އިދިކޮޅު ކޯލިޝަނުގެ ރިޔާސީ ކެންޑިޑޭޓު، ކުރީގެ ރައީސް އަބްދުﷲ ޔާމީނާއި ޕީޕީއެމްގެ ނައިބު ރައީސް ޑރ. މުހައްމަދު މުއިއްޒުއާ ދެމެދު އެއްވެސް މައްސަލައެއް އޮތްކަން ޕާޓީއަށް އެނގިފައި ނުވާ ކަމަށް ޕީޕީއެމްގެ ނައިބު ރައީސް އަހުމަދު ޝިޔާމް ވިދާޅުވެއްޖެ އެވެ.
އިދިކޮޅުން މިއަދު އިލެކްޝަންސް ކޮމިޝަނާއެކު ބޭއްވި ބައްދަލުވުމަކަށްފަހު ނޫސްވެރިންނަށް މައުލޫމާތު ދެއްވަމުން ޝިޔާމް މިފަދައިން ވިދާޅުވެފައި މިވަނީ ޔާމީން ޖަލުގައި ހުންނެވުމުން، ޕީޕީއެމްގެ ރިޔާސި ޓިކެޓު ހޯއްދެވުމަށް މުއިއްޒު މަސައްކަތް ކުރައްވާ ކަމުގެ އަޑުގަދަވަމުންދާ ދަނޑިވަޅެއްގަ އެވެ.
"[ޔާމީނާއި މުއިއްޒާ ދޭތެރޭ މައްސަލައެއް] ހުރި ކަމަކަށް އަޅުގަނޑުމެންނަށް ނޭނގޭ، އަޅުގަނޑު މި ދަންނަވާހެން އަޅުގަނޑުމެންނާ ރައީސް ޔާމީނާ ބައްދަލެއް ނުވޭ، ދޭން ބޭނުންވާ މެސެޖެއް ދެއްވަނީ ލޯޔަރުން މެދުވެރިކޮށް، އެކަމަކު ތިޔަ ވިދާޅުވި ފަދަ ނުތަނަވަސްކަމެއް ޕާޓީގެ ނައިބު ރައީސަކާ ދޭތެރޭ އޮތް ކަމެއް ޕާޓީއަށް އެނގިފައެއް ނެތް،" ޝިޔާމް ވިދާޅުވި އެވެ.
އިދިކޮޅު ޕާޓީގެ ތެރޭގައި މައްސަލަ ހޫނުވެފައިވާ ކަމަށް އަޑުފެތުރިފައި ވަނިކޮށް މުއިއްޒުގެ އަރިސް ބޭފުޅެއް ކަމަށްވާ މާލޭ ސިޓީގެ ކައުންސިލް މެމްބަރު އާދަމް ރަމީޒުގެ މައްޗަށް ޕީޕީއެމުން ވަނީ، ޔާމީނުގެ އޯޑަރަށް ސުލޫކީ މައްސަލައެއް ބަލާފަ އެވެ. ސަބަބެއް ކަމުގައި މިއަދު ޝިޔާމް ވިދާޅުވީ ޔާމީންގެ ކެންޑިޑެސީއަށް ހުރަސް އެޅުމެވެ.
ރަމީޒްގެ މައްޗަށް މުއިއްޒަށް ޕީޕީއެމްގެ ޓިކެޓު ހޯދަން މަސައްކަތް ކުރެއްވި ކަމުގެ ތުހުމަތު އަމާޒުވި ނަމަވެސް އެ ތުހުމަތުގެ ތަފުސީލެއް ޕާޓީން ނުދެ އެވެ. އަދި، ސުލޫކީ ކޮމިޓީއިން މައްސަލަ ބަލަން ފަށައި ބަޔާން ނެގި ފަހުން ރަމީޒް ވަނީ ޕީޕީއެމް އިން ވަކިވެފަ އެވެ.
ޕާޓީގެ ތެރޭގައި މައްސަލަ ޖެހިފައިވާ ކަމަށް ފެތުރޭ އަޑުތަކާ ގުޅިގެން ޝިޔާމް އިތުރަށް ވިދާޅުވީ ޕީޕީއެމްގެ ޓިކެޓު ޔާމީނަށް އެރުވީ ޕާޓީގެ ލީޑަޝިޕުން އެކަނި ނޫން ކަމަށާއި އެއީ އެ ޕާޓީގެ ސެނެޓާއި، ދާއިރާތަކުގެ ރައީސުންނާއި މުޅި ރާއްޖެއިން ބޭނުންވެގެން ނިންމި ނިންމުމެއް ކަމަށެވެ.
"2023 ގައި ޕީޕީއެމްގެ ޓިކެޓުގައި ވާދަކުރައްވާނެ ކެންޑިޑޭޓަކީ ރައީސް ޔާމީން، އަޅުގަނޑުމެންނަކަށް ނުފެނޭ އެކަމާ ދޭތެރޭ އަޅުގަނޑުމެންގެ ތެރެއިން އެއްވެސް ބޭފުޅަކު ސުވާލު އުފައްދަވާ ތަނެއް،" ޝިޔާމް ވިދާޅުވި އެވެ.
މީގެއިތުރުން، ޕީޕީއެމްގެ އެތެރޭގައި މައްސަލަ އުޅޭ ކަމަށް އަޑު ފަތުރަނީ އެ ޕާޓީއިން ޔާމީނާއެކު ނުކުމެ މި އަހަރުގެ އިންތިހާބު ކާމިޔާބު ކުރާނެކަން ސަރުކާރަށް އެނގޭތީ އެކަމަށް ހުރަސްއެޅުމަށް ކަމަށާއި އަދި، ސިޔާސީ ޕާޓީތަކުގައި ސިޔާސީ ކަންކަން ހިނގާނެ ކަމަށާއި ނަމަވެސް ޕީޕީއެމުން ތިބޭނީ ޔާމީނާއެކު ސާބިތުވެ ކަމަށްވެސް ޝިޔާމް ވިދާޅުވި އެވެ.
