ކުރިއަށް އޮތް ރިޔާސީ އިންތިހާބުގެ ކުރިން އިންޑަސްޓްރިއަލް ރިލޭޝަން ބިލް ރައްޔިތުންގެ މަޖިލިހުން ފާސްކޮށްދިނުމަށް މޯލްޑިވްސް ޓްރޭޑް ޔުނިއަން ކޮންގްރެސް (އެމްޓީޔޫސީ) އިން ގޮވާލައިފި އެވެ.
ރާއްޖޭގެ މަސައްކަތްތެރިންގެ ޔުނިއަންތައް ބައިވެރިވާ ޔުނިއަން ކޮންގްރެސް އިން ނެރުނު ބަޔާނެއްގައި ބުނީ، ޔުނިއަން ހެދުމުގެ އިޖުރާއަތްތައް ހިމެނޭ ގާނޫނީ އޮނިގަނޑެއް ރާއްޖޭގައި ނެތުމުން، ޝަރުއީ ނިޒާމު ވެސް އެ ހައްގާ ބީރައްޓެހިކަމުގެ އިހުސާސް ޔުނިއަންތަކަށް ކުރެވިފައިވާ ކަމަށެވެ.
އެފަދަ އިޖުރާއަތްތަކާއި އޭގެ ހައްގު ކަށަވަރު ކުރެވޭނެ ގޮތަށް ސިނާއީ ގުޅުންތައް ނުވަތަ އިންޑަސްޓްރިއަލް ރިލޭޝަންސްގެ ބިލެއް ސަރުކާރުން ރައްޔިތުންގެ މަޖިލީހަށް ހުށަހަޅާފައިވާތީ، އެ ކަމަށް ސަރުކާރަށް ވަރަށް ބޮޑަށް ޔޫނިއަންގެ ފަރާތުން މަރުހަބާ ދަންނަވާ ކަމަށް ވެސް އެ ބަޔާނުގައިވެ އެވެ.
"އަދި ސަރުކާރުން ހުށަހަޅާފައިވާ ބިލަށް ބޮޑެތި ބަދަލުތަކެއް ނުގެނެސް، މަސައްކަތްތެރިންގެ މަޝްވަރާއާއެކު، ވީހާ ވެސް އަވަހަށް، ރިޔާސީ އިންތިހާބުގެ ކުރިން މި ބިލް ފާސްކޮށްދިނުމަށް ރައްޔިތުންގެ މަޖިލީހަށް މި ފުރުސަތުގައި ގޮވާލަމެވެ." އެމްޓީޔޫސީގެ ބަޔާނުގައިވެ އެވެ.
ސަރުކާރުން ހުށަހެޅި ބިލް؛
އިންޑަސްޓްރިއަލް ރިލޭޝަންސް ބިލަކީ ވަޒީފާ އަދާކުރާ މީހުންނަށް ގާނޫނު އަސާސީން ކަށަވަރުކޮށްދޭ މުހިންމު ހައްގުތައް ކަށަވަރުކޮށްދޭނެ ގާނޫނީ އޮނިގަނޑު އެކުލަވާލަން ފަހިކޮށްދޭ ބިލެކެވެ.
ސަރުކާރުން މި ބިލު ހުށަހެޅުމުގެ މަގުސަދަތުތަކަކީ؛
- ގާނޫނު އަސާސީން ކަށަވަރުކޮށްދިފައިވާ ހަޅުތާލުކުރުމުގެ ހައްގާއި، ހިޔާލުފާޅުކުރުމުގެ ހައްގާއި ޖަމާއަތްތައް (ޓްރޭޑް ޔޫނިއަންތައް) ހެދުމުގެ މިނިވަންކަން ކަށަވަރުކޮށްދިނުން
- މަސައްކަތްތެރިންނާއި ވަޒީފާދޭ ފަރާތްތަކުގެ މެދުގައި ކަލެކްޓިވް ބާގެއިނިން އެއްބަސްވުންތަކަށް ވާސިލުވުމުގެ މެކޭނިޒަމް ގާއިމްކުރުން
- ވަޒިފާގެ މާހައުލުގައި އުފެދޭ މައްސަލަތައް ހައްލުކުރުމުގައި ތަރައްގީވެފައިވާ މުޖުތަމައުތަކުގައި އަމަލުކުރަމުންދާ ގާނޫނީ އުސޫލުތަކާއި އެއްހަމައެއްގައި އިޖުރާއަތުތައް ކަނޑައެޅުން
އިކޮނޮމިކް މިނިސްޓްރީން ބުނި ގޮތުގައި މި ބިލަކީ ވަޒިފާގެ މާހައުލަށް އިންގިލާބީ ބަދަލެއް ގެނެސް މަސައްކަތްތެރިންނާއި، ވަޒީފާދޭ ފަރާތްތަކުގެ ހައްގުތައް ރައްކާތެރިކުރުމަށް އެޅޭ އެންމެ މުހިންމު ބިންގަލެވެ.
