އެންމެ މީހެއްގެ ނަމުގައި އެތަކެއް ހާސް ވަގު ސިމް ނަގާފައިވާއިރު، އެ ފަދަ ކަންކަން ހުއްޓުވޭނެ ގާނޫނެއް ނުވަތަ ގަވާއިދެއް ނެތުމުގެ ކަންބޮޑުވުން ސްޓޭޓް އޯންޑް އެންޓަޕްރައިޒަސް ކޮމިޓީން ފާޅުކޮށްފި އެވެ.
މަޖިލީހުގެ އެސްއޯއީ ކޮމިޓީން އަންނަނީ ސްކޭމް ކޯލުތައް އިތުރުވާ މައްސަލަ ދިރާސާ ކުރަމުންނެވެ.
އެ މައްސަލައިގައި ކޮމިޓީން މިއަދު ބޭއްވި ބައްދަލުވުމުގައި ސްކޭމްތަކުގެ މައްސަލައިގައި ފުލުހުން ކޮމިޓީއަށް ފޮނުވާފައިވާ ރިޕޯޓާ ގުޅޭ ބައެއް ކަންކަން ހިއްސާކޮށްފައިވެ އެވެ.
އެކެއްގެ ނަން މަތީގައި ގިނަ ސިމް ނެގޭ ގޮތަށް އޮތުމަކީ އެންމެ ބޮޑު މައްސަލައިގެ ގޮތުގައި ފުލުހުން ފާހަގަކޮށްފައިވާއިރު، ދެ ބިދޭސީއެއްގެ ނަން މަތީގައި 24،000 ސިމް ކާޑު، 12 ބިދޭސީއެއްގެ ނަމުގައި ދިރާގުގެ 38،000 ނަންބަރުގެ އިތުރުން ބައެއް ދިވެހިންގެ ނަން މަތީގައި 600 އަށް ވުރެ ގިނަ ސިމް ކާޑު ނަގައިގެން ބޭނުން ކޮށްފައިވާކަން ފާހަގަކޮށްފައިވެ އެވެ.
މީގެ އިތުރުން ޖަލުގައި ބަންދުކޮށްފައި ތިބޭ ގައިދީން އޭގެ ތެރެއިން 305 ނަންބަރެއް ބޭނުން ކުރާކަން ޔަގީން ކުރެވިފައިވާ ކަން ފުލުހުންނާ ހަވާލާދީ ކޮމިޓީގައި ފާހަގަކޮށްފައިވެ އެވެ.
މިކަން ފާހަގަކޮށް އެސްއޯއީ ކޮމިޓީގެ މުގައްރިރު، ހުޅުދޫ ދާއިރާގެ މެންބަރު އިލްޔާސް ލަބީބު ވިދާޅުވީ ޖަލުން ހިންގާ ސްކޭމް ކޯލްތައް ހުއްޓުވުމަށް ޖަލުގައި އެންޓަނާއެއް ޖެހުމުގެ ބަދަލުގައި، ކުރާންވީ ކަމަކީ ވަގަށް އެތެރެކުރަމުން އަންނަ ފޯނުތައް ހުއްޓުވުމެވެ.
"އެއަށް ވުރެ މުހިންމު ކަމެއްގެ ގޮތުގައި އަޅުގަނޑަށް ފާހަގަވޭ، ޖަލަށް ފޯނު ވެއްދުން ހުއްޓުވުން،" އިލްޔާސް ލަބީބް ވިދާޅުވި އެވެ.
އެކެއްގެ ނަން މަތީގައި ނަގާފައިވާ ސިމްތަކާ މެދު އަމަލު ކުރާނެ ގޮތެއް ކޮމިއުނިކޭޝަން އޮތޯރިޓީން ސާފުކޮށްދީފައި ނުވާތީ ކޮމިޓީގެ މެންބަރު ކެޔޮދޫ ދާއިރާގެ މެންބަރު ހުސައިން ގާސިމް ވަނީ ކަންބޮޑުވުން ފާޅުކުރައްވައިފަ އެވެ.
"އެއީ ވަރަށް ބޮޑު ކަންބޮޑުމެއް، އަޅުގަނޑަކަށް ގަބޫލެއް ނުކުރެވޭ އެކެއްގެ ނަމުގައި އެހާ ބައިވަރު ސިމް އޮންނަން ޖެހޭ އެއްވެސް ސަބަބެއް،" ގާސިމް ވިދާޅުވި އެވެ.
މިކަމަށް ހައްލެއް ގެނައުމަށް ގަވައިދެއް އެކުލަވާލައި ކުރިން ދޫކޮށްފައިވާ ސިމްތަކަށް މުހިންމު ކަން މެންބަރުން ފާހަގަކޮށްފައިވެ އެވެ.
މުއާސަލާތީ ވަސީލަތްތައް ބޭނުންކޮށްގެން ކުރާ ނޭދެވޭ އަމަލުތައް ގިނަވަމުންދާތީ އެކަން މަދުކުރުމަށް ކޮމިއުނިކޭޝަން އޮތޯރިޓީން ވަނީ ސިމްކާޑު ކުރިން ދޫކުރަމުން އައި ގޮތް ހަރުކަށި ކޮށްފަ އެވެ.
އެގޮތުން، ސިމްކާޑު ކަސްޓަމަރުންނަށް ދޫކުރުމުގެ ކުރިން ހުންނާނީ ބޭނުންނުކުރެވޭ ހާލަތު (ނޮން އެކްޓީވޭޓަޑް ސްޓޭޓަސް) ގަ އެވެ. ސިމްކާޑު އެކްޓިވޭޓް ވާނީ، ސިމްކާޑު ދޫކުރާ ކަސްޓަމަރުގެ ފުރިހަމަ މައުލޫމާތު ހިދުމަތްދޭ ފަރާތަށް ލިބުމުން ކަމަށްވެސް ސީއޭއެމްއިން ބުނެ އެވެ.
