ރައީސް އިބްރާހިމް މުހައްމަދު ސޯލިހު، މީގެކުރިން ފައިނޭންސް ކޮންޓްރޯލަރުގެ މަގާމުގައި ހުންނެވި މުހައްމަދު އާޒާދު، އެކައުންޓު ޖެނެރަލްގެ މަގާމަށް އައްޔަންކުރައްވައިފި އެވެ.
އެ މަގާމަކީ ފައިނޭންސް ކޮންޓްރޯލަރުގެ މަގާމު އުވާލުމަށްފަހު އަލުން އުފެއްދި މަގާމެއް ކަމަށް ފިނޭންސް މިނިސްޓްރީއިން ބުނެ އެވެ. އެ މަގާމު އުފެއްދީ މާލިއްޔަތު ގާނޫނަށް ގެނައި އިސްލާހުގެ ދަށުން ރައީސަށް ލިބިދޭ ބާރުގެ ދަށުންނެވެ.
އަލަށް އުފެއްދި އެކައުންޓު ޖެނެރަލްގެ މަގާމުގެ މަސްއޫލިއްޔަތުގެ ތެރޭގައި ހިމެނެނީ މައިގަނޑު ގޮތެއްގައި ދައުލަތުގެ ފައިސާއާއި ހިސާބުތައް އަދި ހިސާބުތަކާގުޅޭ ލިޔެކިޔުންތައް ހިންގާ ބެލެހެއްޓުމެވެ.
އެ މަގާމަށް އައްޔަންކުރި އާޒާދަކީ މީގެ ކުރިންވެސް ސަރުކާރުގެ އެކި މަގާމުތައް ފުރުއްވާފައިވާ ބޭފުޅެކެވެ. އެގޮތުން، ފިނޭންސް މިނިސްޓްރީގެ އެސްއޯއީ ރިފޯމް ކޮންސަލްޓަންޓެއްގެ މަގާމާއި، އެސްއޯއީ ފައިނޭންޝިއަލް ކޮންސަލްޓަންޓްގެ މަގާމު ފުރުއްވި އެވެ.
ސީއެފްއޭ ޗާޓާ ހޯލްޑާއެއްގެ އިތުރުން ބިޒްނަސް އެޑްމިނިސްޓްރޭޝަން ދާއިރާއިން ބެޗްލާސް ޑިގްރީއަކާއި ސައިންސްއިން ފައިނޭންސް ދާއިރާއިން މާސްޓާ ހާސިލުކުރައްވާފައިވާ އާޒާދު ވަނީ އޭގެ ކުރިން އޭސީސީގެ އިންޓެލިޖެންސް ޑިޕާޓްމަންޓުގެ އިސްވެރިޔާގެ އިތުރުން މޯލްޑިވްސް އިސްލާމިކް ބޭންކްގެ ބޯޑު މެމްބަރުކަންވެސް އަދާކުރައްވާފަ އެވެ.
