މި އަހަރު ހައްޖު ކޯޕަރޭޝަނުން ހައްޖުގެ އަޅުކަމަށްދާ ދިވެހި ހައްޖުވެރިންނަށް އެހީތެރިން ހޯދުމަށް ދެވަނަ ފަހަރަށް އެ ކޯޕަރޭޝަނުން އިއުލާންކޮށްފި އެވެ.
އެ ކޯޕަރޭޝަނުން މިއަދު ކުރި އިއުލާނުގައި ބުނެފައިވަނީ, މިއީ މި މަހުގެ ހަތެއްގައި ކުރި އިއުލާނަށް އެކަޝީގެންވާ ވަރަށް ތަރުހީބު ނުލިބުމުން ކުރި އިއުލާނެއް ކަމަށެވެ. މިއަދު ކުރި އިއުލާނުގައި ހޯދުމަށް އެދިފައިވަނީ ފިިރިހެން އެހީތެރިންނަށެވެ.
އެގޮތުން މިކަމަށް ކުރިމަތިލާ ފަރާތްތަަކަކީ އަސާސީ ތައުލީމު ލިބިގެންވާ އަދި ހައްޖުވެރިންނަށް އެހީތެރިކަން ފޯރުކޮށްދިނުމުގައި ގިނަވަގުތު އުޅެވޭ ސިއްހަތު ރަނގަޅު މީހަކު ކަމުގައި ވާންޖެހޭނެ ކަމަށް ހައްޖު ކޯޕަރޭޝަނުން ބުނެފައިވެ އެވެ.
ހައްޖުވެރިންގެ އެހީތެރިން އާންމުގޮތެއްގައި ކުރަންޖެހޭ ކަންކަމުގައި ތެރޭގައި ހައްޖުވެރިންނަށް ދޭން ޖެހޭ މައުލޫމާތު ފޯރުކޮށްދިނުމާއި، ކެއިން ބުއިމުގެ ކަންކަމުގައި އެހީތެރިވުމާއި ހައްޖުވެރިންނަށް ބާޒާރުކުރުމުގައި އަދި ބާޒާރުކުރާ ތަކެތި ހޮޓަލަށް ގެންދިއުމުގައި އެހީތެރިވެދިނުން ހިމެނެ އެވެ.
މިކަމަށް އެދި ފޯމު ހުށަހެޅުމުގެ ސުންގަޑިއެއްގެ ގޮތުގައި ބުނެފައިވަނީ މި މަހު 22 ގެ މެންދުރުފަހު 3:00 އެވެ.
މި އަހަރަކީ ކޮވިޑުގެ ބަލިމަޑުކަމަށްފަހު އޭގެ ކުރިން ހައްޖުގެ އަޅުކަމަށް ފުރުސަތު ދިން އަދަދަށް ސައުދީގެ ސަރުކާރުން ހައްޖުވެރިންނަށް ފުރުސަތުދޭ ފުރަތަމަ ފަހަރެވެ.
ކޮވިޑްގެ ކުރިން ހައްޖުގެ އަޅުކަމުގައި ދެ މިލިއަނަށްވުރެ ގިނަ މީހުން ބައިވެރިވިއިރު، ބަލި ކޮންޓްރޯލްކުރުމަށްޓަކައި އެޅި ވަރުގަދަ ފިޔަވަޅުތަކާއެކު 2021ގެ ހައްޖުގައި ފުރުސަތު ދިނީ އެންމެ 10،000 މީހުންނަށެވެ.
ނަމަވެސް، ކޮވިޑު ފެތުރުން މަދުވެ ފިޔަވަޅުތަކަށް ދިން ލުޔާއެކު މިދިޔަ އަހަރު ސައުދީން ވަނީ އެއްމިލިއަން މީހުންނަށް ހައްޖު ކޯޓާ ދޫކޮށްފަ އެވެ.
މި ލުޔާއެކު މި އަހަރު ރާއްޖެއަށް ރަސްމީ ކޯޓާގެ ގޮތުގައި ސައުދީ ސަރުކާރުން ވަނީ 1،000 ކޯޓާ ދީފަ އެވެ. ނަމަވެސް ރާއްޖެއިން ވަނީ އެ އަދަދު 2500 އަށް ބޮޑުކޮށްދޭން ސައުދީގެ ސަރުކާރުގައި އެދިފަ އެވެ.
ހައްޖު ކޯޕަރޭޝަންގެ އިތުރުން މި އަހަރު އަމިއްލަ ފަރާތްތަކަށްވެސް ހައްޖަށް މީހުން ގެންދިއުމުގެ ފުރުސަތު ލިބިގެންދާނެ އެވެ. އެގޮތުން އެކަމަށް ޝައުގުވެރިވާ ފަރާތްތަކުން ޕްރޮޕޯސަލް ހުށަހެޅުމަށް މިހާރު ވަނީ ހުޅުވާލާފަ އެވެ.
