ސެޕްޓެމްބަރު މަހު ބާއްވާ ރިޔާސީ އިންތިހާބުގައި އެކަނި ވާދަކުރައްވަން ޖެހިވަޑައިގެންނެވި ނަމަވެސް ޖުމްހުރީ ޕާޓީގެ ލީޑަރު އަދި އެ ޕާޓީގެ ރިޔާސީ ކެންޑިޑޭޓު ގާސިމް އިބްރާހިމް ވާދަކުރައްވާނެ ކަމުގެ ޔަގީންކަން އިއްޔެ ދެއްވާފައިވާ ކަމަށް އެ ޕާޓީގެ ޑެޕިއުޓީ ލީޑަރު އަމީން އިބްރާހިމް ވިދާޅުވެއްޖެ އެވެ.
ގާސިމްގެ އެޑްވައިޒަރެއްގެ ގޮތުންވެސް މަސައްކަތް ކުރައްވާ އަމީން ރޭ ވިދާޅުވީ، ރިޔާސީ ޓިކެޓު ހަވާލުކުރި ނަމަވެސް ގާސިމް ރިޔާސީ އިންތިހާބުގައި ވާދަކުރައްވާނެތޯ ސުވާލު އުފައްދާ ބައެއް މީޑިއާތަކުންވެސް ރިޕޯޓުކޮށްފައިވާ ކަމަށެވެ. އަދި, އެއީ އެ ޕާޓީއިން ރިޔާސީ ކެމްޕޭނު އަދި ނުފެށުމާއި ސިޔާސީ ދެކޮޅުވެރިން ފަތުރާ އަޑުތަކުގެ ސަބަބުން ދެކެވޭ ވާހަކަތަކެއް ކަމަށްވެސް އަމީން ވަނީ ވިދާޅުވެފަ އެވެ.
"ބައެއް ބޭފުޅުންނަށް އަޅުގަނޑުމެންގެ ތެރޭގެ އިންތިޒާމުތައް ތަރުތީބުވަމުންދާ ގޮތުގެ ތަފުސީލުތަކެއް މާބޮޑަކަށް އިނގިވަޑައެއް ނުގަންނަވާ، އެއީ އެއްބައި، އަނެއް ބަޔަކީ މިކަމަށް ޝައްކު އުފައްދަވަން ބޭނުންވާ ފަރާތްތަކުން ކުރައްވާ މަސައްކަތް,"
އަމީން ވިދާޅުވީ އެ ފަރާތްތަކުގެ އަމާޒަކީ ޖޭޕީއާ ގުޅެން ތިބި ފަރާތްތަކާއި ތާއީދުކުރާ ފަރާތްތައް އެ ޕާޓީއާ ދުރަށް ޖެއްސުން ކަމަށެވެ.
"[އިންތިހާބުގައި ވާދަކުރައްވާނެ ކަމުގެ] ކަށަވަރުކަން އަޅުގަނޑުމެންގެ ލީޑަރު މިއަދު އެ ދެއްވީ، ހޮނަރަބަލް ގާސިމް އިބްރާހިމް ވަރަށް ސާފުކޮށް އެ ވިދާޅުވީ ތިމަންނަ [ރިޔާސީ] ރޭހުގައި ހުންނަވާނަމޭ، ތިމަންނަ އެކަނި ހުންނަން ޖެހުނަސް މިފަހަރުގެ ރިޔާސީ ރޭހުން ފެންނާނެއޭ," އަމީން ވިދާޅުވި އެވެ.
ގާސިމްގެ ރިޔާސީ ދަތުރު
މި އަހަރުގެ ރިޔާސީ އިންތިހާބުގައި އެމްޑީޕީގެ ރައީސް އިބްރާހިމް މުހައްމަދު ސޯލިހު އެކުގައި ކުރިއަށް ދިއުމަށް އެދިވަޑައިގެންފައި ވަނިކޮށް ޖޭޕީން ވަކިން ވާދަކުރަން ނިންމީ މާޗު 14 ގަ އެވެ. އެގޮތަށް އެ ޕާޓީއިން ނިންމީ ރައީސް, ގާސިމްއާ ބައްދަލު ކުރައްވާފައި ވަނިކޮށެވެ.
އެއާކު ސަރުކާރުގެ އިސް މަގާމުތަކުގައި ތިބި ބައެއް ބޭފުޅުން ވަނީ ޕާޓީއާ ދުރަށް ޖެހުމަށް ނިންމާ ގާސިމަށް ތާއިދުނުކުރާކަން ހާމަކޮށްފަ އެވެ.
އެގޮތުން, އެންމެ ފުރަތަމަ ޕާޓީއާ ދުރަށް ޖެހި އިސްތިއުފާދެއްވީ ރައީސް އޮފީހުގެ މިނިސްޓަރު އަހުމަދު ސަމީރެވެ. އޭނާ ވިދާޅުވީ ގާސިމަށް ރިޔާސީ އިންތިހާބު ކާމިޔާބުވާތަން ނުފެންނަ ކަމަށެވެ. އެއަށްފަހު އިމިގްރޭޝަން ކޮންޓްރޯލާ މުހައްމަދު އަހްމަދު (ހަނަފީ) އާއި އިސްދޫ ދާއިރާގެ މެމްބަރު އަލީ ހަމީދު ވެސް ވަނީ ޕާޓީ ދޫކުރެއްވި އެވެ. އޭގެއިތުރުންވެސް, ޖޭޕީގެ ތެރޭގައި ތިއްބެވި ރައީސް ސޯލިހަށް ތާއީދުކުރައްވާ ގިނަ ބޭފުޅުން ވަނީ ޕާޓީއާ ދުރަށް ޖެހިފަ އެވެ.
