ރައީސް އިބްރާހީމް މުހައްމަދު ސޯލިހުގެ އިސްތަށިފުޅުގައި ވައްކަމުގެ ތުހުމަތު އަޅުވައި ޓްވީޓް ކުރެއްވި މައްސަލާގައި އެންވަޔަރަމެންޓް މިނިސްޓްރީގެ ސްޓޭޓް މިނިސްޓަރު ހަސަން މުޣުނީއާ ރައީސް އޮފީހުން ވާހަކަ ދައްކައި ނަސޭހަތް ދީފި އެވެ.
މުޣުނީގެ ޓްވިޓާ އެކައުންޓުން ކުރެއްވި ޓްވީޓެއްގައި ވަނީ "ހިންނަވަރު ވަގު އިބްރާހީމް ލީޑްކުރަނީ ކުންފުންޏެއް ހިންގުމުގެ އެއްވެސް ގާބިލްކަމެއް ނެތް ކޮރަޕްޓް ވަގު މީހުންގެ ޓީމަކާއެކީ" ކަމަށެވެ. އެގޮތުން, ސަރުކާރު ބައެއް ކުންފުނިތަކުގެ މެނޭޖިން ޑިރެކްޓަރުންނަށް އެ ތުހުމަތު އަޅުއްވާފައިވެ އެވެ.
ރައީސް ސޯލިހުގެ ސަރުކާރުގައި އެންމެ ފުރަތަމަ ސްޓެލްކޯގެ މެނޭޖިން ޑިރެކްޓަރުގެ މަގާމު ފުރުއްވުމަށް ފަހު، ފަހުން އެންވަޔަރަމަންޓް މިނިސްޓްރީގެ ސްޓޭޓް މިނިސްޓަރުގެ މަގާމަށް ބަދަލުކުރެއްވި މުޣުނީގެ ވަނީ އެ ޓްވީޓު ޑިލީޓު ކުރައްވައިފަ އެވެ.
ޖުމްހޫރީ ޕާޓީގެ ސްލޮޓެއްގައި ހުންނެވި މުޣުނީގެ އެކައުންޓް ކުރެއްވި ޓްވީޓަކަށްވި ނަމަވެސް އެއީ, އޭނާ ކުރެއްވި ޓްވީޓެއް ކަމަށް އޭނާ އިންކާރު ކުރައްވަ އެވެ.
ރައީސް އޮފީހުގެ މިނިސްޓަރު އިބްރާހީމް ވަހީދު "އަދަދު" ނޫހަށް ވިދާޅުވީ އެ ޓްވީޓަކީ އޭނާގެ އެކައުންޓުން ކުރައްވާފައިވާ ޓްވީޓަކަށް ވާތީވެ ކަން ހިނގައިދިޔަ ގޮތް ސާފު ކުރުމުގެ ގޮތުން އޭނާއާ ބައްދަލުކުރައްވައި ވާހަކަ ދައްކަވާފައިވާ ކަމަށެވެ. ނަމަވެސް, ފިޔަވަޅެއް އެޅުމަށް އަދި ނުނިންމަ އެވެ.
"ސިޔާސީ މަގާމުތަކުގައި ތިއްބަވާ ބޭފުޅުން ބަހައްޓަވަން ޖެހޭ އަހުލާގީ މިންގަނޑާ ހިލާފު ޓްވީޓެއް އެއީ، އެހެންވެގެން އެ ކަމެއް ހިނގައިދިޔަ ގޮތެއް ސާފުކުރަން ވެގެން އަޅުގަނޑުމެން މުޣުނީއާ ވާހަކަ ދެއްކީ، ފިޔަވަޅެއް އަޅާނީތޯ ނޫނީ ނާޅާނީތޯ ވެސް އަދި ނުނިންމަން،" އިބްރާހީމް ވަހީދު ވިދާޅުވި އެވެ.
ރައީސް ސޯލިހުގެ ރިޔާސީ ދައުރު ނިމެންދެން ސަރުކާރުގައި ދެމިއޮންނަން ޖުމްހޫރީ ޕާޓީން ނިންމާފައި ވިޔަސް، ސަރުކާރުގެ ބައެއް ސިޔާސަތުތަކާ މެދު ހިތްހަމަނުޖެހޭތީ މި އަހަރުގެ ސެޕްޓެމްބަރު މަހުގެ ނުވަވަނަ ދުވަހު އޮންނަ ރިޔާސީ އިންތިހާބުގައި ވެސް ވަކިން ވާދަކުރުމަށް އެ ޕާޓީން ނިންމާފައިވެ އެވެ.
