އައްޑޫ ބިން ހިއްކުމުގެ މަސައްކަތް ވަރަށް ބާރު ސްޕީޑުގައި ކުރިއަށްދާ ކަމަށް އައްޑޫ ސިޓީ ކައުންސިލުން ބުނެފި އެވެ.
މި މަޝްރޫއަކީ މި ވަގުތު އައްޑޫގައި ކުރިއަށްދާ އެންމެ ބޮޑު އެއް މަޝްރޫއެކެވެ. އެ މަޝްރޫއުގެ އަމަލީ މަސައްކަތް ފެށީ މިދިޔަ 2022 ވަނަަ އަހަރު ޖެނުއަރީ މަހުގެ ފަސް ވަނަ ދުވަހު އެވެ.
ކައުންސިލުން ބުނީ ބިން ހިއްކުމުގެ މަޝްރޫއުގެ ތެރެއިން ހަންކެޑެ ސަރަހައްދުގައި ގާއިމުކުރާ ބްރިޖް މަރަދޫއާ ގުޅާލެވޭ ސަރަހައްދަށް ބޭނުންވާ ބިން ހިއްކުމުގެ މަސައްކަތުގެ ވެސް ބޮޑު ބައެއް މިހާރު ނިމިފައިވާ ކަމަށެވެ. އަދި ޖުމްލަކޮށް ބިން ހިއްކުމުގެ މަސައްކަތް ބާރު ސްޕީޑްގައި ކުރިއަށްދާ ކަމަށް ކައުންސިލުން ބުނެ އެވެ.
ބިން ހިއްކުމުގެ މަޝްރޫއުގެ ތެރެއިން ޖުމްލަ 194.3 ހެކްޓަރުގެ ބިން ހިއްކާނެ އެވެ.
ބިން ހިއްކުން ވެން އޫޑްއާ ހަވާލުކުރީ މިދިޔަ އަހަރުގެ މާޗް 27 ގަ އެވެ. މިއީ އިންޑިއާގެ އެގްޒިމް ބޭންކްގެ 800 މިލިއަން ޑޮލަރުގެ ލައިން އޮފް ކްރެޑިޓް (އެލްއޯސީ) ގެ ދަށުން ހިންގާ މަޝްރޫއެކެވެ.
ކައުންސިލުން ބުނީ ޖުމްލަ 194.3 ހެކްޓަރުގެ ބިން ހިއްކާނެ ކަމަށާއި ޖުމްލަ 11 ކިލޯމީޓަރު ސަރަހައްދެއްގައި ގޮނޑުދޮށް ހިމާޔަތްކުރާނެ ކަމަށެވެ. އަދި ހިތަދޫން 90 ހެކްޓަރުގެ ބިން ހިއްކާނެ ކަމަށެވެ.
ހުޅުމީދޫން 23.3 ހެކްޓަރުގެ ބިން ހިއްކުމާއި ޓޫރިޒަމަށް ހާއްސަކޮށްގެން ފަސް ހެކްޓަރުގެ ދެ ރަށް ހިއްކުމުގެ އިތުރުން މަރަދޫ/މަރަދޫފޭދޫން 76 ހެކްޓަރުގެ ބިން ހިއްކާނެ ކަމަށް ކައުންސިލުން މައުލޫމާތު ދެއެވެ.
މި މަޝްރޫއުގެ ތެރެއިން ޓޫރިޒަމަށް ހާއްސަކޮށްގެން ފަޅުތެރެއިން ހިއްކައިގެން އުފައްދާ 8.3 ހެކްޓަރުގެ ތިން ރަށާއި 3.3 ހެކްޓަރުގެ ދެ ރަށް ހިއްކުން ހިމެނެ އެވެ.
އައްޑޫ ސިޓީ ކައުންސިލުން ބުނެފައިވާ ގޮތުގައި ބިން ހިއްކުމުގެ މި މަޝްރޫއުގެ ސަބަބުން މިހާރު އައްޑޫ ދިމާވެފައިވާ ބިމުގެ ދަތިކަން ކުރިއަށްއޮތް 50 އަހަރަށް ހައްލުވާނެ އެވެ.
އެ މަޝްރޫއު އެއްކޮށް ނިންމަން ނަގާނީ 18 މަސް ކަމަށް އައްޑޫ ސީޓީ ކައުންސިލުން ބުނެ އެވެ.
