މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) ކޯސްޓްގާޑުގެ ސެއިލަރުން ތަމްރީނު ކުރުމަށް ހިންގި ވިހި ވަނަ ކޯސްޓްގާޑް ބޭސިކް ކޯހުގެ ދަސްވެނިވުން ބާއްވައިފި އެވެ.
އިއްޔެ ހަވީރު އެ ކޯސް ނިންމުމުގެ ގޮތުން ކަޅުތުއްކަލާކޮށި ހެވިކަމުގެ މައިދާނުގައި ބޭއްވި ރަސްމިއްޔާތު ޝަރަފުވެރިކޮށްދެއްވީ ޑިފެންސް މިނިސްޓަރު މާރިޔާ އަހުމަދު ދީދީ އެވެ.
މި ރަސްމިއްޔާތުގައި ޗީފް އޮފް ޑިފެންސް ފޯސް މޭޖާ ޖެނެރަލް އަބްދުالله ޝަމާލާއި ވައިސް ޗީފް އޮފް ޑިފެންސް ފޯސް ބްރިގޭޑިއާ ޖެނެރަލް އަބްދުއްރަހީމް އަބްދުއްލަތީފާއި މިލިޓަރީ ސެކެރެޓަރީ ޓު ދަ މިނިސްޓަރު ބްރިގޭޑިއާ ޖެނެރަލް އަބްދުލް މަތީން އަހްމަދާއި ސިފައިންގެ ޖެނެރަލް އޮފިސަރުންގެ އިތުރުން އެމްއެންޑީއެފްގެ ޔުނިޓްތަކުގެ ކޮމާންޑަރުން ބައިވެރިވެވަޑައިގެންނެވި އެވެ.
ވިހި ވަނަ ކޯސްޓްގާޑް ބޭސިކް ކޯހުގެ ވަނަވަނައަށް ހޮވުނު ދަރިވަރުންނަށް އިނާމާއި، ހަނދާނީލިޔުން ހަވާލުކޮށްދެއްވީ ޑިފެންސް މިނިސްޓަރާއި ޗީފް އޮފް ޑިފެންސް ފޯސްގެ އިތުރުން ވައިސް ޗީފް އޮފް ޑިފެންސް ފޯސް އެވެ.
އެ ރަސްމިއްޔާތުގައި ކޯހުން ފާސްވި ދަރިވަރުންނަށް ބެޖު ހަވާލުކޮށްދެއްވީ ކޮމަޑާންޓް ކޯސްޓްގާޑް ކާނަލް އިބްރާހީމް ހިލްމީއާއި ކޯސްޓްގާޑްގެ ޕްރިންސިޕަލް ޑައިރެކްޓަރު ލެފްޓިނަންޓް ކާނަލް މުހައްމަދު ރިޒްމީ ވަލީދާއި ކޯސްޓްގާޑްގެ ކޮމާންޑް ސާޖަންޓް މޭޖާ، ކޮމާންޑް ސާޖަންޓް މޭޖާ އަބްދުالله ޖަމީލެވެ.
ކޯސްޓްގާޑް ބޭސިކް ކޯހުގެ މުޅި ކޯހުން އެންމެ މޮޅު ދަރިވަރަކަށް ހޮވިފައިވަނީ ލާންސް ކޯޕްރަލް މުހައްމަދު ނާފިއު އެވެ. ޕޯޓް ޑިވިޝަންގެ އެންމެ މޮޅު ދަރިވަރުގެ އިތުރުން ކިޔެވުމަށް އެންމެ މޮޅު ދަރިވަރަކަށް ހޮވިފައި ވަނީ ލާންސް ކޯޕްރަލް އަބްދުالله އިބްރާހިމެވެ. އަދި ސްޓާބޯޑް ޑިވިޝަންގެ އެންމެ މޮޅު ދަރިވަރަކަށް ޕްރައިވެޓް އަލީ އިޒާން ނިޒާމް ވަނީ ހޮވިފަ އެވެ.
އެންމެ ހަށިހެޔޮ ދަރިވަރަކަށް ޕްރައިވެޓް އަބްދުالله ސަނީމް ހޮވިފައިވާއިރު، އެންމެ މޮޅު ބަޑި ޖެހުންތެރިއާގެ މަގާމަށް ހޮވިފައި ވަނީ ޕްރައިވެޓް އަހްމަދު ރިސްވާނެވެ.
ފަނަރަ ހަފުތާގެ މުއްދަތަށް ކޯސްޓްގާޑް ބޭސިކް ސްކޫލް، ޅ.މާފިލާފުށީގައި ކުރިއަށްގެންދިޔަ ކޯސްޓްގާޑް ބޭސިކް ކޯހުގައި 60 ދަރިވަރުން ބައިވެރިވެ 56 ދަރިވަރަކު ވަނީ ކޯހުން ދަސްވެނިވެފަ އެވެ. މީގެ ތެރޭގައި ހަތް އަންހެން ސިފައިން ވެސް ހިމެނޭ ކަމަށް ޑިފޭންސް މިނިސްޓަރީން ބުނެ އެވެ.
ކޯހުގައި ދަރިވަރުންނަށް އުނގަންނައިދެވުނު ބައިތަކުގެ ތެރޭގައި ނެވިގޭޝަން، ވިޒިޓް ބޯޑް ސާޗް އެންޑް ސީޒާ، މެރިޓައިމް ލޯ، މެރިން އިންޖިނިއަރިން (މެކޭނިކަލް އިންޖިނިއަރިން) ފަޔާ ފައިޓިން އެންޑް ޑެމޭޖް ކޮންޓްރޯލް، ސްވިމިން އެންޑް ރެސްކިޔު، ޗާޓް ވާކް، ނޭވަލް ގަނަރީ، ރޫލްސް އޮފް ދަ ރޯޑް، ސީމަން ޝިޕް، ނޭވަލް ކޮމިއުނިކޭޝަން، ރާއްޖޭގެ ޖިއުގްރަފީ، ނޭވަލް ސްޓަޑީސް، ފަސްޓް އެއިޑް، ފިޒިކަލް ޓްރެއިނިން އާއި ހެވިކަން އަދި އޮންބޯޑް ސެއިލިންގެ އިތުރުން ސަވައިވަލް ޓްރެއިނިން ހިމެނެ އެވެ.
ޑިފެންސް މިިނިސްޓަރީން ބުނީ ރާއްޖޭގެ ގައުމީ ދިފާއީ ބާރުގެ އަސާސީ ތަމްރީނު ނިންމައި ކޯސްޓްގާޑްގެ ހިދުމަތާ ގުޅޭ ފަރާތްތަކަށް އަމާޒުކޮށްގެން ހިންގޭ އެ ކޯހަކީ ކޯސްޓްގާޑް އޮޕަރޭޝަންތައް ހިންގުމަށް ބޭނުންވާ އިންސާނީ ވަސީލަތް، އޭގެ އެންމެ ފުރިހަމަ ގޮތުގައި ތަރައްގީކޮށް ކުރިއެރުވުމަށް، 2001 ވަނަ އަހަރުން ފެށިގެން އެމްއެންޑީއެފް އިން ހިންގާ ކޯހެކެވެ.
