އިދިކޮޅު ޕީޕީއެމްއަށް ނިސްބަތްވާ މެދު ހެންވޭރު ދާއިރާގެ މާލެ ސިޓީ ކައުންސިލް މެމްބަރު އާދަމް ރަމީޒުގެ މައްސަލައެއް އެ ޕާޓީގެ ސުލޫކީ ކޮމިޓީއަށް ހުށަހަޅައިފި އެވެ.
ރަމީޒުގެ މައްސަލައެއް ހުށަހަޅާފައި ވަނީ މަނީ ލޯންޑަރިން އާއި ރިޝްވަތު ހިފުމުގެ ކުށް ސާބިތުވެ 11 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ އިދިކޮޅު ލީޑަރު އަބްދުالله ޔާމީން ބޭނުންފުޅު ވެގެންކަން "އަދަދު" ނޫހަށް ވަނީ ކަށަވަރުވެފަ އެވެ.
މާލޭ ސިޓީ ކައުންސިލްގެ މެމްބަރުންގެ ތެރެއިން މޭޔަރު ޑރ. މުހައްމަދު މުއިއްޒުއާ އެންމެ އަރިސްކޮށް ފެނިވަޑައިގަންނަވާ ރަމީޒުގެ މައްސަލައެއް ހުށަހެޅީ ޕީޕީއެމްގެ ޓިކެޓުގައި ޔާމީނަށް ރިޔާސީ އިންތިހާބުގައި ވާދަ ކުރެއްވޭނެ ގޮތެއް ނުފެނިއްޖެ ނަމަ، ޕާޓީގެ ޓިކެޓު ހޯއްދެވުމަށް މުއިއްޒު މަސައްކަތް ކުރައްވާ ކަމުގެ އަޑުތަކެއް ފެތުރިފައި ވަނިކޮށެވެ.
ރަމީޒުގެ މައްސަލައެއް ލިބިފައިވާކަން ސުލޫކީ ކޮމިޓީގެ އިދާރީ ކަންކަން އެނގިވަޑައިގަންނަވާ ޕީޕީއެމްގެ އިސް އޮފިޝަލަކު ޔަގީންކޮށް ދެއްވި އެވެ. ނަމަވެސް މައްސަލައިގެ އިތުރު ތަފްސީލެއް، އަދި މައްސަލަ ކުރިއަށް ގެންދާން ނިންމާފައިވާ ކަމެއް އޭނާ ވިދާޅެއް ނުވެ އެވެ.
ރަމީޒު "އަދަދު" ނޫހަށް ވިދާޅުވީ ސުލޫކީ ކޮމިޓީއަށް އޭނާގެ މައްސަލައެއް ހުށަހަޅާފައިވާކަން އެނގިވަޑައިގެންފައި ނެތް ކަމަށެވެ. އަދި ވިދާޅުވީ އެފަދަ މައްސަލައެއްގެ ނޯޓިސް ލިބިވަޑައިގެންފައި ނެތް ކަމަށެވެ.
