ރޯދައަށް ސައުދީ އަރަބިއްޔާއިން ހަދިޔާކުރި ކަދުރު އަންނަ އާދީއްތަ ދުވަހުން ފެށިގެން ބަހާނެ ކަމަށް އިސްލާމިކް މިނިސްޓްރީން ހާމަކޮށްފި އެވެ.
އެހެން އަހަރުތަކެކޭ ވެސް އެއްފަދައިން ސައުދީން މިއަހަރުވެސް ހަދިޔާކުރީ 50 ޓަނު (25،000 ޕެކެޓު)ގެ ކަދުރެވެ. އެ ބަހަން ހަމަޖެހިފައި އޮތީ މިދިޔަ އަހަރު އެކުލަވާލި ފަގީރުންގެ ދަފްރަތުގައި ހިމެނޭ ކޮންމެ ގޭބިސީއަކަށް އެއް ޕެކެޓުގެ ރޭޓުންނެވެ.
ފަގީރުންގެ ގޭބިސީތަކަށް ބެހުމަށްފަހު ބާކީވާ ކަދުރުކޮޅުން ކޮންމެ 100 ގޭބިސީއަކަށް 26 ކަދުރު ޕެކެޓު ޖެހެ އެވެ. އެހެންކަމުން، އެ ޕެކެޓުތައް ބެހުމަށް ހަމަޖެހިފައި އޮތީ ބަލައި ހާޒިރުވާ ތަރުތީބަކުންނެވެ. ގޭބިސީތަކަށް ކަދުރު ބަހާނީ ކަދުރާ ހަވާލުވާންދާ މީހެއްގެ އައިޑީ ކާޑު ބެލުމަށްފަހު އެވެ.
މި މަހުގެ 26 ވަނަ ދުވަހުން ފެށިގެން އަންނަ އޭޕްރީލް މަހުގެ ހަ ވަނަ ދުވަހުގެ ނިޔަލަށް ކަދުރު ބެހުމަށް ހަމަޖެހިފައިވާއިރު، ކަދުރާ ހަވާލުވުމަށް ކައުންސިލްތަކާއި މާލެ، ހުޅުމާލެ އަދި ވިލިމާލޭގެ ރައްޔިތުން ފާން ޖެހެނީ އިސްލާމިކް މިނިސްޓްރީއަށެވެ. ކަދުރު ބެހުން ކޮންމެ ރަސްމީ ދުވަހެއްގެ ހެނދުނު 9:30 އިން 12:00އަށް ކުރިއަށް ދާނެ ކަމަށް އިސްލާމިކް މިނިސްޓްރީން ބުނެ އެވެ.
އިސްލާމިކް މިނިސްޓްރީ މެދުވެރިކޮށް މާލެ ސަރަހައްދުގައި ކަދުރު ބަހާއިރު، ރަށްރަށުގައި ބަހާނީ އެ ރަށެއްގެ ރަށު ނުވަތަ ސިޓީ ކައުންސިލު މެދުވެރިކޮށެވެ. ހަމައެއާއެކު، ރަށްރަށުގައި ކަދުރު ބެހުމަށް، މާލެއިން ކަދުރު ގެންދިއުމުގެ އިންތިޒާމު ހަމަޖައްސަން ޖެހެނީ ވެސް އެ ރަށެއްގެ ކައުންސިލުންނެވެ.
މިއަހަރު ރޯދަ މަސް ފެށުމުގެ ކުރިން ސައުދީން ކަދުރު ހަދިޔާކުރިއިރު، މިދިޔަ އަހަރު އެ ކަދުރުކޮޅު ލިބުނީ ރޯދަ މަސް ނިމުނު ފަހުންނެވެ.
