ސައުދީ އަރަބިއްޔާގެ ސަރުކާރުން ރާއްޖެއަށް ހަދިޔާ ކުރި ކަދުރުގެ ތެރެއިން އާންމުންނަށް ބެހުމަށް ކަނޑައެޅި މިންވަރު އެއްކޮށް ހުސްވެފައިވާ ކަމަށް އިސްލާމިކް މިނިސްޓްރީން މިއަދު ބުނެފި އެވެ.
އެ މިނިސްޓަރީން މިއަދު ބުނީ، މާދަމާ ކަދުރު ބަހަމުން ގެންދާނީ ހަމައެކަނި ފަގީރުންގެ ދަފުތަރުގައި ހިމެނޭ މީހުންނަށް އެކަނި ކަމަށެވެ. އެއީ ހެނދުނު 9:00 އިން މެންދުރު 12:00 އަށް އެ މިނިސްޓަރީގެ ރިސެޕްޝަނުންނެވެ. މާދަމާއަކީ ކަދުރު ބަހާނެ އެންމެ ފަހު ދުވަހެވެ.
ކަދުރު ބަހަމުން ދާނީ މިދިޔަ އަހަރު އެކުލަވާލި ފަގީރުންގެ ލިސްޓުގައި ހިމެނޭ ކޮންމެ ގޭބިސީއަކަށް އެއް ޕެކެޓުގެ ރޭޓުން ކަމަށް މިނިސްޓަރީން ވަނީ މީގެ ކުރިން ބުނެފަ އެވެ. ކަދުރު ބަލައި ދާއިރު، އެ ބަލައި ދާ މީހެއްގެ އައިޑީކާޑު ގެންދަން ޖެހޭނެ އެވެ.
ސައުދީ އަރަބިއްޔާއިން ރާއްޖެއަށް ކޮންމެ ރަމަޟާން މަހަކަށް ވެސް ހާއްސަކޮށް ކަދުރު ހަދިޔާ ކުރެ އެވެ. މިއަހަރުގެ ރޯދައަށް އެ ގައުމުން ހަދިޔާ ކުރީ 50 ޓަނުގެ ކަދުރެވެ. އެއީ ޕެކެޓުން ބަލާނަމަ، 25،000 އެވެ. މި އަހަރު ކަދުރު ބެހުމުގެ މަސައްކަތް އިސްލާމިކް މިނިސްޓަރީން ފެށީ މިދިޔަ މަހުގެ 26 ގަ އެވެ.
އިސްލާމިކް މިނިސްޓްރީ މެދުވެރިކޮށް މާލެ ސަރަހައްދުގައި ކަދުރު ބެހި ނަމަވެސް ރަށްރަށުގައި ބަހަމުން ގެންދާނީ އެ ރަށެއްގެ ނުވަތަ ސިޓީއެއްގެ ކައުންސިލު މެދުވެރިކޮށެވެ.
މިއަހަރުގެ ރަމަޟާން މަހުގެ ފުރަތަމަ 15 ގައި ކަދުރު ބަހައި ނިމުނު ނަމަވެސް މިދިޔަ އަހަރު ކަދުރު ބަހައި ނިންމާލެވިފައި ވަނީ ރޯދަމަހުގެ ފަހު ދިހައެއްގެ ތެރޭގަ އެވެ.
