ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން އަޅާ ނިންމާފައިވާ ގޮދަން ފުށް ފެކްޓްރީގެ މަސައްކަތް ކުރުމަށް އެ ކުންފުނިން ހުށަހެޅި އޮޕްޝަންތަކުގެ ތެރެއިން ރައީސް އޮފީހުން ނިންމާފައި ވަނީ ހދ. ކުޅުދުއްފުށީގައިކަން "އަދަދު" ނޫހަށް އެނގިއްޖެ އެވެ.
ގޮދަން ފުށް ބަންދުކުރާ ފެކްޓްރީއެއް ގާއިމުކުރުމުގެ ވިސްނުން އިއުލާނު ކުރީ 2020 ވަނަ އަހަރުގެ އެސްޓީއޯގެ އަހަރީ އާއްމު ޖަލްސާގަ އެވެ. ބޭނުމަކަށްވީ ގޮދަން (ވީޓް ގްރެއިންސް) އެތެރެކޮށްގެން ރާއްޖޭގައި ޕްރޮސެސްކުރަން ފަށައި، ކާބޯތަކެތީގެ ރައްކާތެރިކަން އިތުރުކުރުމެވެ.
އެކަމަކު، މިއަހަރުގެ މެދު ތެރެއަށް ނިންމަން އަމާޒު ހިފި ޕްރޮޖެކްޓުގެ މަސައްކަތްތައް އެކަށީގެންވާ މިންވަރެއްގައި ކުރިއަށް ނުދެ އެވެ.
ނިމިގެންދިޔަ މާޗު މަހުގެ 26 އާ ހަމައަށް ވެސް އެސްޓީއޯގެ މެނޭޖިން ޑިރެކްޓަރު ކަމުގައި ހުންނެވި ހުސައިން އަމްރު ވަނީ "އެކަން [ފުށް ފެކްޓްރީ] ނުވެ އޮތީ ރައީސް އޮފީހުން ކުޅުދުއްފުށީގަ އަޅަން ބޭނުން ނުވެގެން،" ކަމަށް އިއްޔެ ވިދާޅުވެފަ އެވެ. އަދި، ކުޅުދުއްފުށީގެ ބަދަލުގައި އެހެން ތަނެއް ވެސް ދެއްކިފައި ނުވާ ކަމަށް އޭނާ އިއްޔެ ވިދާޅުވި އެވެ.
ނަމަވެސް "އަދަދު" ނޫހަށް މައުލޫމާތު ދެއްވި ރައީސް އޮފީހުގެ ސީނިއާ އޮފިޝަލަކު ވަނީ އެ ޕްރޮޖެކްޓުގެ މަސައްކަތް ކުރުމަށް އެންމެ ފުރަތަމަ ވެސް އެ އޮފީހުން ނިންމީ ކުޅުދުއްފުށީގައިކަން ކަށަވަރު ކޮށްދީފަ އެވެ.
"ފުށް ފެކްޓްރީ އެޅިދާނެ ކަމަށް ގަބޫލުކުރެވޭ ތިން އޮޕްޝަނެއް އެސްޓީއޯއިން ދިނީ. އެންމެ ފުރަތަމަ ވެސް ރައީސް އޮފީހުން ނިންމާފައި ވަނީ ކުޅުދުއްފުށީގައި އެ މަޝްރޫއު ކުރިއަށް ގެންދިޔުމަށް. އެކަމުގެ މަސައްކަތް ކުރިއަށްދާނެ،" ރައީސް އޮފީހުގެ އިސް އޮފިޝަލަކު ވިދާޅުވި އެވެ.
ހިންގުމުގެ ފަސޭހަ އާއި ސަލާމަތީ ސަބަބުތަކަށްޓަކައި އެސްޓީއޯއިން ފުރަތަމަ ވިސްނީ އެ ކުންފުނީގެ ބެލުމުގެ ދަށުގައި އޮތް ސިނާއީ ރަށެއްގައި މި ފެކްޓްރީ އަޅާށެވެ. އެފަހުން ވިސްނީ ސިނާއީ ބޭނުންތަކަށް ހާއްސަކޮށްފައިވާ ތިލަފުށި ނޫނީ ގުޅިފަޅުން ބިމެއް ހޯދައިގެން އެއިން ތަނެއްގައި މި ފެކްޓްރީ އަޅާށެވެ.
ފެކްޓްރީ އެޅުމަށް ބޭނުންވާ ބިން ބެލުމަށް އެސްޓީއޯގެ އިސް ވެރިންނާއި މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ އިސްވެރިން އެޕްރީލް 12، 2022 ގައި ކުޅުދުއްފުއްޓަށް ވެސް ދިޔަ އެވެ. އަދި، ބިމެއް ވެސް ކަނޑައެޅި އެވެ.
މި ބިން އޮންނަނީ އެމްޕީއެލް އަށް ދޫކޮށްފައިވާ ސަރަހައްދުގެ ތެރޭގަ އެވެ. އޭޕްރީލް 20222 ގެ ތެރޭގައި އެ ކުންފުނިން ވަނީ، ކުޅުދުއްފުށި ސިޓީ ކައުންސިލް މެދުވެރިވެގެން، އެސްޓީއޯ އަށް މި ބިން ދޭން އެއްބަސްވެފަ އެވެ. ފުށް ފެކްޓްރީ ޕްރޮޖެކްޓުގައި އެސްޓީއޯއާ އެކީ އެމްޕީއެލް އިން ބައިވެރިވާ އަނެއް ސަބަބަކީ ކުޅުދުއްފުށި ޕޯޓު އަޕްގްރޭޑު ކުރުމުގެ މަސައްކަތެވެ.
މި ފެކްޓްރީގައި އާދައިގެ ފުށުގެ އިތުރުން ކޭކު އަޅާ މީހުންނާއި ބޭކަރީތަކުގައި ބޭނުންކުރާ "ސްޕެޝާލިޓީ" ބާވަތްތަކުގެ ފުށް ތައްޔާރުކުރާ ގޮތަށް ވަނީ ހަމަޖެހިފަ އެވެ.
