ހުޅުމާލެ ދެ ވަނަ ފިޔަވަހިން ޔޫތު މިނިސްޓްރީއަށް ބިމެއް ހަވާލުކޮށްފި އެވެ.
ހުޅުމާލެ ދެ ވަނަ ފިޔަވަހިން ޔޫތު މިނިސްޓްރީއަށް ދިނީ 5.4 ހެކްޓަރުގެ ބިމެކެވެ. އެ ބިން ހަވާލުކުރީ ހުޅުމާލޭގައި ސްޕޯޓްސް އެންޑް ރެކްރިއޭޝަން ޑިވެލޮޕްމަންޓަށެވެ.
އެކަމާ ބެހޭ އެއްބަސްވުމުގައި މިއަދު ވަނީ ސޮއިކޮށްފަ އެވެ. އެއްބަސްވުމުގައި ޔޫތު މިނިސްޓްރީގެ ފަރާތުން މިނިސްޓަރު އަހުމަދު މަހުލޫފު ސޮއިކުރެއްވިއިރު، ހުޅުމާލެ ތަރައްގީކުރާ އާބަންކޯގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އަހުމަދު އާތިފެވެ.
އާބަންކޯއިން މިއަދު ބުނީ ހުޅުމާލެ އަކީ އާބަން ސިޓީއެއްގެ ގޮތުގައި ތަރައްގީ ކުރުމަށް ކުރެވޭ މަސައްކަތުގެ ތެރެއިން އެންމެ މުހިންމު އެއްކަމެއްގެ ގޮތުގައި އެ ކަމަކީ ޒުވާނުންނަށް ކުޅިވަރުތަކާއި އެހެނިހެން ރިކްރިއޭޝަން ހަރަކާތްތަކަށް ހުޅުމާލޭގައި ފުރުސަތު ހޯދައިދިނުމަށް ކަމަށެވެ.
އެ ކުންފުނިން ބުނީ، ޔޫތު މިނިސްޓްރީއަށް ބިމެއް ހަވާލުކުރީ ވެސް ޒުވާނުންނަށް ކުޅިވަރާއި އެހެނިހެން ހަރަކާތްތަކަށް ހުޅުމާލެއިން ފުރުސަތު ހޯދައިދިނުމަށް ކަމަށެވެ.
