ވެރިކަން ހިންގާ ނިޒާމު، ބަރުލަމާނީ ނިޒާމަކަށް ބަދަލު ކުރުމާ މެދު ވެސް ޖުމްހޫރީ ޕާޓީއާއި އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދުގެ "ފިކުރެއްގެ ދިރުން" ކޯލިޝަނުން މަޝްވަރާ ކުރަމުން އަންނަ ކަމަށް ބުނެފި އެވެ.
ޖޭޕީއާއި ރައީސް ނަޝީދުގެ މަންދޫބުންގެ ދެ ވަނަ މަޝްވަރާ ބައްދަލުވުން ވަނީ ރޭ ކުރިއަށް ގެންގޮސްފަ އެވެ.
ބައްދަލުވުމަށް ފަހު ނިޒާމު ބަދަލުކުރުމުގެ މަޝްވަރާ ކުރިއަށް ދޭތޯ "އަދަދު" އިން ސުވާލުކުރުމުން ނަޝީދުގެ މަންދޫބު ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ވިދާޅުވީ އެކީގައި މަސައްކަތް ކުރާއިރު ކުރެވޭނެ ހުރިހާ ކަމެއްގެ މަޝްވަރާ ކުރަމުން އަންނަ ކަމަށެވެ.
"އެބަ ހިނގާ ތިޔަ ވިދާޅުވި ކަހަލަ ހުރިހާ މަޝްވަރާއެއް، ސަރުކާރު ހިނގާނެ ގޮތުގެ މަޝްވަރާއާއި އަދި ނިޒާމީ ވޯޓަކަށް ދާއިރު އަމަލު ކުރާނެ ގޮތުގެ މަޝްވަރާއާ،" ހަސަން ލަތީފް ވިދާޅުވި އެވެ.
ކުރިއަށް އޮތް ރިޔާސީ އިންތިހާބުގައި އެމްޑީޕީގެ ކެންޑިޑޭޓު ރައީސް އިބްރާހިމް މުހައްމަދު ސޯލިހަށް ތާއީދުނުކޮށް، އެ ޕާޓީގެ ރައީސް ވަނީ ޖޭޕީއަށް ތާއީދު ކުރައްވައިފަ އެވެ.
ޖޭޕީ-ފިކުރެއްގެ ދިރުން ކޯލިޝަނުން އަންނަނީ ސިޔާސަތުތައް އެކުލަވާލައި، މެނިފެސްޓޯ ތައްޔާރުކުރުމުގެ މަސައްކަތް ކުރަމުންނެވެ.
ޖޭޕީއަކީ މިހާރު ހިނގަމުންދާ ސަރުކާރުގެ ކޯލިޝަންގެ މެމްބަރަކަށްވި ނަމަވެސް ކުރިއަށް އޮތް ސެޕްޓެމްބަރު 9، ގައި ބާއްވާ ރިޔާސީ އިންތިހާބަށް ރައީސް ސޯލިހާއެކު ކޯލިޝަން ހަދަން އެ ޕާޓީން އެއްބަހެއް ނުވި އެވެ. އޭގެ ބަދަލުގައި ޖޭޕީން ނިންމީ އެ ޕާޓީ އިސްވެ އޮވެ ހަދާ ކޯލިޝަނަކުން ރިޔާސީ އިންތިހާބަށް ނިކުތުމަށެވެ.
ނަޝީދުގެ ފިކުރެއްގެ ދިރުން ނަމުގައި ހަރަކާތެއް ހިންގަން ފެށީ ވެރިކަން ހިންގާ އެމްޑީޕީގެ ރިޔާސީ ޕްރައިމަރީން ނާކާމިޔާބުވެވަޑައިގެންނެވި ފަހުންނެވެ. އެމްޑީޕީގެ ޕްރައިމަރީގައި ނަޝީދު 15،000 ވޯޓު ހޯއްދެވި އެވެ.
ރިޔާސީ ނިޒާމަށް އަބަދުވެސް ފާޑުވިދާޅުވަމުން އަންނަ ނަޝީދު ބޭނުން ވަނީ ވެރިކަމުގެ ނިޒާމް ބަރުލަމާނީއަށް ބަދަލުކޮށް ބޮޑުވަޒީރަކަމަށް ވަޑައިގަންނަވާށެވެ.
އެމްޑީޕީ ޕްރައިމަރީގައި ކުރިމަތިވި ނާކާމިޔާބީއަށްފަހު، ބަލި ގަބޫލު ކުރެއްވުމަށްފަހު ނަޝީދު ވަނީ ތާއީދު ކުރާނީ ބަރުލަމާނީ ނިޒާމަކަށް ގެންނަން ބޭނުންވާ ކެންޑިޑޭޓަށް ކަމަށް ވިދާޅުވެފަ އެވެ.
"ފިކުރެއްގެ ދިރުންގެ ފަރާތުން ތާއީދު ކުރާ ރިޔާސީ ކެންޑިޑޭޓު ކަނޑައަޅާނީ ފަހުން. ރިޔާސީ އިންތިހާބުގެ ކުރިއަށް ޕާލަމެންޓަރީ ނިޒާމަށް ބަދަލު ކުރުމަށް އެއްބަސްވާ ކެންޑިޑޭޓަކީ ތާއީދު ކުރަން ފަސޭހަވާނެ ކެންޑިޑޭޓެއް،" ނަޝީދު ވިދާޅުވެފައިވެ އެވެ.
