ފިތުރު އީދު ފާހަގަ ކުރާއިރު އެންމެ ބޮޑު އިސްކަމެއް ދޭންވީ ދިވެހިންނަށް ލިބިފައިވާ އެންމެ މަތިވެރި އެއް ނިއުމަތް ކަމުގައިވާ މުޖުތަމައުގެ އެއްބައިވަންތަކަމާއި ސުލުހަ މަސަލަސްކަން އެގޮތުގައި ދެމެހެއްޓުން ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ފިތުރު އީދުގެ މުނާސަބަތުގައި ރައީސް ސޯލިހު ދެއްވި ހިތޯބުގައި ވިދާޅުވީ ރޯދައިގެ އަޅުކަމުން ލިބިދިން ފިލާވަޅުތަކާއި އިހުސާސްތަކާއި ތަޖުރިބާތަކުގެ ބޭނުން ހިފައި، އީދު ފާހަގަ ކުރާއިރު އެންމެ ބޮޑަށް އިސްކުރަންވީ މައިންބަފައިންނާއި ދަރިންނާއި ގާތްތިމާގެ މީހުންނާއި އެކުވެރިންނާއި ރަހުމަތްތެރިން ކަމަށެވެ.
"އީދުގެ ހަގީގީ އުފަލެއްކަމުގައި އަޅުގަނޑުމެން ކޮންމެ މީހަކުވެސް ހަދަންވީ، އެ މީހެއްގެ މައިންބަފައިންނާއި އަނބިދަރިންނާއި ގާތްތިމާގެ މީހުންނާ އެކުގައި އުފާވެރި ވަގުތުކޮޅެއް ހޭދަކޮށް، އެކަކު އަނެކަކާ ސަލާންގަލާންކޮށް، ހިތުގެ ހާލިސް ކަމާއި ހިތްހެޔޮކަން ފާޅުކުރުމެވެ. އެކުވެރިންނާއި ރަހުމަތްތެރިންނާ ބައްދަލުކޮށް، އީދުގެ ތަހުނިޔާ ބަދަލުކުރުމެވެ،" ރައީސް ވިދާޅުވި އެވެ.
ރޯދައިގެ އަޅުކަމުން ހިތްތަކަށް ލިބުނު ތޯހިރު ކަމާއި ތާޒާކަން ދެމެހެއްޓުމަށްޓަކައި، އަޒުމަކަށް ހަދަންވީ ހަސަދައާއި ނަފުރަތަށް ހިތްތަކުން ޖާގަ ނުދިނުމަށް ކަމަށް ރައީސް ސޯލިހު ވިދާޅުވި އެވެ.
"ވަކިން ހާއްސަ ސަމާލުކަމެއް ދޭންވީ، އެއްވެސް ސަބަބަކާ ހުރެ، މީހަކާ މެދު ހިތުގައި ރުޅިވެރިކަމެއް ނުވަތަ ދެކޮޅުވެރިކަމެއް އަދި ހިތްހަމަނުޖެހުމެއް އޮތް ނަމަ، އެމީހަކަށް ހިތް ހެޔޮކޮށް މަޢާފްކުރުމާއެކު، އަލުން ގުޅުން އުފެއްދުމަށް އިސް ނެގުމަށެވެ." އެ މަނިކުފާނު ވިދާޅުވި އެވެ.
ކޮންމެ ހާލަތެއްގައި ވެސް ހަމަނުޖެހުމާއި ދެކޮޅުވެރިކަމަށް ނޫނެކޭ ބުނެ، ހިތްތައް ހުޅުވައިލަންވީ، އެކުވެރިކަމާއި އެއްބައިވަންތަކަން ދެމެހެއްޓުމަށް ރައީސް ވިދާޅުވި އެވެ. އަދި ހިތްތަކަށް އާރޯކަމާއި ތާޒާކަން ދޭންވީ، އަނެކުންނާ މެދު ބަހައްޓާ ގާތްކަމާއި ލޯތްބާއި އޯގާތެރިކަމާއި ކުލުނުން ކަމަށް އެ މަނިކުފާނު ވިދާޅުވި އެވެ.
އީދުގެ އުފާ ފާހަގަކުރާއިރު މުޖުތަމައުގައި ތިބި ފަގީރުންނާއި ނިކަމެތިންގެ މަތިން ހަނދާން އާކުރަންޖެހޭ ކަމަށާއި މި އުފަލުގައި އެއްވެސް މީހަކު ބާކީ ނުކޮށް، ތަފާތުކުރުމެއް ނުބާއްވުމަށް ރައީސް ގޮވާލެއްވި އެވެ.
