ސެޕްޓެމްބަރު މަހު ބާއްވާ ރިޔާސީ އިންތިހާބުގައި އިދިކޮޅު ކޯލިޝަނުގެ ކެންޑިޑޭޓު، ކުރީގެ ރައީސް އަބްދުﷲ ޔާމީނަށް ފުރަތަމަ ބުރު ކާމިޔާބު ނުވެއްޖެ ނަމަ ދެވަނަ ބުރެއް ބާއްވާ ހާލަތެއްގައި ޖުމްހޫރީ ޕާޓީގެ ރިޔާސީ ކެންޑިޑޭޓު ގާސިމް އިބްރާހިމަކީ 'ޗޮއިސް' އެއް ކަމަށް ޕީއެންސީގެ ނައިބު ރައީސް އާދަމް ޝަރީފް އެއްބަސްވެއްޖެ އެވެ.
ރިޝްވަތާއި މަނީ ލޯންޑަރިންގެ މައްސަލައެއް ސާބިތުވެ 11 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ޔާމީނު ދޫކޮށްލުމަށް ގޮވާލާ އިދިކޮޅު ކޯލިޝަނުން ސިލްސިލާކޮށް ގެންދާ މުޒާހަރާތަކުގެ ތެރެއިން ރޭ އެއްވުން ބޭއްވި ސަރަހައްދުގައި ހުންނަވާ އާދަމް ޝަރީފް "އަދަދު" އަށް ވިދާޅުވީ އަދިވެސް އިދިކޮޅުގެ ރިޔާސީ ކެންޑިޑޭޓަކީ ޔާމީނު ކަމަށާއި ޔާމީން ވާދަކުރައްވާނެ ކަމުގެ ޔަގީންކަން އެބައޮތް ކަމަށެވެ.
ނަމަވެސް، ޔާމީނަށް ފުރަތަމަ ބުރު ގެއްލިއްޖެ ނަމަ ދެވަނަ ބުރުގައި ޖުމްހުރީ ޕާޓީއަކީ ޗޮއިސްއެއް ކަމަށް އާދަމް ޝަރީފް ވަނީ އިއުތިރާފުވެފަ އެވެ. މިއީ އަންނަ ރިޔާސީ އިންތިހާބުގައި އެހެން ޕާޓީއަކާ އެކު މަސައްކަތް ކުރުމާމެދު އިދިކޮޅު ކޯލިޝަނުގެ އިސް ބޭފުޅަކު ވާހަކަ ދެއްކެވި ފުރަތަމަ ފަހަރެވެ.
"ފުރަތަމަ ބުރުގައި އަޅުގަނޑުމެން ކޯލިޝަން ހަދާކަށް އިސްވެ މަސައްކަތެއް ނުކުރާނަން އެކަމަކު އަޅުގަނޑުމެންނަށް ގަބޫލުކުރާ ގޮތުން ރައީސް ޔާމީން އިރާދަކުރެއްވިއްޔާ ވާދަކޮށްގެން ފުރަތަމަ ބުރުން ނެގޭނެ، ނުނެގިއްޖެ ހާލަތެއްގައި އަޅުގަނޑުމެން ވާހަކަދައްކަން ޖެހިއްޖެ ހާލަތެއްގައި ޖޭޕީއަކީ އަޅުގަނޑުމެން ވާހަކަދައްކާނެ ޗޮއިސް އެއް" އާދަމް ޝަރީފް ވިދާޅުވި އެވެ.
އާދަމް ޝަރީފް މިހެން ވިދާޅުވެފައި މިވަނީ ރައީސް އިބްރާހިމް މުހައްމަދު ސޯލިހުއާ އެކު ކޯލިޝަން ހެދުމުގެ ބަދަލުގައި ޖުމްހޫރީ ޕާޓީ އިސްވެ އޮވެ އުފައްދާ ކޯލިޝަނަކުން ރިޔާސީ އިންތިހާބުގައި ވާދަކުރަން އެ ޕާޓީން ރޭ ނިންމާފައި ވަނިކޮށެވެ.
އެހެންކަމުން، ޖޭޕީ އާއެކު އިދިކޮޅުން މަޝްވަރާކޮށްފި ނަމަ އުފެދޭ ކޯލިޝަން ވެގެންދާނީ ޖޭޕީ އިސްވެ އޮންނަ ކޯލިޝަނަކަށެވެ.
ވ. އާރަށް ކުއްޔަށް ދިނުމުގައި ރިޝްވަތުހިފާ މަނީ ލޯންޑާކުރި މައްސަލަ ސާބިތުވެ ޔާމީންގެ މައްޗަށް ކުރި 11 އަހަރުގެ ޖަލު ހުކުމެއް އިއްވީ މިދިޔަ ޑިސެމްބަރު 25 ގަ އެވެ. އެ މައްސަލަ ފެބްރުއަރީ 21، ގައި ޔާމީނުގެ ވަކީލުން ވަނީ ހައި ކޯޓުގަައި އިސްތިއުނާފުކޮށްފަ އެވެ.
ނަމަވެސް، އެ އިސްތިއުނާފީ މައްސަލަ އިސްލާހު ކުރަން ހައި ކޯޓުން ވަނީ ޔާމީނުގެ ވަކީލުންގެ ޓީމަށް އަންގާފަ އެވެ.
ވެރިކަން ލިބެން ޖެހޭނީ ޔާމީނަށް ކަމަށާއި، އެމަނިކުފާނަށް ވެރިކަން ލިބިގެން ނޫނީ ރާއްޖޭގައި ގާއިމުވެގެން ތިބި ކަމަށް އިދިކޮޅުން ބުނާ އިންޑިއާ ސިފައިން ނުބޭލޭނެ ކަމަށް އިދިކޮޅުން ދަނީ ބުނަމުންނެވެ. އަދި، އެމަނިކުފާނު ޖަލުގައި އޮންނެވި ނަމަވެސް އިންތިހާބަށް ކެމްޕޭނު ކުރުމަށް އިދިކޮޅުގެ ލީޑާޝިޕުން ގެންދަނީ އަތޮޅުތަކަށް ދަތުރުތައް ކުރަމުންނެވެ.
އިދިކޮޅުގެ ރިޔާސީ ޓިކެޓު ޔާމީނަށް އަރުވާފައިވީ ނަމަވެސް ހުކުމުގެ ސަބަބުން މިވަގުތު ޔާމީނަށް މި އަހަރުގެ ރިޔާސީ އިންތިހާބުގައި ވާދައެއް ނުކުރެއްވޭނެ އެވެ.
ސަބަބަކީ ރައީސުލްޖުމްހޫރިއްޔާގެ ޝަރުތުތަކުގެ ގޮތުގައި ގާނޫނީ އަސާސީގައި ބަޔާންކޮށްފައި އޮންނަ އެއް ޝަރުތަކީ، ޖިނާއީ ކުށެއް ކުރިކަން ސާބިތުވެގެން 12 މަސް ދުވަހަށް ވުރެ ދިގު މުއްދަތެއްގެ ހުކުމެއް އޮތް ނަަމަ، އެ ހުކުމް ތަންފީޒުކޮށް ނިމުނުތާ ނުވަތަ ކަނޑައެޅުނު އަދަބު މައާފު ކުރެވުނުތާ ތިން އަހަރު ވެފައިވާ މީހަކަށް ވާން ޖެހުމެވެ.