ނަމަވެސް، ޖެޕީން ވަނީ ރިޔާސީ ކެންޑިޑޭޓެއް ކަނޑައެޅުމަށް ޕްރައިމަރީއަށް ހުޅުވާލާ ރިޔާސީ އިންތިހާބުގެ ތައްޔާރީތައް ކުރިއަށް ގެންގޮސްފަ އެވެ. ރިޔާސީ ޓިކެޓު ގާސިމަށް ލިބުނީ ޕްރައިމަރީގައި ގާސިމްއާ ވާދަކުރާނެ އިތުރު ފަރާތެއް ނެތުމުންނެވެ.
އެއަށްފަހު ޖޭޕީއިން ވަނީ އެހެން ޕާޓީތަކާއެކު ރިޔާސީ އިންތިހާބަށް އެކުގައި ވާދަކުރުމަށް މަޝްވަރާތައް ވެސް ފަށާފަ އެވެ. އެގޮތުން, ކުރީގެ ރައީސް މައުމޫނުގެ އެމްއާރުއެމް އަދި އަދާލަތު ޕާޓީއާއެކު ވެސް މަޝްވަރާތައް ބޭއްވި އެވެ.
އަދާލަތުން ރައީސް ސޯލިހާއެކު ކުރިއަށް ދިއުމަށް ނިންމި އިރު އެމްއާރުއެމްއިން އަދިވެސް ވަކި ގޮތެއް ނުނިންމަ އެވެ. ނަމަވެސް, މަންޒަރު ފެންނަގޮތުން އެމްއާރުއެމްގެ ތާއިދު ރައީސް ސޯލިހަށް ނުލިބޭނެ ކަމަށް ބެލެވެ އެވެ.
ޖެނުއަރީ މަހު ބޭއްވި އެމްޑީޕީގެ ރިޔާސީ ޕްރައިމަރީ ނާކާމިޔާބުވި އެ ޕާޓީގެ ރައީސް މުހައްމަދު ނަޝީދު ޕާޓީގެ ތެރޭގައި އުފައްދަވާފައިވާ ގޮފި، ފިކުރެއްގެ ދިރުމާ އެކުވެސް ޖޭޕީއިން ވަނީ މަޝްވަރާކޮށް އެކުގައި މަސައްކަތް ކުރުމަށް ނިންމާފަ އެވެ. އަދި, މަޖިލީހުގެ ތެރެއިން އެކުގައި މަސައްކަތް ކުރުމަށާއި ރިޔާސީ އިންތިހާބަށް މެނިފެސްޓޯއެއް ހެދުމުގެ މަސައްކަތް މިހާރު ވަނީ ފައްޓާފަ އެވެ.
ޖޭޕީން ރިޔާސީ ރޭހަށް ވަކިން ވާދަކުރުމަށް ނިންމުމާ އެކު ރައީސް ސޯލިހު ވެސް ވަނީ ވަރުގަދަ ރައްދުތަކެއް ދެއްވާފަ އެވެ. އެމަނިކުފާނު މާޗު 21 ގައި ވިދާޅުވީ މިހާރު ވެރިކަންކުރާ ކޯލިޝަނުގައި ހިމެނޭ ޕާޓީތަކުން ކުރިއަށް އޮތް ރިޔާސީ އިންތިހާބާ ހަމައަށް އެކުގައި ސަރުކާރާ އެކު ނުތިބެވޭނަމަ ކޯލިޝަން އެއްބަސްވުން ނިމުމަކަށް ގެންނަން ޖެހޭ ކަމަށެވެ.
"އަޅުގަނޑުމެން އެގްރީމެންޓެއް އެބައޮތް ދައުރު ނިމެންދެން އެކުގައި މަސައްކަތް ކުރުމަށް، އެއީ އަކުރުން އަކުރަށް މާނަކުރީމަ އޮތްގޮތް، އެހެން ނަމަވެސް، ކުރިއަށް އޮތް ރިޔާސީ އިންތިހާބަށް ކުރިއަށް ދާއިރު އަޅުގަނޑުމެންނަށް އެކީގަ ނުތިބެވޭ ކަމަށް ވަންޏާ، އަޅުގަނޑު ގަބޫލުކުރާ ގޮތުގައި އެއޮތީ އެ އެގްރީމެންޓު ނިމުމަކާ ހިސާބަށް ގެންނަން ޖެހިފައި."
ރައީސް އެ ދުވަހު މިހެން ވިދާޅުވި ނަމަވެސް އަދިވެސް ސަރުކާރުގައި ތިބި ޖޭޕީގެ މެންބަރުންނާމެދު ފިޔަވަޅެއް އަޅާފައި ނުވެ އެވެ. ސަރުކާރުން މިއަދާ ހަމައަށް ބުނަމުން ދިޔައީ ރަސްމީކޮށް ކެންޑިޑޭޓެއް ކަނޑައަޅާ ރިޔާސީ ކެމްޕޭނު ނުފަށާތީ ފިޔަވަޅު ނާޅަނީ ކަމަށެވެ.
