ލަންޑަން (އޭޕްރީލް 23) - އިނގިރޭސި އެފްއޭ ކަޕްގެ ސެމީ ފައިނަލުގައި ރިޔާދު މާރޭޒްގެ ހެޓްރިކުން 3-0 އިން ޝެފީލްޑް ޔުނައިޓެޑް ބަލިކޮށް މެންޗެސްޓާ ސިޓީން މުބާރާތުގެ ފައިނަލުން ފުރުސަތު ހޯދައިފި އެވެ.
މިއީ ވޭތުވެދިޔަ 65 އަހަރު ތެރޭ އެފްއޭ ކަޕްގެ ސެމީ ފައިނަލެއްގައި ފެނުނު ފުރަތަމަ ހެޓްރިކެވެ. އެންމެ ފަހުން އެފްއޭ ކަޕް ސެމީއެއްގައި ހެޓްރިކް ހެދީ 1958 ވަނަ އަހަރުގެ މުބާރާތުގައި މެންޗެސްޓާ ޔުނައިޓެޑަށް ކުޅުނު އަލެކްސް ޑޯސަން އެވެ.
ވެމްބްލީ ސްޓޭޑިއަމްގައި ރޭ ކުޅުނު ސެމީ ފައިނަލުގައި ސިޓީން ލީޑުނެގީ 42 ވަނަ މިނިޓްގައި އޭރިއާތެރެއިން ސިޓީގެ ބެނާޑޯ ސިލްވާ އަށް ޝެފީލްޑްގެ ކުޅުންތެރިން ކުރި ފައުލަކަށް ދިން ޕެނަލްޓީން ޖެހި ގޯލުންނެވެ. މާރޭޒް ވަނީ ހަމަޖެހިލައިފައި ގޯލަށް ބޯޅަ ފޮނުވާލައިފަ އެވެ.
ދެ ވަނަ ހާފުގައި މާރޭޒް ވަނީ ފަސް މިނިޓް ތެރޭ ދެ ގޯލު ޖަހައި، ހެޓްރިކް ފުރިހަމަކޮށްފަ އެވެ. އެ ގޮތުން 61 ވަނަ މިނިޓްގައި މާރޭޒް، އޭނާގެ ދެ ވަނަ ލަނޑު ޖެހީ ހާފުގެ މެދެއްހާ ހިސާބުން ބޯޅަ ހިފައިގެން ގޮސް، އޭރިއާ ތެރެއަށް ވަދެ، ގޯލުގެ ތިރީ ކަނަށް ފޮނުވާލައިގެންނެވެ.
އޭގެ ފަސް މިނިޓް ފަހުން، މާރޭޒް ހެޓްރިކް ފުރިހަމަކުރީ ޖެކް ގްރީލިޝް ތަނަވަސްކޮށްދިން ފުރުސަތަކުންނެވެ.
މި ފަހަރުގެ ޕްރިމިއާ ލީގުގެ ރޭހުގައި ވެސް ވާދަކުރަމުން އަންނަ ސިޓީ ވަނީ ޗެމްޕިއަންސް ލީގުގެ ސެމީ ފައިނަލަށް ވެސް ދަތުރުކޮށްފަ އެވެ. ސިޓީ އަށް ސީޒަނުގެ ތިން މުބާރާތް ކާމިޔާބު ކުރެވޭނެ ކަމަށް މީޑިއާ އިން ދައްކަމުން އަންނަ ސުވާލުތަކަށް މީގެ ކުރިން އެ ޓީމުގެ ކޯޗު ޕެޕް ގާޑިއޯލާ ޖަވާބުދީފައިނުވި ނަމަވެސް ރޭގެ މެޗަށް ފަހު ގާޑިއޯލާ ވަނީ ތިން ތަށްޓަށް ވާދަކުރެވިދާނެ ކަމަށް ބުނެފަ އެވެ.
އެފްއޭ ކަޕް ފައިނަލުގައި ސިޓީއާ ކުޅޭ ޓީމެއް އެނގޭނީ މިރޭ ބްރައިޓަން އާއި މެންޗެސްޓާ ޔުނައިޓެޑް ކުޅޭ ސެމީ ފައިނަލް މެޗުންނެވެ.
