ރާއްޖެއިން ނައްތާލާފައިވާ ބައްޔެއް ކަމަށްވާ ހިމަބިހި ޖެހިފައި ހުރި ކުޑަކުއްޖަކު އައްޑޫ ސިޓީއިން ފެނުމުން އަޅަންޖެހޭ ފިޔަވަޅުތައް އަޅަމުންދާ ކަމަށް ހެލްތު ޕްރޮޓެކްޝަން އެޖެންސީން މިއަދު ބުނެފި އެވެ.
ހިމަބިއްސަށް އައްޑޫ އިން އެއް ކުއްޖަކު ޕޮޒިޓިވް ވެފައިވާއިރު, ހިމަބިހި ކަމަށް ބެލެވޭ އިތުރު ކޭސްއެއް ވެސް ވަނީ ފެނިފަ އެވެ. އެހެންކަމުން އެޗްޕީއޭއިން މިހާރު ދަނީ އެ ކުއްޖާގެ ސާމްޕަލް ނަގާ ޓެސްޓު ކުރުމުގެ މަސައްކަތް ކުރަމުންނެވެ.
ހިމަބިހީގެ ދެނެގަނެވުނު ދެ ކޭސްގައި ވެސް އިންފެކްޝަން ޕީރިއަޑް ނުވަތަ ކުއްޖާ ގައިން އެހެން މީހަކަށް ނުވަތަ ކުއްޖަކަށް ބަލި އަރާނެ ކަމަށް ބެލެވޭ މުއްދަތު މިހާރު ވަނީ ފަހަނަ އަޅައި ގޮސްފައި ކަމަށް އެޗްޕީއޭއިން ބުނެ އެވެ. އެހެންކަމުން އެ ދެ ކުދިން ގައިން ވެސް އިތުރަށް ބަލި ފެތުރުމުގެ ފުރުސަތު ނެތް ކަމަށް އެޗްޕީއޭއިން ބުނެ އެވެ.
އެ ދެ ކޭސްއާ ގުޅިގެން ކޮންޓެކްޓްވި މީހުން ދެނެގަތުމާއި އެ ކުދިންނަށްބަލި ޖެހުނު ސަބަބު ދެނެގަތުމުގެ މަސައްކަތް އައްޑޫ އިކުއިޓޯރިއަލް ހޮސްޕިޓަލުން ދަނީ ކުރަމުންނެވެ. އަދި މިކަމާ ގުޅިގެން ވެކްސިން ދޭން ޖެހޭ ފަރާތްތަކަށް ވެކްސިން ދިނުމުގެ ކަންކަން ކުރަމުންދާނެ ކަމަށް އެޗްޕީއޭއިން ބުނެ އެވެ.
ހިމަބިހީގެ މައިގަނޑު އަލާމާތްތަކަކީ ހުންއައުމާއެކު ހަމުގައި ރަތް ބިހިތަކެއް ނެގުމެވެ. އަދި ބައެއް މީހުންގެ ފަރާތުން ކެއްސުމާއި, އަރިދަފުސް ފޭބުން އަދި ލޯ ރަތްވުން ފަދަ އަލާމަތްތައް ފެނުމަކީ ވެސް އެކަށީގެންވާ ކަމެކެވެ. ހިމަބިއްސަކީ ހަލުވި ކަމާއެކު ފެތުރޭ ބައްޔެއް ކަމަށްވާއިރު, ބަލީގެ އަލާމާތްތައް ފެންނަ ނަމަ ސިއްހީ ހިދުމަތްތެރިއެއްގެ ލަފާ ހޯދުމަކީ މުހިންމު ކަމެކެވެ.
ހިމަބިއްސަކީ ރާއްޖޭގައި ނައްތާލެވިފައިވާ ބައްޔެއް ކަމަށްވާތީ, ބަލީގެ އެންމެ ކޭސްއެއް ފެނުނު ނަމަވެސް އެއީ ބަލީގެ އައުޓްބްރޭކެއް ކަމަށް ބަލަ އެވެ. އެޗްޕީއޭއިން ބުނީ ހިމަބިހީގެ މި އައުޓްބްރޭކްގެ ކޭސް އިންވެސްޓިގޭޝަން އަދި ކޮންޓެކްޓް ޓްރޭސިންގެ ތެރެއިން އިތުރު މައުލޫމާތު އެގެމުންދާ ވަރަކަށް ހާމަކުރަމުން ގެންދާނެ ކަމަށެވެ.
ރާއްޖެއިން ހިމަބިހި ނައްތާލެވިފައިވާކަން ޑަބްލިއުއެޗްއޯއިން އިއުލާން ކުރީ 2017 ވަނަ އަހަރެވެ. އެފަހުން 2020 ވަނަ އަހަރު ކުރީކޮޅު ވެސް ހިމަބިހީގެ އައުޓްބްރޭކެއް އައި ނަމަވެސް އެ އައުޓްބްރޭކް ވަނީ ކޮންޓްރޯލްކޮށްފަ އެވެ.
