މިދިޔަ އަހަރުން ފެށިގެން މި އަހަރުގެ ނިމިދިޔަ މަހުގެ ނިޔަލަށް، ދައުލަތުގެ އިދާރާތަކުން މައުލޫމާތު ނުދީގެން އައިސްފައިވާ ޝަކުވާތަކުގެ އަދަދު މީގެ ކުރީ ހަތް އަހަރުގެ ޖުމްލަ އަދަދަށް ވުރެ ވެސް ގިނަ ކަމަށް އިންފޮމޭޝަން ކޮމިޝަނަރު އާހިދު ރަޝީދު ވިދާޅުވެއްޖެ އެވެ.
މީޑިއާ ކައުންސިލާއި ބްރޯޑްކާސްޓިން ކޮމިޝަނާއި ދިވެހި ނޫސްވެރިންގެ ޖަމިއްޔާ ގުޅިގެން ބައިނަލްއަގްވާމީ ނޫސްވެރިކަމުގެ މިނިވަންކަމުގެ ދުވަހު ބޭއްވި "ނޫސްވެރިންގެ ސައްލާ" ޕްރޮގްރާމެއްގައި ބައިވެރިވެވަޑައިގެން އާހިދު ވަނީ މައުލޫމާތު ހިފެހެއްޓުމުގެ ސަގަފާތެއް އުފެދޭ ކަމަށް ވިދާޅުވެ ކަންބޮޑުވުން ފާޅުކުރައްވައިފަ އެވެ.
މައުލޫމާތު ހޯދުމާއި ލިބިގަތުމުގެ ގާނޫނު ވުޖޫދަށް އައީ 2014 ވަނަ އަހަރު އެވެ. އެ ގާނޫނުން އުފައްދާއިވާ އިންފޮމޭޝަން ކޮމިޝަނަރުގެ އޮފީސް (އައިކޮމް) އަށް ފުރަތަމަ ހަތް އަހަރު ލިބިފައިވާ ޝަކުވާތަކުގެ ޖުމުލަ އަދަދަށް ވުރެ މިދިޔަ 16 މަހު ލިބުނު ޝަކުވާތައް ގިނަ ކަން އާހިދު ފާހަގަ ކުރެއްވި އެވެ.
"ފާހަގަވޭ، މިދިޔަ އަހަރުން ފެށިގެން، 2022 އިން، އިދާރާތަކުން މައުލޫމާތު ނުދީގެން އަޅުގަނޑާ ހަމައަށް ޝަކުވާ އައިސްފައި ހުރި މިންވަރަކީ އޭގެ ކުރީ ހަތް އަހަރަށް ވުރެ ގިނަ، 16 މަހުގެ ވާހަކަ މި ދައްކަނީ، ލިބުނު ޝަކުވާތައް ގިނަ ވެއްޖެއޭ ކުރީ ހަތް އަހަރަށް ވުރެ،" އާހިދު ވިދާޅުވި އެވެ.
ޝަކުވާތައް އިތުރުވި އެއް ސަބަބަކީ މައުލޫމާތަށް އެދޭ މިންވަރު ވެސް އިތުރުވުމެވެ. ނަމަވެސް މައުލޫމާތަށް އެދޭ މިންވަރު އިތުރުވެފައިވާ ރޭޓަށް ވުރެ ވެސް، މައުލޫމާތު ނުދީގެން ޝަކުވާ ހުށަހަޅާ މިންވަރު އިތުރުވެފައިވާ ރޭޓު މާ ބޮޑުކަން އާހިދު ފާހަގަ ކުރެއްވި އެވެ.
"ނޫސްވެރިން ވެސް، އާންމުންގެ ފަރާތްތަކުން ވެސް، ޖަމިއްޔާ ޖަމާއަތްތަކުން ވެސް މައުލޫމާތު އެދޭ މިންވަރު ވެސް އެބަ އިތުރުވޭ، އެހެން އެ ކަން ވިޔަކަސް، އެ އެދޭ މިންވަރު އިތުރުވާ ރޭޓަށް ވުރެ ބޮޑަށް ޝަކުވާތައް އަންނަ ވަރުގެ ރޭޓު މާ ބޮޑަށް ވެސް އިތުރު،" އާހިދު ވިދާޅުވި އެވެ.
ތަފާސްހިސާބުތަކަށް ބެލުމުން އެއަށް ވުރެ ވެސް އާހިދު ކަންބޮޑުވާ ކަމަކީ އެ ޝަކުވާތަކުގެ ތެރޭގައި، އެއްވެސް ޖަވާބެއް ނުލިބިގެން އަންނަ ޝަކުވާ ގިނަވުމެވެ. ޝަކުވާތަކުގެ 80 ޕަސެންޓް ޝަކުވާއަކީ އެއްވެސް ވަރަކަށް "އަޅާ ނުލައިގެން" އަންނަ ޝަކުވާތަކެވެ.
"އެދޭ މައުލޫމާތުން ވަކިވަރެއް ދީފައި ހިފަހައްޓައިގެނެއް ވެސް ނޫން، އަދި މައުލޫމާތު ނުދެވޭނެއޭ ބުނަނީކީ ވެސް ނޫން، އެއް ގޮތަކަށް ވެސް ޖަވާބެއް ނުދީގެން، އަޅައިވެސް ނުލައިގެން، އަޅުގަނޑުމެންނާ ހަމައަށް އަންނަނީ،" އާހިދު ވިދާޅުވި އެވެ.
މައުލޫމާތު ހޯދުމަށް އެދުމުން އިދާރާތަކުން އެއްވެސް ވަރަކަށް "އަޅާނުލުން"، އާހިދު ސިފަކުރެއްވީ ގާނޫނު ނުހިނގުމުގެ ނިޝާންތަކެއް އުފެދިގެން އައުމުގެ ގޮތުގަ އެވެ.
"މި ގާނޫނަކީ ވަރަށް ރަނގަޅު ގާނޫނެއް، އަޅުގަނޑުމެން ވަރަށް ގިނައިން އެހެން ގާނޫނުތަކަށް ވެސް ބުނާ އެއްޗެއް، ކަރުދާހުގައި ކިތަންމެ ރީތިކޮށް ލިޔެވިފައި އޮތަސް އެ ގާނޫނު ނުހިންގޭ ކަމަށް ވަންޏާ ވަރަށް ބޭކާރު އެއްޗެކޭ، އެ ކަހަލަ ނިޝާންތަކެއް މި ފެންނަން ފަށަނީ،" އާހިދު ވިދާޅުވި އެވެ.
މައުލޫމާތު ނުދީގެން ދައުވާ ކުރަން ބަލާއިރު ތަހުގީގު ހިންގުމުގެ ބާރު ކޮމިޝަނަކަށް ނޯވެ އެވެ. ތަހުގީގު ކުރަން ޖެހޭ ނަމަ، ފުލުސް އޮފީހަށް ފޮނުވަނީ އެވެ. ގުޅިގެން ތަހުގީގުތައް ހިންގުމަށްޓަކައި ފުލުހުންނާއި ޕްރޮސެކިއުޓާ ޖެނެރަލްގެ އޮފީސް ގުޅިގެން މަސައްކަތްތަކެއް ކުރަމުން އަންނަ ކަން އާހިދު ފާހަގަ ކުރެއްވި އެވެ.
