ކުރިއަށް އޮތް ރިޔާސީ އިންތިހާބުގައި ވާދަކުރުމަށް ނިންމާފައިވާ ޖުމްހޫރީ ޕާޓީއާއެކު ކޯލިޝަން ހެދުމުގެ ދައުވަތު ފަސް ފަރާތަކަށް މިއަދު ފޮނުވައިފި އެވެ.
ޖުމްހޫރީ ޕާޓީގެ ރިޔާސީ ކެންޑިޑޭޓު އަދި ރައްޔިތުންގެ މަޖިލީހުގެ މާމިނގިލި ދާއިރާގެ މެމްބަރު ގާސިމް އިބްރާހީމް ސޮއިކުރައްވައި، ސިޓީ ފޮނުވާފައިވަނީ ޕީޕީއެމާއި އެމްއާރުއެމާއި އެމްއެންޕީގެ އިތުރުން ރިޔާސީ އިންތިހާބުގައި ވާދަކުރާނެ ކަމަށް އިއުލާން ކުރައްވާފައިވާ ކުރީގެ ހޯމް މިނިސްޓަރު އުމަރު ނަސީރު އަދި ކުރީގެ ބަންޑާރަ ނައިބު ޑރ. މުހައްމަދު މުނައްވަރަށެވެ.
ޕީޕީއެމާއި އެމްއެންޕީން ވެސް ރިޔާސީ އިންތިހާބުގައި ވާދަކުރުމަށް ނިންމާފައިވެ އެވެ. ނަމަވެސް އޭގެ ތެރެއިން ޕީޕީއެމްގެ ރިޔާސީ ކެންޑިޑޭޓް އަދި ކުރީގެ ރައީސް އަބްދުﷲ ޔާމީން ޖަލު ހުކުމެއް ތަންފީޒުކުރައްވަމުންދާތީ މި ވަގުތަށް ވާދަކުރުމުގެ ފުރުސަތު ވަނީ ބަންދުވެފަ އެވެ. އެމްއެންޕީގެ ރިޔާސީ ކެންޑިޑޭޓަކީ ރައްޔިތުންގެ މަޖިލީހުގެ ދަނގެތި ދާއިރާގެ މެންބަރު އަދި އެ ޕާޓީގެ ރައީސް މުހައްމަދު ނާޒިމެވެ.
އެމްއާރުއެމަށް ވެސް ޖޭޕީއާއެކު ކޯލިޝަން ހެދުމުގެ ދައުވަތު ފޮނުވާފައިވާއިރު އެ ޕާޓީން އަދި ރިޔާސީ އިންތިހާބާ މެދު ގޮތެއް ނިންމާފައެއް ނުވެ އެވެ. ޖޭޕީގެ އިތުރުން ވެރިކަން ކުރާ އެމްޑީޕީގެ ރިޔާސީ ކެންޑިޑޭޓް ރައީސް އިބްރާހީމް މުހައްމަދު ސޯލިހު ވެސް ކޯލިޝަން ހެދުމުގެ ދައުވަތު އެމްއާރުއެމަށް ފޮނުވާފައިވެ އެވެ.
ޖޭޕީއާއެކު ކޯލިޝަން ހެދުމާ މެދު މިހާތަނަށް ރަސްމީކޮށް އެއްބަސްވެވިފައި ވަނީ އެމްޑީޕީގެ އެތެރޭގައި އުުފެދިފައިވާ "ފިކުރެއްގެ ދިރުން" ފެކްޝަނާ އެކުގަ އެވެ. ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދުގެ އެ ފެކްޝަނާ އެކު މެނިފެސްޓޯ ތައްޔާރު ކުރުމުގެ މަސައްކަތް ވެސް ވަނީ ފަށައިފަ އެވެ.
