އެސްޓީއޯގެ މައި ފިހާރަ، އެސްޓީއޯ ޕީޕަލްސް ޗޮއިސް އިން ވިޔަފާރިކުރާ ފަރާތްތަކަށް އުރީދޫގެ އެމްފައިސާ ބޭނުންކޮށްގެން ފައިސާ ދެއްކޭނެ ގޮތް ހަމަޖައްސައިފި އެވެ.
އެސްޓީއޯ ޕީޕަލްސް ޗޮއިސްގައި ބޭއްވި ހަފުލާއެއްގައި އެ ހިދުމަތް ރަސްމީކޮށް އިފްތިތާހުކޮށްދެއްވީ އެސްޓީއޯގެ މެނޭޖިން ޑިރެކްޓަރު އަބްދުﷲ ސައީދު އަދި އުރިދޫ މޯލްޑިވްސްގެ ސީއީއޯ ހާލިދު އަލް ހަމާދީ އެވެ.
މިކަމާ ގުޅިގެން އުރީދޫ މޯލްޑިވްސްގެ މެނޭޖިން ޑިރެކްޓަރުކަން ވެސް ކުރައްވާ އަލް ހަމާދީ ވިދާޅުވީ އެސްޓީއޯ އާ ގުޅިގެން ވިޔަފާރިވެރިން ޕޭމަންޓު ހެދުމަށް ޒަމާނީ ހައްލެއް ހޯދައިދެވުމަކީ ލިބޭ އުފަލެއް ކަމަށެވެ.
"އެސްޓީއޯ އާ ގުޅިގެން މި ފެށިގެންދިޔަ މަސައްކަތުން ފެނިގެންދަނީ އުރީދޫއިން ކަސްޓަމަރުންނާ ރައްޓެހި، ރައްކާތެރި އަދި ޒަމާނީ ހައްލުތައް ހޯދުމަށް ދޭ އަހަންމިއްޔަތުކަން،" އޭނާ ވިދާޅުވި އެވެ.
އެމްފައިސާ އަކީ އުރީދޫ މޯލްޑިވްސްގެ އެޕްލިކޭޝަން މެދުވެރިކޮށް އޮންލައިން ޕޭމަންޓުތައް ހެދުމަށް ބޭނުންކުރާ ގޭޓްވޭ އެކެވެ. މިހާރު ވެސް އޫރިދޫގެ ހިދުމަތްތަކުގެ އިތުރުން، ގިނަ ވިޔަފާރިތަކުން ހޯދާ ހިދުމަތްތަކަށް ވެސް އެމްފައިސާ މެދުވެރިކޮށް ޕޭމަންޓު ހެދެ އެވެ.
