ސިއްހަތަށް ނުރައްކާވާ ދެ މާއްދާއެއް ހިމެނޭތީ, އިންޑިއާގެ އިތުރު ކޯފް ސިރަޕެއް ބޭނުން ނުކުރުމަށް އަންގައިފި އެވެ.
ދުނިޔޭގެ ސިއްހަތު ޖަމްއިއްޔާއިން ނެރުނު އެލާޓަކާ ގުޅިގެން ރާއްޖޭގެ ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން މިއަދު ބުނީ "ގުއައިފެނެސިން ސިރަޕް" ބޭނުން ނުކުރުމަށް އިލްތިމާސްކޮށްފަ އެވެ.
މީގެ ކުރިން ވެސް ޑަބްލިއުއެޗްއޯއިން ވަނީ އިންޑިއާގެ ކުންފުނިތަކުން އުފެއްދި ބައެއް ކޯފް ސިރަޕްތައް ބޭނުން ނުކުރުމަށް އިލްތިމާސްކޮށް އެލާޓް ނެރެފަ އެވެ. އެއީ, އޭގައި ސިއްހަތަށް ނުރައްކާވާ ދެ މާއްދާ ކަމަށްވާ "ޑައިއެތިލީން ގްލައިކޯލް" އަދި "އެތިލީން ގްލައިކޯލް" ވަރަށް ގިނައިން ހުރުމުންނެވެ.
"ޑައިއެތިލީން ގްލައިކޯލް" އަދި "އެތިލީން ގްލައިކޯލް" އަކީ އިންސާނުންނަށް ވިހަ ދެ މާއްދާ އެވެ. ހަށިގަނޑަށް އެތެރެވެއްޖެ ނަމަ އޭގެން މަރުވުމުގެ ފުރުސަތު ބޮޑެވެ.
މިފަހަރު އެލާޓް ނެރުނު "ގުއައިފެނެސިން ސިރަޕް" ބޭނުން ނުކުރަން އެންގީ ވެސް އެ ދެ މާއްދާ ހިމެނިފައިވާތީ އެވެ. މިއީ އިންޑިއާ ޕަންޖާބުގެ ކުންފުންޏެއް ކަމަށްވާ ފާމަޗެމް ލިމިޓެޑް ކުންފުނީގެ އުފެއްދުމެކެވެ.
"ގުއަފެނެސިން ސިރަޕް" ބޭނުން ނުކުރުމަށް އެމްއެފްޑީއޭއިން ލަފާ ދީފައިވާއިރު, މިއީ ރާއްޖެއަށް އިމްޕޯޓްކޮށް, ވިއްކުމަށް ހުއްދަ ކުރާ ބޭހުގެ ލިސްޓުގައި ހިމެނޭ ބޭހެއް ނޫނެވެ. ނަމަވެސް, ބޭސް ސިޓީއަށް ނުވަތަ އެ ނޫންވެސް ގޮތަކުން މި ބޭސް ރާއްޖެއަށް އިމްޕޯޓް ވުމުގެ ފުރުސަތު އެބަ އޮތެވެ.
މިފަދަ ބޭސްތަކުގެ ސަބަބުން, ބޭސް ސިޓީއަސް ރާއްޖެއަށް އިމްޕޯޓް ކުރާ ބޭސް ހާއްސަ ސަމާލުކަމެއް ދީގެން ޕޯޓްތަކުގައި ދަނީ ބަލައި ފާސްކުރަމުންނެެވެ.
