ތ. ފުނައްޑޫ މަސް ފެކްޓްރީ އޮޕަރޭޝަނަށް ގެނައުމަށް އެރަށް މިފްކޯއަށް ކުއްޔަށްދީ، މިއަދު އެއްބަސްވުމުގައި ސޮއިކޮށްފި އެވެ.
ފުނައްޑޫ މަސް ފެކްޓްރީ ތަރައްގީކޮށްގެން ކުރިން ހިންގީ ކުރީގެ ހޯމް މިނިސްޓަރު އަދި ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެމްބަރު އަހުމަދު ތަސްމީން އަލީ ހިއްސާވާ ކުންފުންޏަކުންނެވެ. އެތަން ވިއްކާލުމަށް ބޭންކް އޮފް މޯލްޑިވްސް އިން މަސައްކަތް ކުރަމުން އަންނަތާ އަހަރުތަކެއްވީ ފަހުން ސަރުކާރުން ވަނީ މިދިޔަ އަހަރުގެ މާޗް މަހު އެ ފެކްޓްރީ ގަނެފަ އެވެ.
އެފަހުން ސަރުކާރުން ދަނީ އެ ފެކްޓްރީ އަލުން އޮޕަރޭޝަނަށް ގެނައުމުގެ މަސައްކަތް ކުރަމުންނެވެ.
ފުނައްޑޫ މަސް ފެކްޓްރީ އޮޕަރޭޝަނަށް ގެނައުމަށްޓަކައި ހެދި އެސެސްމަންޓުން ވަނީ އެރަށުގެ ބަނދަރުގެ ބޮޑެތި މަރާމާތުތަކެއް ކުރަންޖެހޭކަން ހާމަވެފަ އެވެ. އެކަމަށް 157 މިލިއަން ރުފިޔާ ހޭދަވާނެ ކަމަށް ލަފާކުރާއިރު، އެއީ އޭރު ބަޖެޓުގައި ހިމަނާފައި ނުވާ ފައިސާކަމުން އެ ފައިސާ ހޯދުމަށް އޮތީ ދަތިވެފަ އެވެ.
ފިޝަރީޒް މިނިސްޓްރީން ވަނީ ފުނައްޑޫގެ މަރާމާތަށް ބޭނުންވާ ފައިސާ ލޯނުގެ ގޮތުގައި ހޯދައިގެން އެ މަސައްކަތް ކުރުމަށް މިފްކޯއަށް އަންގާފަ އެވެ. އަދި އެ މަސައްކަތް ނިމި، އެ ފެކްޓްރީ އޮޕަރޭޝަނަށް ގެނެވޭނީ އަންނަ މޭ މަހު ކަމަށް ވެސް މީގެ ކުރިން ފިޝަރީޒް މިނިސްޓަރު ވަނީ ވިދާޅުވެފަ އެވެ.
ތ. ތިމަރަފުށްޓާ ދާދި ކައިރީގައި އޮންނަ ފުނައްޑޫގައި މަސް ބަންދުކުރާ ކާރުހާނާއެއް އަޅަން، ތަސްމީން ހިއްސާވާ ކުންފުންޏަކަށް އެ ރަށް ދޫކުރީ ކުރީގެ ރައީސް މައުމޫނު އަބްދުލް ގައްޔޫމުގެ ވެރިކަމުގަ އެވެ.
އެ ރަށުގައި މަސްފެކްޓްރީއެއް ހަދައިގެން ހިންގާތާ އަަހަރުތަކެއް ފަހުން ބޭންކް އޮފް މޯލްޑިވްސްއަށް އެ ރަށް ނަގައި ވިއްކައިލަން އިއުލާނު ކުރީ ފުނައްޑޫ ޓޫނާ ޕްރޮޑަކްޓްސް ޕްރައިވެޓް ލިމިޓެޑުން ނަގާފައިވާ ލޯނެއް ނުދެއްކުމުންނެވެ. އެރަށާއި އެހެން ބައެއް ތަންތަން ރަހުނުކޮށްގެން ނަގާފައިވާ ލޯނާއި އެލޯނަށް އިތުރުވި އިންޓަރެސްޓާއި އެކު ބޭންކަށް ދައްކަން އޭރު 200 މިލިޔަން ރުފިޔާއަށް ވުރެ ގިނަ ފައިސާ އޮތެވެ.
ފުނައްޑޫ ވިއްކައިލަން ބީއެމްއެލް އިން ފުރަތަމަ އިއުލާނު ކުރީ 2013 ވަނަ އަހަރު އެވެ. އެފަހަރު ގަންނާނެ ބަޔަކު ނުވެގެން 2014 ވަނަ އަހަރު ދެވަނަ ފަހަރަށް ވެސް އިއުލާނު ކުރި އެވެ. އެންމެފަހުން އެ ރަށް ގަނެފައިވަނީ ސަރުކާރުންނެވެ.
