މާލޭ ސިޓީގެ ކައުންސިލް މެމްބަރު އާދަމް ރަމީޒުގެ މައްސަލައެއް އިދިކޮޅު ޕްރޮގްރެސިވް ޕާޓީ އޮފް މޯލްޑިވްސް އިން ބެލީ އެ ޕާޓީގެ ރިޔާސީ ކެންޑިޑޭޓު ރައީސް އަބްދުﷲ ޔާމީންގެ ކެންޑިޑެސީއަށް ހުރަސް އެޅި ކަމަށް ތުހުމަތު ކުރެވުމުން ކަމަށާއި އެކަން ބެލީ އެމަނިކުފާނުގެ އިރުޝާދުގެ ދަށުން ކަމަށް މިއަދު ބުނެފި އެވެ.
މައްސަލަ ބަލަން ފެށުމުން ރަމީޒު ވަނީ ޕީޕީއެމުން ވަކިވެފަ އެވެ. އޭނާގެ މައްޗަށް ތުހުމަތު ކުރެވުނީ މާލޭގެ މޭޔަރު މުހައްމަދު މުއިއްޒަށް ޕީޕީއެމްގެ ޓިކެޓު ހޯދަން މަސައްކަތް ކުރުން ކަމަށް އަޑުފެތުރިފައިވެ އެވެ. ނަމަވެސް އެ ތުހުމަތުގެ ތަފުސީލެއް ޕާޓީން ނުދެ އެވެ.
ޕީޕީއެމްގެ ވަފުދެއް މިއަދު އިލެކްޝަންސް ކޮމިޝަނަށް ވަޑައިގަތުމަށްފަހު ނޫސްވެރިންނަށް މައުލޫމާތު ދެއްވި އިރު "އަދަދު" އިން ކުރި ސުވާލަކަށް ޖަވާބު ދެއްވަމުން އެ ޕާޓީގެ ޑެޕިއުޓީ ލީޑަރު އަހުމަދު ޝިޔާމް ވިދާޅުވީ ރަމީޒުގެ މައްސަލަ ބެލީ ޔާމީންގެ އިރުޝާދުގެ ދަށުން ކަމަށާއި އެދިވަޑައިގަތީ ސީރިއަސް މައްސަލައެއްގެ ގޮތުގައި އެކަން ބެލުމަށް ކަމަށެވެ.
"ރިޔާސީ ކެންޑިޑޭޓުގެ ކެންޑިޑެސީއަށް ހުރަސް އެޅޭ ނުވަތަ އުނިކަން އަންނަ ފަދަ ކަމެއް ރިޔާސީ ކެންޑިޑޭޓަށް އެނގިވަޑައިގެން ހިނގާ ކަމަށްވާ ނަމަ އެކަމާ ދޭތެރޭ އެމަނިކުފާނަށް އޮންނާނެ ފުރިހަމަ އިހުތިޔާރު އެކަމަށް ގޮތެއް ނިންމުމަށް،" އޭނާ ވިދާޅުވި އެވެ.
"ރައީސް ޔާމީންގެ ފަރާތްޕުޅުން ޕާޓީއަށް ލިބިފައި އެބަ އޮތް އެކަހަލަ އިރުޝާދެއް، އެމަނިކުފާނުގެ ރިޔާސީ ކެންޑިޑެސީއަށް ހުރަސް އެޅޭ ފަދަ ކަންތައްތަކެއް މި ދެންނެވި ކުރައްވާ ވާހަކަ އެހެންވީމަ އެއީ ސީރިއަސް މައްސަލައެއްގެ ގޮތުގައި އެކަންތައް ބަލައި އަޅުގަނޑުމެން ގޮތެއް ނިންމަން."
އޭގެ އިތުރުން ޝިޔާމް ތަކުރާރުކޮށް ވިދާޅުވީ ރިޔާސީ ކެންޑިޑޭޓަކީ ގިނަ ބާރުތަކެއް ލިބިގެން ހުންނަވާ ފަރާތެއް ކަމަށާއި ކެންޑިޑޭޓާ ދެކޮޅަށް ކުރާ މަސައްކަތްތައް ހުއްޓުވުމުގެ ބާރު އެ ޕާޓީގެ ރިޔާސީ ކެންޑިޑޭޓަށް ލިބިގެންވާ ކަމަށެވެ.
ސުލޫކީ ކޮމިޓީއިން މައްސަލަ ބަލަމުން ދަނިކޮށް ރަމީޒު ޕީޕީއެމް ދޫކުރެއްވީ އެ ކޮމިޓީއަށް އޭނާ ހާޒިރުކޮށް ބަޔާންވެސް ނަގާފައިވަނިކޮށެވެ. ނަމަވެސް ރަމީޒު އަދި ޕާޓީއިން ވެސް އެ ތަހުގީގުގެ އެއްވެސް ތަފުސީލެއް މިހާތަނަށް ދީފައެއް ނުވެ އެވެ.
ރަމީޒު ޕީޕީއެމްއާ ގުޅިވަޑައިގަތުމުގެ ކުރިން އުޅުއްވީ އެމްއެންޑީއެފްގަ އެވެ. ގާތްގަނޑަކަށް 20 އަހަރު ފަހުން އެމްއެންޑީއެފުން ވަކިވެވަޑައިގެންނެވިއިރު، އޭނާ އުޅުއްވީ ސްޕެޝަލް ޕްރޮޓެކްޝަން ގުރޫޕް (އެސްޕީޖީ)ގަ އެވެ.
ސެޕްޓެމްބަރު 9، ގައި ބާއްވާ ރިޔާސީ އިންތިހާބުގައި، މިހާރު ޖަލުގައި އޮންނެވި ޔާމީނަށް ވާދަ ނުކުރެވިއްޖެ ހާލަތެއްގައި ޕާޓީގެ ރިޔާސީ ޓިކެޓު ހޯއްދެވުމުގެ އުއްމީދުގައި ޕީޕީއެމްގެ އިސް ބައެއް ބޭފުޅުން މަސައްކަތް ކުރައްވާކަން އެ ޕާޓީގެ މަސްދަރުތަކުން ކަށަވަރުކޮށްދެ އެވެ. އޭގެ ތެރޭގައި މުއިއްޒު ވެސް ހިމެނިވަޑައިގަންނަވަ އެވެ.
