ޖުމްހޫރީ ޕާޓީގެ ލީޑަރު ގާސިމް އިބްރާހިމަށް ވެރިކަން ލިބޭ ތަން ނުފެންނަ ކަމަށާއި އެހެންނަމަވެސް އަބަދުވެސް އެދެނީ ކާމިޔާބަށް ކަމަށް ވިދާޅުވެ، ރައީސް އޮފީހުގެ މިނިސްޓަރު އަހުމަދު ސަމީރު އެ ޕާޓީން އިސްތިއުފާ ދެއްވައިފި އެވެ.
ރައީސް އިބްރާހިމް މުހައްމަދު ސޯލިހުއާ އެކު ކޯލިޝަން ހެދުމުގެ ބަދަލުގައި ޖުމްހޫރީ ޕާޓީ އިސްވެ އޮވެ އުފައްދާ ކޯލިޝަނަކުން ރިޔާސީ އިންތިހާބުގައި ވާދަކުރަން އެ ޕާޓީގެ ކައުންސިލް އިން މިއަދު ވަނީ ފާސްކޮށްފަ އެވެ.
ގާސިމް އިންތިހާބުގައި ވާދަކުރައްވަން ނިންމިއިރު ވެސް ސަމީރު އޮތީ މިދިޔަ ޖޫން މަހުގެ ތެރޭގައި ރައީސް އިބްރާހިމް މުހައްމަދު ސޯލިހަށް ތާއީދު ކުރައްވައިފަ އެވެ.
ކައުންސިލުގައި މިއަދު ނެގި ވޯޓުގައި ރައީސް ސޯލިހާއެކު ކޯލިޝަންގައި ދެމި އޮތުމަށް ވޯޓު ދެއްވި ހަމައެކަނި މެންބަރަކީ ވެސް ސަމީރެވެ.
އިސްތިއުފާ ދެއްވުމަށް ފަހު މ. ކުނޫޒް ބޭރުގައި ހުންނަވައިގެން "އަދަދު" އާ ވާހަކަ ދައްކަވަމުން ސަމީރު ވިދާޅުވީ ޕާޓީގެ ކެންޑިޑޭޓަށް ތާއީދުނުކޮށް، ޕާޓީގެ މެންބަރެއްގެ ގޮތުގައި ހުންނަވައިގެން ކުރިއަށް ދިއުމަކީ އެންމެ ގަބޫލުކުރެވޭ ގޮތް ނޫން ކަމަށެވެ.
"އެ ހިސާބުން އަޅުގަނޑު ގަބޫލުކުރާ އުސޫލުން އަޅުގަނޑު އިސްތިއުފާ ދިނީ، އެ ވާހަކަތައް އެ ބޭފުޅުންނަށް ދަންނަވާފައި، އަޅުގަނޑު މި ޕާޓީ ދެކެ ވަރަށް ލޯބިވާ ކަމާއި އަޅުގަނޑު ކޮށްދެއްވާފައިވާ ހިދުމަތްތައް ވެސް އެނގިވަޑައިގަންނަވާނެ ކަމަށް ގަބޫލުކުރައްވަނީ،" ޖޭޕީގެ ފައުންޑާ މެންބަރެއް ކަމަށްވާ ސަމީރު ވިދާޅުވި އެވެ.
ގާސިމް އިބްރާހިމަށް ވެސް ވެރިކަން ލިބުމަށް އެދުނު ނަމަވެސް މިވަގުތު މަސައްކަތް ކުރައްވާނީ ރައީސް ސޯލިހަށް ވެރިކަން ހޯދައިދެއްވުމަށް ކަމަށް ސަމީރު ވިދާޅުވި އެވެ.
ގާސިމަށް ތާއިދު ނުކުރައްވަނީ ކީއްވެތޯ ސުވާލުކުރުމުން ސަމީރު ވިދާޅުވީ ގާސިމަށް ވެރިކަން ލިބޭނެ އެއްވެސް "ފޯމިއުލާއެއް" އެ ބޭފުޅާއަށް ނުފެންނަ ކަމަށެވެ.
"އެހެންނަމަވެސް އެެ ބޭފުޅުންނަށް ވަރަށް ބޮޑަށް ފެންނާތީ އެ ބޭފުޅުން ގަބޫލުކުރައްވަނީ އެ ގޮތަށް އެކަން ވާނެ ކަމަށް، އަޅުގަނޑު އެދެން އެ ގޮތަށް މަސައްކަތް ކުރައްވައިގެން ކާމިޔާބަށް، އެއާއެކުގައި އެކަން ނުފެންނާތީ، އަޅުގަނޑު ނަފްސު ގަބޫލެއް ނުކުރެވޭ ރާއްޖޭގެ ރައީސުލްޖުމްހޫރިއްޔާ ކަމަށް އައުމަށް ގާސިމް އިބްރާހިމަށް ރައްޔިތުން ތާއީދުކުރައްވާނެ ކަމަކަށް،" ހަ އަހަރު ދުވަހު ޖޭޕީގެ އެސްޖީކަން ކުރެއްވި ސަމީރު ވިދާޅުވި އެވެ.
ޕާޓީއާ ދުރަށް ދިޔަ ނަމަވެސް، އަބަދުވެސް ގާސިމާއި ޕާޓީއަށް ހެޔޮ އެދޭ ކަމަށް އޭނާ ވިދާޅުވި އެވެ.
