މަތީ ތައުލީމު ހާސިލް ކުރުމަށް މިހާ ފަހި ދުވަސްވަރެއް ދިވެހި ތާރީހު މީގެ ކުރިން ދެކެފައިނުވާ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިރޭ ވިދާޅުވެއްޖެ އެވެ.
ރައީސުލްޖުމްހޫރިއްޔާގެ ހާއްސަ ސްކޮލަޝިޕާއި ހައި އެޗީވާސް ސްކޮލާޝިޕް ދިނުމަށް މިރޭ ބޭއްވި ހަފުލާގައި ވާހަކަ ދައްކަވަމުން ރައީސް ވިދާޅުވީ ފުރަތަމަ ޑިގްރީގެ ޕްރޮގްރާމުގެ ސަބަބުންނާއި ސްކޮލާޝިޕްތައް އިތުރު ކުރުމުން ކިޔެވުމުގެ ފުރުސަތު ވަރަށް ބޮޑަށް ހުޅުވިގެންގޮސްފައިވާ ކަމަށެވެ.
"ރާއްޖޭގެ ރަސްމީ ތައުލީމުގެ މުޅި ތާރީހަށް ބަލާއިރުވެސް، މަތީ ތައުލީމު ހާސިލުކުރުމަށް މީގެ ކުރިން ދުވަހަކުވެސް ފަހިވެފައި ނެތްހާ ގިނަ ފުރުސަތުތައް މިހާރު އެބަ އޮތް. އަދި މިއިން ޒަމާނަކުވެސް، ބޭރު ގައުމުތަކުން ސްކޮލާޝިޕް ނުލިބޭ މިންވަރަށް، އަދި ނުލިބޭ އެތައް ދާއިރާއަކުން، ދިވެހި ދަރިވަރުންނަށް ބޭރު ގައުމުތަކުން މިހާރު ސްކޮލާޝިޕްގެ ފުރުސަތު ލިބޭނެ،" ރައީސް ސޯލިހު ވިދާޅުވި އެވެ.
ރައީސް ވިދާޅުވީ އެމަނިކުފާނުގެ އެންމެ ބޮޑު އެއް އަމާޒަކަށް ހެއްދެވީ މާލީ ތަނަވަސްކަން ނެތް ކުދިންނަށް ވެސް މަތީ ތައުލީމު ހާސިލް ކުރެވޭނެ މަގު ތަނަވަސްކޮށް ކުރިން އޮތް ހުރަސް ނައްތާލަން ކަމަށެވެ.
"ފުދުންތެރިކަން ނެތް އާއިލާތަކުގެ ދަރިވަރުން މަތީ ސާނަވީގައި ރަނގަޅު ނަތީޖާ ހޯދިޔަސް، އިތުރަށް ކިޔެވުމުގެ ފުރުސަތު، މީގެ ކުރިން އޮތީ އެހާ ތަނަވަސް ގޮތަކަށް ނޫން. އަޅުގަނޑުމެންގެ ފުރަތަމަ އަމާޒަކަށް ހެދީ އެ ތަފާތުތައް ނައްތައިލުން. މިއަދު ދިވެހި ކޮންމެ ދަރިވަރަކަށް އެ ފުރުސަތު އެބަ އޮތް. އަޅުގަނޑުމެން ތައާރަފްކުރި ހިލޭ ޑިގްރީ ޕްރޮގްރާމަކީ، ދަރިންނަށް މަތީ ތައުލީމު ދިނުމަށް ރާއްޖޭގައި މިހާތަނަށް ފެށި އެންމެ ބޭނުންތެރި ޕްރޮގްރާމް،" އެމަނިކުފާނު ވިދާޅުވި އެވެ.
ރައީސް ވިދާޅުވީ ފުރަތަަމަ ޑިގްރީ ޕްރޮގްރާމަށް ސަރުކާރުން 567 މިލިއަން ރުފިޔާ ހަރަދުކޮށްފައިވާއިރު 17،000 އަށްވުރެ ގިނަ ދަރިވަރުންނަށް އޭގެ ދަށުން ކިޔެވުމުގެ ފުރުސަތު ލިބިފައިވާ ކަމަށެވެ. އަދި ރާއްޖެއިން ބޭރުގައި ކިޔެވުމަށް 418 ދަރިވަރަކަށް ފުރުސަތު ދިންއިރު އެ ސްކޮލާޝިޕްތައް ދިނުމަށް 528 މިލިއަން ސަރުކާރުން ހަރަދުކޮށްފައިވާ ކަމަށް ރައީސް ވިދާޅުވި އެވެ.
"މިފަދަ ފުރުސަތުތައް ފަހިކޮށްދީގެން އަޅުގަނޑުމެން މަސައްކަތް މި ކުރަނީ، ދިވެހި ދަރިންގެ ސިކުނޑިތައް ޒަމާނީ ތައުލީމުން ތަރައްގީކުރަން. ސްކޮލަޝިޕްތަކާއި ލޯން ސްކީމްތަކާއި އެވޯޑްތަކުގެ ހަގީގީ މަގްސަދަކީ އެއީ،" ރައީސް ސޯލިހު ވިދާޅުވި އެވެ.
މިރޭގެ ހަފުލާގައި 155 ދަރިވަރަކަށް ސްކޮލާޝިޕް ލިބުނެވެ. އޭގެ ތެރެއިން 102 ދަރިވަރުންނަކީ އަންހެން ކުދިންނެވެ.
