މާލެ ސިޓީ ކައުންސިލުން ވިލިމާލޭގައި ބަގީގެ ހިދުމަތް ދިނުމަށް ހަވާލުކުރި ކުންފުނި އުފައްދާފައިވަނީ ހިދުމަތް ދޭން ފެށުމުގެ މަހެއްހާ ދުވަސް ކުރިންކަން ހާމަވެއްޖެ އެވެ.
މައުލޫމާތު ހޯޯދައި ލިބިގަތުމުގެ ހައްގުގެ ދަށުން "އަދަދު" އިން ހޯދި މައުލޫމާތުތަކަށް ބަލާއިރު، ސިޓީ ކައުންސިލުން 15 ޑުރައިވަރުންނާއި 10 ކޮންޑަކްޓަރުން ހަމަޖައްސައިގެން ބަގީގެ ހިދުމަތް ކުރިއަށް ގެންދިއުމަށް ހަވާލުކޮށްފައިވަނީ 'ޕިންކް ސްކައި މޯލްޑިވްސް ޕްރައިވެޓް ލިމިޓެޑް' ކިޔާ ކުންފުންޏަކާ އެވެ.
މި ނޫހުން އިތުރަށް ހޯދި މައުލޫމާތަށް ބަލާއިރު މި ކުންފުނި އިކޮނޮމިކް މިނިސްޓްރީގައި ރަޖިސްޓްރީ ކޮށްފައިވަނީ ފެބްރުއަރީ މަހުގެ 20 ގަ އެވެ. އެއީ ކައުންސިލުން ބަގީގެ ހިދުމަތް ދިނުމުގައި "އެހީތެރިކަން ފޯރުކޮށްދޭނެ ފަރާތެއް" ހޯދުމަށް ފުރަތަމަ އިއުލާން ކުރުމުގެ ތިން ދުވަސް ކުރިންނެވެ. ބަގީގެ ހިދުމަތް ދިނުމަށް ކައުންސިލުން މަހަކު 390،000ރ. ހަރަދުކުރެ އެވެ.
ސިޓީ ކައުންސިލުން ވިލިމާލޭގައި ބަގީގެ ހިދުމަތް ދިނުމަށް 10 ބަގީ ގެނެސްފައިވާއިރު އެކަމަށް ޖުމްލަ 2.7 މިލިއަން ރުފިޔާ ވަނީ ހަރަދުކޮށްފަ އެވެ. މި ބަގީތައް ގެނައުމަށް ހަވާލުކުރި ކުންފުންޏަކީ ކޮން ގައުމެއްގެ ކުންފުންޏެއްކަން ނޭނގޭ ކަމަށްވެސް ސިޓީ ކައުންސިލުން ދިން މައުލޫމާތުގައި ބުނެފައިވެ އެވެ.
ސިޓީ ކައުންސިލުން ވިލިމާލޭގައި ބަގީގެ ހިދުމަތް ދޭން ފެށީ، ކުރިން އެ އަވަށުގައި ބަގީގެ ހިދުމަތް ދޭން ހަވާލުކުރި އަމިއްލަ ކުންފުނިން އެ ހިދުމަތް ހުއްޓާލުމުންނެވެ.
ވިލިމާލޭގައި ބަގީގެ ހިދުމަތް ކުރިއަށްނުދާތީ، އެ ހިދުމަތް ދިނުމަށް ހަވާލުކޮށްފައި އޮތް ކުންފުނިން އެ މަސައްކަތް ހުއްޓާލައި، ދީފައިވާ ބިންތައް ހަތް ދުވަސް ތެރޭގައި ހަވާލުކުރުމަށް މާލޭ ސިޓީ ކައުންސިލުން އެ ކުންފުންޏަށް އެންގުމުން ސިވިލް ކޯޓަށް ހުށަހެޅި މައްސަލައާ ގުޅިގެން އެ އެނގުމަށް އަމަލު ނުކުރަން ވަނީ ވަގުތީ އަމުރެއް ނެރެފަ އެވެ.
ވިލިމާލޭގައި ބަގީގެ ހިދުމަތް ދިނުމަށް ހަވާލުކޮށްފައި އޮތީ އިމްޕްރިންޓް ނަމަކަށް ކިޔާ ކުންފުންޏަކާ އެވެ. އެހެން ނަމަވެސް، އެ ކުންފުނިން ވަނީ ފަހުން އެ މަސައްކަތް 99 ހޯލްޑިންސް ކުންފުންޏަށް ބަދަލުކޮށްފަ އެވެ.
