ތިލަފުށީގައި ހުރި ގުދަނެއްގައި މިއަދު ރޯވި ބޮޑު އަލިފާންގަނޑު އެއްކޮށް ނިއްވާލައިފި އެވެ.
އެމްއެންޑީއެފުން ބުނީ އަލިފާންގަނޑު އެއްކޮށް ނިއްވާލެވިފައިވަނީ މެންދުރުފަހު 2:45 ހާއިރު ކަމަށެވެ. އެ ހާދިސާގައި އެއްވެސް މީހަކަށް އަނިޔާއެއް ލިބިފައި ނުވާކަން އެމްއެންޑީއެފުން ވަނީ ކަށަވަރު ކޮށްދީފަ އެވެ.
އެ ސަރަހައްދުގައި ހުރި، ނާޝިދު ކިޔާ މީހަކު މި ނޫހަށް މައުލޫމާތު ދެމުން ބުނީ ގުދަނުގައި ރޯވި އަލިފާންގަނޑު ޖެހިގެން ހުރި ބުލޮކަށް ފެތުރުނު ކަމަށާއި އެ ގުދަނަކީ ކޮންބައެއްގެ ގުދަނެއް ކަމެއް ނޭނގޭ ކަމަށެވެ.
"ގުދަނާ ޖެހިގެން އޮންނަ ބުލޮކަށް ވެސް އަލިފާންގަނޑު ފެތުރުނު، ރޯވި ގުދަނުގައި ގިނައިން ހުރީ ލަކުޑި، އެއީ ކޮންބައެއްގެ ތަނެއް ކަމެއް ނޭނގެ،" ނާޝިދު ބުންޏެވެ.
އޭނާ ބުނީ އަލިފާންގަނޑުގައި އެ ބުލޮކުގައި ހުރި ފިހާރައެއް ވެސް އަނދާފައިވާ ކަމަށެވެ. އެހެންނަމަވެސް އަލިފާންގަނޑު ފެތުރުމުގެ ކުރިން ފިހާރައިގައި ހުރި މުދާތައް ބޭރަށް ނެރެ ސަލާމަތް ކޮށްފައިވާ ކަމަށް އޭނާ ބުންޏެވެ.
"އެމީހުން ހުރީ މާކުރިން ރައްކާތެރިވުމުގެ ގޮތުން މުދާތައް ބޭރަށް ނެރެފައި،" ނާޝިދު ބުންޏެވެ.
އެތަނުގައި އަލިފާން ރޯވެގެން އުޅޭ ކަމުގެ މައުލޫމާތު ސިފައިންނަށް ލިބިފައި ވަނީ މިއަދު މެންދުރު 12:45 ގައި ކަމަށާއި އެވަގުތުން ފެށިގެން އަލިފާން ނިއްވުމުގެ މަސައްކަތް ތިލަފުށި ފަޔާ ސްޓޭޝަނުން ފެށި ކަމަށް އެމްއެންޑީއެފުން ބުނެ އެވެ.
ތިލަފުށީގައި ރޯވި އަލިފާންގަނޑު މިހާރު ނިއްވާލައިފައި ވާއިރު، ޑިސެމްބަރު، 2022 ގައި ކ. ގުޅީފަޅުގައި ހުރި ބިދޭސީ މަސައްކަތްތެރިންގެ އެކޮމަޑޭޝަން ބްލޮކުގައި ރޯވެ އެކަކު ވަނީ މަރުވެފަ އެވެ.
