ވެރިކަން ކުރާ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އަށް ކުރިމަތިވެފައިވާ އެންމެ ބޮޑު އެއް ގޮންޖެހުމަކީ އެތެރޭގެ ޕްރައިމަރީތަކުން ބަލިވާ ކެންޑިޑޭޓުން މޮޅުވާ ކެންޑިޑޭޓުގެ ފަހަތަށް ނޭރުން ކަމަށް އެ ޕާޓީގެ ޕާލިމެންޓަރީ ގްރޫޕުގެ ލީޑަރު އަދި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވެއްޖެ އެވެ.
ކ. ގުރައިދޫ ދާއިރާގެ ބައި-އިލެކްޝަންގެ ކެމްޕޭން ރަސްމީކޮށް ފެށުމަށް ރޭ ކ. ގުޅީގައި ބޭއްވި ޖަލްސާގައި އަސްލަމް ވަނީ އެ އިންތިހާބުގެ އެމްޑީޕީ ޕްރައިމަރީގައި ވާދަކޮށް ބަލިވި ކެންޑިޑޭޓެއް ކަމަށްވާ ސަލްމާން ރަޝީދު، އިންތިހާބު ކާމިޔާބު ކުރެއްވި ކެންޑިޑޭޓު އިބްރާހިމް ޝާޒުގެ ފަހަތަށް އެރުމަކީ ހިތްވަރުގަދަ ނިންމުމެއް ކަމަށް ވިދާޅުވެފަ އެވެ.
އެމްޑީޕީއަކީ އިންތިހާބުތަކާ ދިމާކޮށް އެތެރޭގެ ޕްރައިމަރީތައް ރާއްޖޭގައި ބާއްވަން ފެށި ޕާޓީކަން ފާހަގަކުރައްވައި އަސްލަމް ވަނީ ގިނަ ފަހަރުތަކުގައި ނަތީޖާއާ އެކު ވާދަވެރި ކެންޑިޑޭޓުން އެމްޑީޕީގެ ކެންޑިޑޭޓަށް ތާއިދު ނުކުރާތީ އެކަމުގެ ކަންބޮޑުވުން ހިއްސާކޮށްފަ އެވެ.
"އެއީ [ޕްރައިމަރީ] ވަރަށް ރަނގަޅު ކަމެއްގެ ގޮތުގައި ދެކިގެން އަޅުގަނޑުމެން މިކަން ކުރަނީ. ވަރަށް ގިނަ ފަހަރަށް އެކަމަކު ފެންނަމުންދާ މަންޒަރެއް ޕްރައިމަރީއަށް ފަހު ވާދަކުރައްވާ ނުވަތަ ބަލިވި ކެންޑިޑޭޓުން ކާމިޔާބު ކުރާ ކެންޑިޑޭޓުގެ ފަހަތަށް ނާރާކަން،" އަސްލަމް ރޭ ވިދާޅުވި އެވެ.
އޭނާ ވިދާޅުވި ގޮތުގައި 17 ވަނަ ރައްޔިތުންގެ މަޖިލީހާއި 18 ވަނަ ރައްޔިތުންގެ މަޖިލީހުގައި ވެސް އެ ޕާޓީއަށް މެޖޯރިޓީ ނުލިބުނީ އެތެރޭގެ ޕްރައިމަރީތަކަށް ފަހު ކަންކަން އެގޮތަށް ހިނގައިދިޔުމުންނެވެ.
"މި ވަރުގަދަ ޕާޓީއަށް އޮންނަ އެންމެ ބޮޑު އެއް ޗެލެންޖު ޕްރައިމަރީއަށް ފަހު ބަލިވާ ކެންޑިޑޭޓުން މޮޅުވި ކެންޑިޑޭޓުގެ ފަހަތަށް ނާރާ ނޭރުން،"
ދާދިފަހުން އެމްޑީޕީން ބޭއްވި ރިޔާސީ ޕްރައިމަރީން ބަލިވެވަޑައިގެންނެވި އެ ޕާޓީގެ ރައީސް މުހައްމަދު ނަޝީދު ވެސް ވަނީ ޕްރައިމަރީ ކާމިޔާބު ކުރެއްވި މިހާރުގެ ރައީސް އިބްރާހިމް މުހައްމަދު ސޯލިހުގެ ފަހަތަށް ނާރާނެ ކަމަށް ވިދާޅުވެފަ އެވެ.
އަދި، އެމްޑީޕީގެ ތެރޭގައި ގެންދަވަނީ "ފިކުރެއްގެ ދިރުން" ނަމުގައި ހަރަކާތެއް ހިންގަވަމުންނެވެ. އެކަމަށް އިޝާރާތް ކުރައްވާ ވެސް އަސްލަމް ވާހަކަ ދެއްކެވި އެވެ.
"ރިޔާސީ ޕްރައިމަރީން ބަލިވި ކެންޑިޑޭޓަށް ދަންނަވާލަން ބޭނުންވަނީ ފަހަތަށް އަރާވަޑައިގަންނަވާށޭ. ޕާޓީ، ޕާޓީއެއްގެ ގޮތުގައި ހިފެހެއްޓުމަށް މަސައްކަތް ކުރައްވާށޭ. ސިޔާސީ ގޮތުން ހަރު މީހުންގެ ގޮތުގައި މީހުން ގަބޫލުކުރާ މީހުން ވެސް އެ ނަމޫނާގައި ހިފަހައްޓަވާށޭ،" ރައީސް ނަޝީދަށް އިލްތިމާސް ކުރައްވައި އަސްލަމް ވިދާޅުވި އެވެ.
