ސެޕްޓެމްބަރުގައި އޮންނަ ރިޔާސީ އިންތިހާބުގައި ޖުމްހޫރީ ޕާޓީގެ ފަރާތުން ވާދަކުރައްވާނެކަން އިއުލާނު ކުރައްވާފައިވާ އެ ޕާޓީގެ ލީޑަރު ގާސިމް އިބްރާހިމްގެ އެޑްވައިޒަރުގެ މަގާމުން އެމްޓީސީސީގެ ސީއީއޯ އާދަމް އާޒިމް މިއަދު އިސްތިއުފާ ދެއްވައިފި އެވެ.
މި އަހަރުގެ ސެޕްޓެމްބަރު 9, ގައި ބާއްވާ ރިޔާސީ އިންތިހާބުގައި މަހުޖަނު ގާސިމް އިބްރާހިމްގެ ޖުމްހޫރީ ޕާޓީން ވާދަ ކުރަން ނިންމުމާ އެކު އެ ޕާޓީގެ އިސް ބައެއް ބޭފުޅުން ޕާޓީން ވަކިވަމުން ދާއިރު، އިސްތިއުފާގެ ސިޓީ ޓުވިޓާގައި ހިއްސާކުރައްވަމުން އާޒިމް ވިދާޅުވީ، ރިޔާސީ ދެ ވަނަ ދައުރަކަށް ރައީސް އިބްރާހިމް މުހައްމަދު ސޯލިހު އިންތިހާބު ކުރުމަށް އޭނާ ތާއީދު ކުރައްވާ ކަމަށެވެ.
އަދި، ގާސިމްގެ އެޑްވައިޒަރުގެ މަގާމުން އިސްތިއުފާ ދެއްވީ އެ ސަބަބާ ހުރެ ކަމަށް އާޒިމް ވިދާޅުވި އެވެ.
އާޒިމް ގާސިމަށް ފޮނުވި ސިޓީގައި ވިދާޅުވީ ދެ ވަނަ ދައުރަކަށް ރައީސް ސޯލިހު އިންތިހާބު ކުރުމަކީ މިވަގުތު ރާއްޖެ އާއި ދިވެހިންގެ މުސްތަގުބަލަށް އެންމެ ފައިދާ ކުރަނިވި ގޮތް ކަމަށް ވިދާޅުވެފަ އެވެ. އަދި ރާއްޖޭގައި ހަމަޖެހުން ގާއިމްކުރެވޭނެ ވެރިޔަކީ ވެސް، އާޒިމް ގަބޫލުކުރައްވާ ގޮތުގައި ރައީސް ސޯލިހު ކަމަށް އެ ސިޓީގައި ބަޔާންކުރައްވާފައިވެ އެވެ.
މީގެ ކުޑަ ދުވަސްކޮޅެއް ކުރިން "އަދަދު" އަށް ދެއްވި އިންޓަވިއުއެއްގައި އާޒިމް ވިދާޅުވީ އޭނާ އެމްޓީސީސީގެ މެނޭޖިން ޑިރެކްޓަރުގެ މަގާމަށް އައްޔަން ކުރެއްވީ ރައީސް އިބްރާހިމް މުހައްމަދު ސޯލިހު ކަމަށާއި، އިހުލާސްތެރިކަން ވެސް އޮތީ އެމަނިކުފާނަށް ކަމަށެވެ.
"މިވަގުތު އަޅުގަނޑު މި ހުރީ ރައީސް ސޯލިހު އައްޔަން ކުރެއްވި މަގާމެއްގައި. އެ މަގާމުގައި ހުރިހާ ހިނދެއްގައި އެ މަނިކުފާނުގެ ސިޔާސަތު ތަންފީޒުކުރަންޖެހޭ. އިހްލާސްތެރިކަން އޮންނަން ޖެހޭ،" އާޒިމް މީގެކުރިން ވިދާޅުވެފައިވެ އެވެ.
ގާސިމް ވަނީ މިއަދު ޖޭޕީގެ ޓިކެޓުގައި ރިޔާސީ ރޭހަށް ނުކުންނާނެކަން ހާމަކުރައްވާފަ އެވެ. އޭނާ ރިޔާސީ ރޭހަށް ނުކުންނަން ނިންމީ ރިޔާސީ ކެންޑިޑޭޓު ކަމަށް ޝަރުތު ހަމަވާ އެތައް ބޭފުޅުންނެއް ތިއްބެވި ނަމަވެސް ޕްރައިމަރީއަށް ކުރިމަތިލުމުގެ ވަގުތު ހަމަވާން ދިޔައިރު ވެސް އެއްވެސް މީހަކު ކުރިމަތިނުލުމުންނެވެ.
ރައީސް އިބްރާހިމް މުހައްމަދު ސޯލިހުއާ އެކު ކޯލިޝަން ހެދުމުގެ ބަދަލުގައި ޖުމްހޫރީ ޕާޓީ އިސްވެ އޮވެ އުފައްދާ ކޯލިޝަނަކުން ރިޔާސީ އިންތިހާބުގައި ވާދަކުރަން ޖޭޕީން ނިންމާފައިވާއިރު ގިނަބަޔަކު ގަބޫލުކޮށްގެން ތިބީ ވެސް އެ ޕާޓީގެ ރިޔާސީ ކެންޑިޑޭޓަކަށްވާނީ ޕާޓީގެ ލީޑަރު ގާސިމް އިބްރާހިމް ކަމަށެވެ.
ޖޭޕީގެ ސްލޮޓެއްގައި އެންމެ ފުރަތަމަ އާޒިމް ވަޑައިގެންނެވީ އެމްޑަބްލިއުއެސްސީގެ މެނޭޖިން ޑިރެކްޓަރުގެ މަގާމަށެވެ. އެއަށް ފަހު އެމްޓީސީސީގެ ސީއީއޯގެ މަގާމާއި ހަވާލުވެ އެ ކުންފުނީގެ ތާރީހުގައި ވެސް އެންމެ ގިނަ މަޝްރޫއުތައް ހިންގާފައިވަނީ އާޒިމްގެ މޭސްތިރިކަމުގަ އެވެ.
