ދަނޑުވެރިކަން ކުރުމަށް ފަޅު ރަށްތައް ކުއްޔަށް ދޫކުރުން ފިޝަރީޒް އެންޑް އެގްރިކަލްޗާ މިނިސްޓްރީން ވަގުތީ ގޮތުން މަޑުޖައްސާލައިފި އެވެ.
ފަޅު ރަށްތައް ކުއްޔަށް ދޫކުރުން ވަގުތީގޮތުން މަޑުޖައްސާލާފައި ވަނީ ދިވެހިރާއްޖޭގެ ފަޅުރަށްރަށާއި ބެހޭ ގަވައިދަށް އިސްލާހު ގެނައުމުގެ މަސައްކަތް ކުރަމުންދާތީ އެވެ. ނަމަވެސް، އެ ގަވައިދަށް ގެންނަން ނިންމާފައިވާ އިސްލާހެއް އަދި ސާފެއް ނުވެ އެވެ.
ފަޅު ރަށްތައް ކުއްޔަށް ދޫކުރުމުގެ އިތުރުން އެކަމަށް އެދި ހުށަހަޅާ ހުށަހެޅުންތައް ބަލައިގަތުން ވެސް ވަނީ ވަގުތީގޮތުން މަޑުޖައްސާލާފަ އެވެ.
ފަޅު ރަށްރަށާ ބެހޭ ގަވައިދަށް އިސްލާހެއް ގެންނައިރު، ފަޅު ރަށްރަށާ ބެހޭ ގާނޫނަށް މިދިޔަ ނޮވެމްބަރު މަހު ވަނީ އިސްލާހު ގެނެސްފަ އެވެ. އޭރު އިސްލާހު ގެނައީ ލާމަރުކަޒީ ގާނޫނުގެ ދަށުން ކައުންސިލްތަކަށް ބާރު ލިބޭ ގޮތަށެވެ.
ފަޅު ރަށްރަށާ ބެހޭ ގާނޫނަށް އޭރު ގެނައި އިސްލާހުތަކުގެ ތެރޭގައި އިދާރީ ދާއިރާއެއްގައި ހިމެނޭ ފަޅުރަށެއް، ނުވަތަ ސިޓީއެއްގެ އިހްތިސާސުގައި ހިމެނޭ ފަޅުރަށެއް ވަރުވާއަށް ލިޔެދޭނަމަ ނުވަތަ ވަކިކުރާނަމަ އެކަން ދެން ކުރާނީ އެ ރަށެއް ނުވަތަ ސިޓީއެއްގެ ކައުންސިލުންނެވެ. މިކަން ކުރަން ޖެހޭނީ މި ގާނޫނުގެ ދަށުން ހަދާ ގަވައިދުގެ ދަށުންނެވެ.
އޭގެއިތުރުން ވަރުވާއަށް ލިޔެދީފައިވާ ފަޅުރަށެއް އެ ރަށެއް ލިޔެގެން އުޅޭ ފަރާތުން އެހެން ފަރާތަކަށް ލިޔެދިނުމާއި، ކުއްޔަށް ދިނުމާއި، އެ ރަށް ބެލެހެއްޓުމުގެ ޒިންމާ އެހެން ފަރާތަކާ ހަވާލުކުރުން ވަނީ މި އިސްލާހުގެ ދަށުން މަނާކުރެވިފަ އެވެ.
މި އިސްލާހުގައި އިތުރަށް ބަޔާންކޮށްފައިވާ ގޮތުން، އިދާރީ ދާއިރާއެއްގައި ހިމެނޭ ފަޅުރަށެއް ނުވަތަ ސިޓީ ކައުންސިލެއްގެ އިހްތިސާސުގައި ނުހިމެނޭ ފަޅުރަށްރަށުގެ ތެރެއިން، ވަރުވާއަށް ލިޔެދޭ ރަށެއް، އިންޑަސްޓްރިއަލް ރަށުގެ ގޮތުގައި ދޭ ރަށެއް، އަދި އެނޫން ބޭނުންތަކަށް ކުއްޔަށްދޭ ރަށްރަށާއި، އެނޫންވެސް އެކި ބޭނުންތަކަށް ކަނޑައެޅޭ ރަށްރަށް ކަނޑައެޅުމުގެ ޒިންމާ އަދާކުރައްވާނީ ރައީސުލްޖުމްހުރިއްޔާ އެވެ.
