރު ނެތްކަމުގެ މައްސަލައިގައި ސޮއިކުރެއްވުމާ ގުޅިގެން ޕީޖީ ލީޑަރު މުހައްމަދު އަސްލަމް ފޮނުއްވި މައްސަލައިގަ އެވެ.
"އަދަދު" އަށް އެނގިފައިވާ ގޮތުގައި އޭނާގެ ނަން އީސީގެ ދަފްތަރުން އުނިކޮށްފައިވާކަން މިހާރު ވަނީ ރައްޔިތުންގެ މަޖިލީހަށް އަންގައިފަ އެވެ. އެކަން އެ ކޮމިޝަނުން ވަނީ "އަދަދު"އަށް ކަށަވަރު ކޮށްދީފަ އެވެ.
އިން ވަކިކުރުމުގެ މައްސަލައިގައި އިދިކޮޅު ސިޔާސީ ޕާޓީތަކުގެ ކޯލިޝަނުގައި އެމްޑީޕީގެ "ފިކުރެއްގެ ދިރުން" ފެކްޝަނުން ބައިވެރިވެ އެވެ. އަދި, އެ ކޯލިޝަންގެ ހަރަކާތްތަކުގައި އެ ފެކްޝަންގެ ފަރާތުން އެންމެ އިސްކޮށް ހަރަކާތްތެރިވަނީ އާޒިމް އެވެ.
ނަޝީދުގެ ފެކްޝަނަށް ތާއީދުކުރައްވާ ރައްޔިތުންގެ މަޖިލީހުގެ ބައެއް މެމްބަރުންނަށް ފިޔަވަޅު އެޅުމަށް ރައީސް ސޯލިހަށް ތާއީދުކުރާ ޕާޓީގެ މެމްބަރުން ވެސް ދަނީ ގޮވާލަމުންނެވެ. އެމްޑީޕީގެ 68 މެމްބަރުން މަޖިލީހުގައި ތިއްބަވާއިރު ވާދަވެރި ފެކްޝަނުގައި ނަޝީދު ހިމެނޭހެން ގާތްގަނޑަކަށް 15 މެމްބަރުން ތިއްބަވަ އެވެ.
އާޒިމް ވަކިވި ކަން ރަސްމީކޮށް ކަނޑައެޅުމާއެކު އެމްޑީޕީގެ މެންބަރުންގެ އަދަދު 67 އަށް ވަނީ ތިރިވެފަ އެވެ.
ޕާޓީން ވަކިކުރިނަމަވެސް، އޭނާ ވަކިކޮށްފައިވާ ކަމަށް އާޒިމް ގަބޫލު ނުކުރައްވަ އެވެ. އޭނާ ވިދާޅުވި ގޮތުގައި އެކަން ކޮށްފައިވަނީ އެމްޑީޕީގެ އަސާސީ ގަވައިދާ ހިލާފަށެވެ.
އާޒިމް ވަކިކުރުމަށް ފިޔަވަޅު އަޅާ ކޮމިޓީން ނިންމައިފައިވަނީ އެއް އަހަރު ދުވަހުގެ މުއްދަތަށް ޕާޓީގެ މެންބަރުކަމުން ވަކިކޮށް، ފަސް އަހަރުގެ ތެރޭގައި ޕާޓީގެ އެއްވެސް މަގާމަކަށް އަދި ޕާޓީގެ އެއްވެސް ޕްރައިމަރީއެއްގައި ކުރިމަތި ނުލެވޭ ގޮތަށެވެ.
